1. Moizes, Devachea mon'xan, morchê adim, Israel porjek
2. hê porim axirvad dilo: Sorvespor Sinai Dongrar thaun ailo; suria porim to Edomacher udelo ani Paran Dongrar-thaun porjecher fanklo. Dha hozar dut tachea sangatak asle, ani tachea uzveak uzo bhogbhogtalo.
3. Sorvespor aplê porjecho mog korta ani je khas tache tankam to rakhta. Mhonnttôch, ami tachea paianr sorpott'tanv ani tachea formonnank pallo ditanv.
4. Moizesa udexim dil'lê Sumurtik khalte zatanv, hem amchê porjechem moladik daiz.
5. Sorvespor aplê porjecho patxai zalo jedna tichim kullam ani mukheli ekttovle.
6. Reubenachea kulla vixim, Moizesan mhollem: 'Reubenachem kull kednanch ontro-noiê, zori-i tachi sonsôt bhou lhan.'
7. Judachea kulla vixim Tannem mhollem: 'Sorvespora, adarak, tuka ulo martat tedna tankam kandi; Heram kullam sangata tankam porot ekttai. Tanchê khatir zhuz, Sorvespora, ani dusmanam virudh tankam mozôt kôr.'
8. Levichea kulla vixim tannem mhollem: 'Sorvespora-Deva, Urim' ani Thummim hanchê vorvim Levitank, tujea visvaxi sevokank, tuji khoxi dakhol kortai; Massa ganvant tunvem tanchi porikxa ghetlii.
9. Avoi-bapaik, bhavank, ani bhurgeank ravtat tea poros te tuka odik visvaxi ravle. Tannim tujea updesank pallo dilo ani Tuzo korar tãnnim samball'lo.
10. Tuji Sumurt pallunk te tujê porjek xikoitole; Tujea vedicher te bhettô kortole.
11. Sorvespora, tanchem mull vaddo-xem kôr; Te kortat titlem-i tuka mandum. Sorv tanchea dusmanank sokla ghal; Kednanch te porot voir sorum-noiê.'
12. Benjaminachea kulla vixim tannem mhollem: 'Sorvespor hea kullacho odik mog korta ani taka rakhta, ak'kho dis taka rakhun asa, ani tanchech modem to jieta.'
13. Juzechea kulla vixim tannem mhollem: 'Sorvespor, pavs dhaddun, tachea ganvar axirvad ghalum ani zomni pondak puskôll udok mellum.
14. Tanchea ganvant votanuch follam pikum, Kalla-kallachim follam, boreantlim borim, tankam mellum.
15. Tanche purvile porvot ruchik follamnim,
16. ani akhoch ganv borea vostumnim bhôrum. Sorvesporachem sogllem boreponn tancher poddum, Hulpotolea jhilkuttant-thaun uloitolea Sorvesporacho axirvad. Ho sorv axirvad Juzechea kullacher poddum, kiteak apleanch bhavam modem to zaun aslo mukheli.
17. Juzechem boll eka boilachem koxem Ran-paddeachim koxim tachim xingam. Hozaramnim Manassechi sonsôt, ani Efraimachi hozaranchea hozaramnim tachim xingam. Des-porzank to xingar kaddta, ani Sonvsarachê ximer porian tankam dhanvddaita.'
18. Zebulun ani Issakar hanchea kullam vixim tannem mhollem: 'Somdiram-voir Zebulunacho dhondo boro cholum ani Issakarachi girestkai ghorantuch thaun vaddum.
19. Porkea-lokak te dongrancher apoun haddtat ani favo teô bhettô thoim kortat. Tanchi girestkai somdirantli, ani degevelê renvechi.'
20. Gadachea kulla vixim tannem mhollem: 'Devak porkhonddat, kiteak tanchea ganvcheô ximô vaddoileô. Gad eka xinva porim ravta konnacho-i hat tôddun kaddunk, vô mathem pinzunk.
21. Boro to ganv tãnnim apnnakuch dovorlo; Mukheliak favo to vantto tankam tharailolo. Tannim Sorvesporache kaide ani hukum' pall'le Jedna Israelache mukheli ektthovl'le.'
22. Danachea kulla vixim tannem mhollem: 'Dan eka lhan xinva porim; Bashan thaun to uddki marta.'
23. Naftalichea kulla vixim tannem mhollem: 'Naftalicher Sorvesporacho bhorpur axirvad poddla; Galileiachea Tolleak thaun to dokhinnek pavta.'
24. Asherachea kulla vixim tannem mhollem: 'Heram kullam poros Asheracher ogllo axirvad asa. To aplea bhavank avddicho zaum, Tachea ganvant puskôll telachim zhaddam asum
25. Tachea xarank lokonddache kãxeache darvontte asum, ani to sodanch huskea-mekllo jieum.'
26. Israel porjê, tumchea Deva sarko dev na, dobajean to ontrollar bhonvta, kupam fôddun to tumchea adarak ieta.
27. Dev sodanch tumchi rakhonn korta; Tachea sasnnache bavlle tumcho dhir-alaxiro. Tumi tanch marit titlech tumchea dusmanank tannem dhanvddaile, ani tancho nas korat mhonn tumkam sanglem.
28. Tôr, Jakobachi sonsôt sovostkaien jieta, tachea ganvant puskôll orôv ani soro asa, mollbar thaun dôv gollta ani zomin ximpta.
29. Israel kitlim bhagi tumi! Tumchê itlo bhagi konn na, Sorvesporan samball'loli porza tumi! Sorvesporuch tumcho ddhal ani tumchi torvar, toch tumkam rakhta, ani zoit dita. Tumche dusman, porathun, kaklut magtole, punn tumi tankam paiam tolla maddoitoleat.
