1. Tumi Sorvesporachi porza. Mhonnttôch, mel'leanchem dukh kortat tedna, her porza kortat tê porim, tumchê kuddik ghai ghalum nakat, vô tumchem mathem fuddlean tasum nakat.
2. Tumi Sorvesporachim; prithumêver jietolea sorv porzam modlim, tumkam apli khas porza korunk tannem vinchun kaddleant.
3. Sorvesporan jem oxud'dh mhonn sangun dilam toslem kãich khaum nakat.
4. Tumchean khaum-iet: gorvam, menddram, bokddeô,
5. merum, ran-menddram, ranbokddeô, vô chital-sambhar,
6. eka utran, fanttlolim getam asat ani rovont kortat titlem-i tumchean khaum-iet.
7. Fanttlolim getam ani rovont-korop him donui rujvat kelea xivai tea zonavorachem mas khaunchem nhoi. Hea pasot, unttam, sonxe, ani oslem; him rovont kortat punn tankam fanttlolim gellam nant, dekhun tim oxud'dh.
8. Dukor khaum nakat; hankam fanttlolim getam asat punn rovont korinant, dekhun oxud'dh. Oslem kãich khaum nakat, ani zonavorachê mel'lê kuddik hat legun laum nakat.
9. Khovllam-pakhurlam aslolem nistem tumchean khaum-iet;
10. punn udkantlem-i zalear, pakhurlam-khovllam naslolem khaunchem nhoi; oslem sogllem oxud'dh.
11. Xud'dh suknnim-pakhram tumchean khaum-iet.
12. Ani tumchean khaum nozo tim him: ghonn, ghiddgim ani savlle;
13. natkam, kavlle, ani pogdde;
14. ghid, xamrok,
15. ani kensar;
16. bhokim,
17. bollar,
18. ani pakhe.
19. Pakotteanchem supurlem jivon chodd korun oxud'dh.
20. Punn xud'dh tem tumchean khaum-iet.
21. Apxinch morta tem zonavor tumi khaunchem nhoi. Punn tumchê modem jieta tea porkea lokachean tem khaum-iet, vô tumchean taka vikum-iet. Punn tumi Sorvespora Devachi, Povitr porza. 'Menddrea-bokddechem por avoichea dudant randchem nhoi.'
22. Tumchea xetant, vorsak, pikta tacho êk dhavo vantto kuxin kaddat.
23. Ani Sorvesporan vinchun kaddlolea man-nomoskarachea zagear vochun, thoim Sorvespora fuddeant tumchea orovacho, sorea-telacho dhavo vantto, ani gorvam-menddrantlo malgoddo khauncho. Sorvesporachea manak tumi oxem korunk zai.
24. Punn ho ekuch zago tumkam poisurta, dekhun tumcho dhavo vantto thoim vhorunk zaina zalear,
25. to tumcho vantto vikun kaddat, ani duddu melltat te vhorat.
26. Tumkam zai tem jevonn thoim gheiat, mas, soro vô dakam-ros, ani Sorvesporachea fuddeant, tumi ani tumchem kuttumb tem khaun sontosbhorit zaiat.
27. Tumchea ganvant jietat tea Levitank visrum nakat; tankam aplem bhatt-bens na. Dôr tin vorsank, tumchea pikacho dhavo vantto haddun xarant bhôrun dovrat.
28. Hem Levitanchea, porkea lokachea, bapui-ghov nasloleanchea faideak. Tumchea ganvant asat te thoim ietole ani goroz tem vhortole. Oxem korat, ani tumcho Sorvespor soglleant tumcher axirvad ghaltolo.'
