1. Tumchea peleachem gorum vô menddrum tumchê nodrê mukhar sutton veta zalear, taka toxench sôddun dium nakat; dhôrun taka dhonia-xim vhorat.
2. Punn tacho dhoni pois ravta, vô konn to tumi nokllot zalear, taka dhôrun tumchea ghora vhorat. Tacho dhoni sôdunk ietolo tedna taka tem diat.
3. Oxem eka gaddva-i vixim, vô vostra, vô kosle-i tujea peleachê sanddlolê vostu vixim korat.
4. Tumchea peleachem gaddum bhuim poddlam zalear, taka toxench sanddum nakat; zata zalear taka ubem korat.
5. Ostoreamnim dadleanchim, ani dadleamnim ostoreanchim vostram ghalchim nhoi; hacho Sorvesporak kanttallo ieta.
6. Eka zhaddar vô zomnir, ghontterant, aplea tantiancher vô pileancher boslolem ek suknnem mellot zalear, tea avoi-suknneak gheun vochum nakat.
7. Tumchean tea pileank vhorum-iet punn avoik vochum-di; hê porim tumkam auk melltolem ani tumi sukhest jietoleat.
8. Ek novem ghor bandtat tedna, patt'sak sorvbhonvtim grad ghalat; na tôr, konnui voir thaun poddun melo zalear tumi zobabddar zatoleat.
9. Tumcho dakancho mollo asa thoim dusrem kitench vompum lavum nakat. Na tôr, tumkam dakô toxem dusrem-i pik mona kel'lem astolem.
10. Boilak ani gaddvak ekach zotak bandum nakat.
11. Lonv ani kapus borabor vinnun vostram ghalum nakat.
12. Tumchea vostranchea charui konxeank gondde laiat.'
13. Somzum-ia: Êk monis eka cheddva kodde logn zalo, ani magir taka sôddunk sôdta.
14. Mhonnttôch, to cheddvacher oxem lochan ghalta, ki, logna-somoiar tachem ankvarponn bigoddlolem.
15. Oxem ghoddot tedna, tea cheddvache avoi-bapui, tanchê lognachê-ratichem chedor gheun, xarachê neai-sobhechea mukheleam mukhar ietolim ani aplem cheddum khorench ankvar aslem mhonn dakhoitolim.
16. Tea cheddvacho bapui tankam sangtolo, Hanvem hea mon'xak mhojem cheddum lognant dil'lem tedna tem ankvar aslem; punn atam hea mon'xak mhojem cheddum naka,
17. dekhun to tacher lochan ghalta, ki logna-somoiar tachem ankvarponn bhigoddlolem. Punn tanche lognachê-ratichem hem chedor polleiat, tacher rogtachim khotam asat.
18. Tedna xarache mukheli tea ghovak mar ghaltole.
19. Ani xembor rupeache-duddu farik korunk taka dondd ghaltole, ani he duddu tea cheddvachea bapaik ditole, kiteak tea mon'xan eka Israeli-cheddvacho man uboila.Tea bhair, tem cheddum sodankal tachi ghova-bail astolem, ani tachean taka kednanch logn-moddnneachem potr diunk zaina.
20. Punn ghov sangta tem khorem zalear, ani cheddvachean tem khatren nakarunk zaina,
21. tedna tea cheddvak bapaichea ghora-bhair vhorun, tea xarantle dadle taka fatraun martole. Tannem amchê porjê modem êk lojechi vost kelea: bapaichea ghorant astana, logna adim, tem dadlea lagim lingi-sombondh zôddla. Hê porim tumi tem noxtt pois kortoleat.
22. Dusreachê bailêkodde kuddi ekvott kortana konnui sampdsot zalear, dogaincho jiv kaddcho. Hech porim tem noxtt pois zatolem.
23. Somzum-ia: Xara bhitôr, konn-eklo, dusrea dadleakodde soirik zal'li asa tea cheddvakodde kuddicho ekvott kortana sampddot zalear,
24. tankam dogam-kui xara bhair vhorun fatraunchim. Tea cheddvak moronn favo, kiteak tem xarant aslem ani tachean bob marunk zatali punn tannem marlina. Ani tea dadleak moronn favo, kiteak tannem dusreachê hoklek boxttaili. Hê porim oslem noxtt tumchê modem pois zatolem.
25. Somzum-ia: Konn-eklo dusreachê hoklek, xara bhair vô khedde ganvant, toxem boll korta. Tedna fokot tea dadleak moronn favo.
26. Tea cheddvak kãich korchem nhoi, kiteak moronn favo toslem tannem kãich korunk na. Hem, konn-eklo dusreachea angar veta ani tacho jiv kaddta taka somor zata.
27. Hea mon'xan eksurea zagear, soirik zal'lea cheddvak boll kelem; cheddvan bob marli, punn konn tachea adarak ailona.
28. Somzum-ia: Konn-eklo, soirik zaunk naslolea cheddvak boll korta, tachê-xim nhidta ani sampoddta.
29. Hannem cheddvachea bapaik hoklechem mol, pon'nas rupeache-shekel farik korche, ani taka boxttailam dekhun tachê kodde logn zaunchem ani kednanch taka sôddchem nhoi.
30. Konnench, aplea bapaichê bailêkodde nhidun taka oslo okman korcho nhoi.'
