1. Zo dês tumi tumchea tabeant gheuncho asat, thoim Sorvespor, tumcho Dev, tumkam vhortolo, ani thoinchea zaitea raxttrank bhair ghaltolo. Tumi fuddem tanch martat tea pormannem, tumchea poros vhoddlea ani bollixt sat porzank dhanvddaitolo: Hittit, Girgashit, Amorit, Kanaanit, Perizzit, Hivit, ani Jebuzit.
2. Tumcho Sorvespor hea raxttrank tumchea hatant sôddun ditolo; tancher tumi zoit vhortat tedna tankam soglleank tumi marun uddounk zai. Tanchê kodde tumi koblat korunk favona, vô koslich kaklut tankam dakhounk favona.
3. Tanchê kodde tumi logn zaunchem nhoi, ani tumchea bhurgeankui logn zaunk diunchem nhoi;
4. na tôr, tumchea bhurgeank tim Sorvespora sorlim pois kortolim ani tumi tanchea kuddea devank bhôzunk pavtoleat. Toxem zait zalear, Sorvespor tumcher ragar zatolo ani tumkam nanch korun sôddtolo.
5. Mhonnttôch, tancheô vedi nikllaiat, tanche fatrache khambe môddun uddoiat, tancheô Ashera-devicheô kuru-khunna katrun-pinzun sôddat ani tancheô murteô hulpaiat.
6. Tumi tumchea Sorvespora Devak sonvskarloli porza; prithumechea sogllea porzam modlim tumkam Sorvesporan Aplem daiz korunk vinchun kaddleant.
7. Sorvesporan tumcher Aplem kalliz dovorlam ani tumkam vinchun kaddleant: her porzam poros tumi sonkien chodd mhonn nhoi, kiteak sogllea porzam poros tumi sonkien ekdom' thoddim asleat;
8. punn Tannem tumcho môg kelo dekhun ani tumchea purvileank dil'lo soput pallchê khatir Sorvesporan Aplea bollixtt bavllean tumkam bhair kaddleant ani gulam'ponnachea ghorantlim, Ejiptachea raza Faraohchea hatantlim, tumkam soddoileant.
9. Sorvespor tumcho Dev khoroch Dev mhonn vollkhun gheiat; To visvaxi Dev ani Aplo korar To samballta ani Tacho môg kortolea ani Tacheô adnia samballtolea hozar pinddkank To Aplem bholeponn dakhoita,
10. punn Aplo dvês kortoleank tanchea jivitantuch khast laita. Aplo dvês dhôrtoleacho nas korunk To pattim sorona; tacheach jivitant tacher khast dhaddta.
11. Mhonnttôch aiz hanv tumkam ditam teô adnia, hukum' ani kaide tumi pallunk zai.
12. He updes kanar gheun tumi te pallxat zalear, Apnnem kell'lo korar Sorvespor sodanch samballtolo, ani tumchea purvozank bhas dilea tê porim tumkam mogan lekhtolo.
13. Tumcho mog kortolo ani tumcher axirvad ghaltolo, ani tumi choddun vaddun vetoleat, ani zaitim bhurgim tumkam ditolo; tumchea xetancher axirvad ghaltolo, ani zaito orôv, soro ani tel utpon zatolim; tumchea gorvam-menddrancher axirvad poddun tim vaddtolim. Tumchea purvozank diunk bhasailolea tea desant ho axirvad tumcher poddtolo.
14. Tumcher poddta titlo subham' axirvad anink konnacheruch sonvsarant poddchona. Tumi zanv tumchim gorvam-vasram folla viret urchim nant.
15. Sorvespor tumkam piddê-mekllim dovortolo, ani Ejiptant tumi dekhleat tosleô bhirankull pidda tumcher ieuncheô nant, punn teô tumchea dusmanank lagtoleô.
16. Sorvespor tumchea hatant sôddta tea sorv des-porzancho bhosm korat, ani koslich kaklut tankam dakhoum nakat. Tanchea devank bhôzum nakat, na tôr, tumcher odruxtt ietolem.
17. ' Heô porza amchê poros zaiteô oglleô, dekhun tankam amchean bhair ghalunk zaunchem na' oxem tumchêch bhitôr chintum nakat.
18. Tankam tumi bhieum nakat; Sorvesporan Ejiptantlea patxaiak ani tachê porjek kitem kelem tem monant dhôrat.
19. Koslim vignam tancher dhaddlim, vismitam ani koutukam ani, xekim, sogllea aplea bollan Sorvesporan tumkam Ejiptantlim soddoilim tem monant haddat. Ejiptantlea lokachem boll môddlem tech porim atam, tumi bhietat tea lokakui kortolo.
20. Tanchea kallzant bhirant rigoitolo, ani konn pollun vetat vô lipunk sôdtat tankam nanch kortolo.
21. Tôr, hea lokak tumi bhieum nakat. Sorvespor tumchea sangatak asa; to thôr Dev, ani soglleak bhirant rigoita toslo.
22. Tumi fuddem tanch martat teach mapan to tankam ttikê-ttikê bhair kaddtolo. Ekach farak tumchean tankam bhair ghalunk zaina, kiteak sott-korn te bhair gelear ganvant ran'votti mon'zati choddtoleô ani hanchi tumkam odik bhirant.
23. Punn Sorvespor tumchea dusmanank tumchea hatant sôddtolo ani tanchea kallzant bhirant rigoitolo, ani ileô-ileô teô nopoit zatoleô.
24. Tanchea patxaiank tumchea hatant sôddtolo. Tumi tankam martoleat, ani tancher visôr poddtoli. Konnachean tumkam addaunk zaunchem na; soglleancho tumi bhosm kortoleat.
25. Tancheô murteô hulpaiat.Tanchem rupem-bhangar asa tem axeum nakat, ani tumkam vhorum nakat. Toxem kelear tumcher odruxtt ietolem, kiteak Sorvespor murti pujek vitteta.
26. Heô murteô tumchea ghorant haddum nakat, kiteak tancher xirap asa to tumcher poddtolo. Hea murteank vitteun tumi kikont korunk zai kiteak Sorvesporan tancher xirap ghala.'
