1. Uprant, Sorvesporan mhaka mhollem, 'Poileam sarkeô don fatracheô laddiô katrun teô eka lankddachea pettlant ghal. Ani voir dongrar ie,
2. hanv tancher zoxem poileancher ani tunvem fôddleai tancher boroil'lem toxench boroun ditam; ani tum teô Pettlant ghal.'
3. Mhonnttôch hanvem Kensrichea lankddachem ek Pettul kelem, ani poileam sarkeô don fatracheô ladiô katôrleô ani teô ghevun hanv voir dongrar gelom.
4. Sorvesporan poilê pavtt boroilolim tinch utram hancherui boroilim: Dha Updes; tumi dongra-xim ektthovl'leat, ani ujeant thaun uloun tannem tumkam dil'le te. Uprant Sorvesporan mhaka heô ladiô dileô,
5. ani hanv thoincho sokla denvun ailom. Magir, Sorvesporan formailolem tea pormannem, teô ladiô Korarachea Pettlant dovorleô, ani ozun porian teô thoim asat.'
6. ('Israel porza, Bene Jaakan porjecheô baieom asleô thoinchi bhair sorun, Noserak geli. Hanga Aaron melo ani taka purlo. Ani tacho put Eleazar tachea zagear iadnikachê zhuttiek pavlo.
7. Thoim thaun tim Gudgodah gelim, ani hanga thaun Jotbatha, hanga zaitem udok aslem.
8. Sorvesporachea Korarachi Arkpett vhorunk, Sorvespora mukhar ravun Tachi seva korunk ani Tachea Nanvan aiz porian axirvad ghalunk, Sorvesporan Levichê kulliek tedna vinchun kaddun dovorli.
9. Heach khatir aplea bhavam borabor Levik grestkaiecho vantto na, daiz na. Sorvespora tumchea Devan bhasail'lem toxem, Sorvespor tachem daiz.)
10. Poilê pavtti ravlolom tech porim atam-i challis dis ani rati hanv dongrar ravlom. Sorvesporan mhojea magnneak kan dilo, ani tumcho nas korina zaunk to xekim kobul zalo.
11. Tedna, mhaka vochunk hukum' dilo, ani purvozank bhasailolea ganvant tumkam vhor mhonn mhaka sanglem.'
12. Israela, atam Sorvespor tuzo Dev tujê lagim kitem magta? Magta tem itlench: Sorvespora tujea Devachem tunvem bhem dhôrchem, Tachea rosteamnim cholchem, Tacho môg korcho, sogllea tujea otmean Sorvespora tujea Devachi seva korchi,
13. tujea boreponnak hanv tuka aiz ditam te tujea Sorvespora Devache kaide ani nem' pallche.
14. Polle, sôrg ani sorgancho sôrg, prithum' ani tantum asa titlem-i Sorvespora tujea Devachem;
15. tori moga khatir tujea purvozancher Tachem kalliz aslem ani tanchê pattlean tanchê sonstik ani aicho dis porian tumkam-i sogllea raxttrantlim Tannem vinchun kaddlim.
16. Mhonnttôch tumchea kallzanchi sunôt korat ani hea fuddem apleach vadeachim zaum nakat.
17. Kiteak Sorvespor tumcho Dev mhollear devancho Dev, dhoniancho Dhoni, vorto, bollixtt ani bhirankull Dev; To mon'xanchim tonddam pollena, lônch-ui ghena.
18. Onathank ani vidvank To nit melloxi korta, porkeacho To môg korta ani taka jevunk-pangrunk dita.
19. Tôr porkeacho-i môg korat, kiteak Ejiptachea desant tumi-i porkim asleat.
20. Sorvespora tujea Devachem tum bhem dhôrtoloi; Tachi seva kortoloi; Takach chikttun ravtoloi; Tachea Nanvan tum soput ghetoloi:
21. Takach tunvem vakhannunk zai, Toch tuzo Dev: tujea khaxa dolleamnim pollelleô edeô vhodd ani ojapancheô vostu Tannem tujê khatir keleat;
22. ani tuje purvoz Ejiptant gel'le tedna te sotoruch asle tori, Sorvespora tujea Devan tuka ontralla veleam noketram itlo vaddoila.'
