1. Porjê kodde uloun Moizesan mhollem, 'Sorvesporan, tujea Devan jeô adnia, vidhi, ani riti tuka xikounk mhaka kaido ghala, teô heô: tujea tabeant tum korunk vetai tea desant tunvem teô samballunk zai.
2. Sorvespora tujea Devachi bhirant dhôr, ani hanv tuka formaitam te Tache kaide ani adnia sogllea tujea jivitant samball- tum, tuzo put ani tujea putacho put; oxem tumi lamb auk jieunk pavtoleat.
3. Israela, tim aik ani zotnaien samball; hê bhaxen tum sukhest zatoloi ani tuji sonsôt mhonv ani dud vhanvtolea desant vaddtoli: oxench Sorvesporan, tujea purvozanchea Devan, tuka bhasailam.
4. Israela, aik, Sorvespor amcho Dev ekloch Sorvespor.
5. Sogllea tujea kallzan, sogllea tujea otmean, sogllea tujea bollan Sorvespora tujea Devacho tum môg kortoloi.
6. Ani aichea disa hanv tuka formaitam tim utram tujea kallzant khonchoun dovor.
7. Ani ghorant visôv ghetana; bhair-bhitôr sortana, nhidtana ani utthtana him utram tujea bhurgeank xikoitoloi ani tanchi khobor bhonvn-bhonvn kortoloi.
8. Tim utram tum tujea hatak khunna koxi bandtoloi ani tujea kopalar ek kopel koxem ghaltoloi;
9. tujea ghorachea daranchea kovddancher ani darvontteancher tim tum boroun dovortoloi.
10. Zo dês Apunn tumkam ditolo mhonn Sorvesporan tumchea purvozank Abrahamak, Izakak ani Jakobak soput gheun bhasail'lem, tea desant To tumkam bhitôr kaddtolo tedna, thoim tumi bandunk naslolim vhodd ani grest xaram,
11. tumi bhôrunk naslolim borea-borea vostumnim bhòrlolim ghoram, tumi marunk nasloleô bãiô, tumi lavunk naslole zoitunanche molle ani follam tumkam melltolim ani him follam khaun tumi dhadoxi zatoleat;
12. tedna chotrai dhôrat ani Zannem tumkam Ejipt desantlim, gulamponnachea ghorantlim, bhair kaddleant tea Sorvesporak visrum nakat.
13. Sorvespora tumchea Devachi tumi bhem dhôrtoleat, Tachi seva kortoleat ani Tachea Nanvan soput ghetoleat.'
14. Tumi jietat thoinchea lokanchea devank bhôzum nakat.
15. Dusrea devanchi seva-puja korxat zalear, Sorvesporacho rag, ujea porim, tumcher uprastolo ani tumcho nas kortolo, kiteak Sorvespor, tumcho Dev, apnnak virodhi mandun ghena.
16. Massa ganvant tumi kel'lem tê porim, Sorvesporachi porikxa gheum nakat.
17. Tannem tumkam dileat te soglle kaide visvasan pallat.
18. Sorvespor jem kitem nitt ani borem mhonntta titlench tumi korat, ani sogllem tumchem borem zatolem.Tumchea purvozank bhasailolo ganv tumi tumchea tabeant kortoleant,
19. ani Tannench bhasailam tea pormannem tumchea dusmanank bhair ghaltoleat.'
20. Ieunchea kallar, tumchim bhurgim vicharit tedna, 'Sorvesporan hea sogllea kaideank pallo diunk amkam kiteak formailam?'
21. Tedna tankam oxem sangat, 'Ejiptantlea patxaiache ami gulam' asleanv, ani Sorvesporan aplea podvedar bollan amkam nivarleant.
22. Tannem vhodd vismitam adarlolim, ani Ejiptantlea lokak ani tanchea patxaiak ani opxalank bhirankull koutukam kelolim amcheanch dolleamnim ami pollelem.
23. Amchea purvozank bhasailolem tea pormannem, amkam ho ganv diunchê khatir tannem amkam Ejiptantlim nivarleant.
24. Uprant, hea tachea kaideank khaltim zaunk ani taka man divunk Sorvesporan amkam formailam.
25. Oxem ami kelear, amchê des-porjechi zoton korun astoleanv, ani ti sukhest jietoli. Sorvespor amkam formaita titleakui ami visvasan pallo dium zalear, ami taka mandtoleanv. '
