1. Êk andd chenchlolo vô ling kaplolo purus Sorvesporachê porjê bhair poddta.
2. Lognachea ekvotta bhair zolmol'lo, ani hachê sonstintlo dha pinddka legun Devachê porjê modem asum nozo.
3. Ammonit zanv Moabit, ani hanchê sonstintlo dha pinddka legun Sorvesporachê porjê modem asum nozo.
4. Tumi Ejiptantlim bhair sorun, vatter astana, tãnnim tumkam jevonn-pivonn dilem na, ani Mesopotamia-Pethor xarantlea Balaamak, Beorachea putak, tumcher xirap ghalunk baddeak lailo.
5. Punn Sorvesporan Ballamak kan dilo-na, ani taka tumcho mog aslo dekhun, xirapachê boldek tumkam axirvad dilo.
6. Tumchem raxttr aso-sor, hea des-porzanchea faidea-sukhak kãich korum nakat.
7. Edomitank kikont korum nakat, he tumche soire. ani Ejiptantlea lokak kikont korum nakat; tanchea desant eka kallar tumi jieleat.
8. Tisrê pinndkek zolmololeamnim Sorvesporachê porjê modem asum-iet.
9. Zhuza-kallar, tumchea tombu-moidanar, jem tumkam riti pormannem oxud'dh korit titlem-i tumi vattaunchem.
10. Ratchea vellar nhident konnui boxttovlo zalear, tannem moidana bhair vochun ravchem.
11. Sanjechea vellar tannem xudh'dhi korchi ani dis darer poddtana tachean porot moidanar ieum-iet.
12. Tumcheô donui soimbacheô gorzô korunk, moidana bhair êk zago asunk zai.
13. Hatiaram modem, tumchêkodde êk lhan khorem asunk zai, ani soimbachi goroz kelea uprant, zomnir ek khondd-kul marun dhampchem.
14. Tumchem moidan saf dovrat, kiteak tumcho Sorvespor tumchea sangata asta, tumkam samballunk ani dusmanam-voir zoit divunk. Tumchê-sorxilo koddsorta toslem tachea fuddeant kãich korum nakat.
15. Ek chakôr aplea dhonia-sorxilo pollun gelo ani tumchê-xim asor ghevunk ailo zalear, taka portum nakat.
16. Tachean khoinchea-i eka tumchea xarant jieum-iet, ani taka nibraien lekhum nakat.
17. Israel porjentlem konnuch, dadlo zanv bail, mondirant bhaddeak ravchim nhoi.
18. Ani hê porim duddu zôddlole, angovnn pallchê khatir, Sorvesporachea Mondirant haddche nhoi. Mondirant bhaddeak ravtat tankam Sorvespor vitteta.
19. Tumchea eka Israelit bhavak duddu, vô jevonn, vô koslich vost usnni ditat tedna tacho kolantor gheum nakat.
20. Punn porkea-lokak usnnem ditat tedna tacho tumchean kolantor gheum-iet, Israelacho nhoi. Hea hukumak khaltim zaiat, ani Sorvespor, tumkam dita tea ganvant aplo axirvad ghaltolo.
21. Tumi Sorvesporak angovnn kortat tedna, ti pallunk lamboum nakat. Sorvespora mukhar tumi tantle suttonant, ani ti pallich nastana urot zalear, tem ek patok.
22. Angovnn korina zalear patok na,
23. punn khoxê-monan kel'li angovnn ti magir pallunkuch zai.
24. Konnaichea molleantlean, tumchê vatten vetat tedna, tumkam zai titleô dakô thoincheô khaiat, punn panttlent ghalun teô ghora vhorum nakat.
25. Tech porim, konnaichea xetantlean cholun vetat tedna, tumchea hatant tôddun konnxeô-gotte tumchean khaum-iet; punn villean teô lunvum nakat.'
