1. Dôr satvea vorsa, tumchea rinnkareank tumi rinn dil'lem tem tankam maf korunk zai.
2. Tem hê porim korchem: tumchea Israeli-bhavak tumi rinn dilam zalear, tem tumi porot magchem nhoi; Sorvesporanuch tem maf kelam.
3. Punn porkea loka modlo tumkam konn dennem asa zalear, tem tumchean tachê-kodde magum-iet; oxem tumchea loka modem tumchean korum nozo.
4. Sorvespor tumkam dita tea ganvant to tumcher aplo axirvad ghaltolo.
5. Tumi taka khaltim ravxat ani aiz hanv tumkam formaitam titlem-i pallxat zalear, konnuch tumchê porjê modlo gorib zaunchona.
6. Sorvesporan tumkam bhasailam tê porim, to tumcher aplo axirvad ghaltolo. Tumi zaitea lokank usnnem ditoleat, punn konnach lagim usnnem magche nant; tumi zaitea lokancher podvi choloitoleat, punn konnuch tumchê voir ti cholounchona.
7. Tumkam Sorvespor ditolo tea ganvant, tumcho êk Israeli-bhav gorjek sampoddla zalear, taka mozôt korunk patthim sorum nakat.
8. Punn udar mona-kallzan goroz titlem-i taka diat.
9. Suttkechem voros lagim asa dekhun taka diunk patthim sorum nakat.' Oslim chintnam tumchea monant gheum nakat. Tumi taka dinant zalear, to Sorvesporak ulo martolo ani tumi guneanvkari zatoleat.
10. Udhar kallzan taka diat, ani Sorvespor soglleant tumcher axirvad ghaltolo.
11. Israel porjê, sodanch konn-na-konn gorjek sampddon astolo, tea pasot tumkam formaitam: udar kallzan diat.
12. Konnui Israel porjentlo, dadlo vô bail, apnnakuch chakôr koso vikit zalear, sôv vorsam chakri kelea uprant, taka suttka diunchi. Satvea vorsa,
13. to veta tedna, taka ritea hatamnim dhaddcho nhoi.
14. Punn Sorvesporan tumkam dilam tantlem, menddram, soro vô orov udar kallzan taka diat.
15. Tumi-i Ejiptant chakram zaun asleat, ani Sorvesporan tumkam thoinchim soddoun haddleant; heach pasot hanv tumkam ho hukum' ditam.
16. Punn tumcho chakôr tumkam ani tumchem kuttumb sôddunk sôdina, ani tumchê-xim ravunk sôdta zalear,
17. taka tumchea ghorachea dara-xim vhorcho ani tacho êk kan tôpcho; hê porim to sodankal tumcho chakôr zatolo. Tech porim chakornik korchem.
18. Punn, suttka gheun, to veta tedna tumchem tondd kallem korum nakat; tannem tôr, sôv vorsam, ordhea molak tumchi chakri kelea. Hea hukumak pallo diat, ani Sorvesporacho axirvad tumcher poddtolo.
19. Tumchea gorvam-menddrantlem malgoddem purus-por Sorvesporak kuxin dovrat: gorvank vavrak laum nakat, ani menddreachi-i lonv tasum nakat.
20. Dôr vorsa, Sorvesporachea fuddeant vhorun, tumi ani tumchea kuttumban tem khaunchem.
21. Punn taka kosli-i khôdd asot zalear, kudd'ddem vô thonttem, tem tumi Sorvesporak bhettounchem nhoi.
22. Hem tumchea ghorant khaum-iet. Konnaichean, xud'dh vô oxud'dh to zanv, tem khaum-iet, merum-chital khatat tê porim.
23. Punn tachem rogot khaunchem nhoi, tem udka porim zomnir votounchem.'
