1. Moab ganvant, Sorvesporan Sinai Dongrar kel'lo tea korara bhair Moizesa udexim, Sorvesporan Israel porjê kodde korar sthaplo.
2. Moizesan sogllê Israel porjek ektthaim korun tankam mhollem, 'Sorvesporan Ejiptantlea patxaiak, tachea opxalank, ani ak'khea desak kitem kelam tem tumcheach dolleamnim pollelam.
3. Tim bhirankull khorgam, ani Sorvesporan kelolim vismitam-koutukam tumi dekhleant.
4. Punn jem tumi dolleamnim dekhlem vô kanamnim aikolem tem gineanan somzun ghevunk, aiz pasun Sorvespora-Devan dilem na.
5. Challis vorsam tumkam tannem oronneantlean choloun vhelim, ani tumchim vostram ani pãiancheô vhannô zhoron pinzlim nant.
6. Tumchêkodde jevonn-khann naslem, ani pieunk soro vô dakancho rôs, punn Sorvespora Devan soglleô tumcheô gorzô keleô, hê porim to tumcho Sorvespor-Dev mhonn tumkam dakhol kelem.
7. Ani ami hea zagear pavleanv tedna, Heshbonacho Sihon Patxai ani Baxanacho Oga Patxai amchê virudh zhuzunk aile. Punn ami tanchê-voir zoit vhelem,
8. tancho ganv jikhun ghetlo ani to Reuben ani Gad hanchea kullam modem, ani Manassechea sovot-kulla modem vanttun dilo.
9. Tôr, hea korarant sthaplam titlemi-i visvasan samballat, ani soglleant tumkam bori suttka melltoli.
10. Aiz tumi Sorvespora tumchea Devachea fuddeant ubim asat, tumi, tumche mukheli ani opxal, tumche dadle,
11. bailô ani bhurgim, ani tumchê modem jieta (to porko-lôk, ani tumchim lankddam fôddtat ani tumkam udok haddun ditat te soglle.)
12. Sorvespor-Dev tumchêkodde korta to korar sthapun gheunk tumi hanga aiz ektthovleat,
13. ani tumi tachêkodde to mandun ghetôch, tumkam ani tumchea purvozank, Abrahamak, Izakak, ani Jakobak bhasailam tê porim, tumi apli khaxa porza ani apunn tumcho Dev mhonn porot tharaun ghetolo.
14. Ho, zo korar Sorvespor-Dev korta to tumchech kodde nhoi.
15. Punn hanga tachea fuddeant ektthovleanv tanchêkodde ani ozun zolmunk nant tê amchê sogllê sonsti kodde.
16. Ejiptant tumchem jivit koslem aslem tem monant haddat, ani dusrea des-porzanchea ganvantlean vochunk mhonnche kitem tem-i polleiat.
17. Kanttallo ieta tosleô tancheô lankddacheô, fatracheô, rupeacheô ani bhangaracheô murteô tumi dekhleat.
18. Konnuch tumchê modlo, dadlo zanv bail, kuttumb vô kull zanv, hanga ubim asat tantlo Sorvespora-Deva sorxilo koddsorun her des-porzanchea devank bhozum-noiê. Hem sorv vaittachem vikhallem-mull koxem zaunk pavtolem.
19. Hem sogllem aikota, toriastana apnnach bhitôr chintta ki apnnak zai toxem kelear kãich vaitt zaunchem na oxem somzota toslo hanga konnuch asum-noiê. Toxem zalear, borea ani vaittancho ekach farak nas kortolo.
20. Sorvespor oslea mon'xak bhogxichona; bogor tacho rag ujea porim tacher denvtolo, ani hea pustokant boroilolem asa tem sogllem nirbhag khas tachem zatolem.
21. Sorvespor taka ek nomunno koso sogllea Israelachea kullam mukhar dovortolo; ani hea korara vixim je soglle xirap Sorvesporachea xikounneanchea pustokant boroileat te tacher poddlole dakhol zatolem.
22. Fuddleô-ieuncheô pinnka, tumchi sonsôt ani aixilo-poixilo porko-lôk, Sorvespora-Devan tumchea ganvcher khasti-khorgam dhaddlim tim pollet astoleô.
23. Xetam padd zalolim, mitta-gondfan bhorlolim; thoim kãich kirlochem na, nonn'nni legun voir sorchina. Sodom ani Gomorra, Adma ani Zeboiim hea xaram porim, Sorvesporacho rag tancher uprason padd zalim têch porim tumcho-i ganv zatolo.
24. Sogllo sonvsar tedna vichartolo, Kitea pasot Sorvesporan tanchea ganvak oxem kelem? Tacho rag itlo fulonk koslem karonn tãnnim dilem?
25. Ani ho zobab melltolo, Tanchea purvozanchea Sorvespora-Devan, Ejiptantlim bhair kaddun haddlolim tedna, tanchêkodde kelolo korar tãnnim môddlo.
26. Adim kednanch bhôzunk naslim, ani Sorvesporan tankam mona kel'lem tea devank tim bhozlim.
27. Hea khatir Sorvespor-Dev aplê porjecher ragar zalo ani hea pustokant boroil'lem tem nirbhag tancher dhaddlem.
28. Tanchea khaxa ganvantlim tankam bhair kaddlim, ani porkea desamnim tankam ximpddailim, ani ozun pasun tim thoim asat.
29. Sorvespora amchea Devan zaiteô vostu gupit dovorleat; punn apli Sumurt tannem ukti korun dilea; ani ami ani amchê sonstin sodankal ti samballunk zai.'
