1. 'Tumi bhôzunk nant tê porim, vô tea devank bhozchea khatir, ghoddiê êk provadi ani sopon-parkhi tumkam vismit-koutukam korun dakhounk sodit. Ani tannem toxem kelem-i zalear, tumi fosum nakat.
3. Tachê udexim Sorvespor tumchi porikxa gheta: sogllea tumchea kallzan tacho mog kortat zalear tumkam topasta. Sorvesporak man diat ani taka visvaxi ravat.
4. Taka khaltim zaiat, tache updes pallat, ani takach-ekleak bhozat.
5. Tumkam Ejiptantlea gulam'ponnantlim soddoileant tea Sorvesporacher kolpunk fuslaita tea provadiacho vô sopon-parkheacho jiv kaddat. Ho êk khotto monis, ani Sorvesporan tumkam hukum' dileat te pallche tumkam pois korunk sôdta. Hea noxttantlim tumi suttcheak, tacho jiv kaddunk zai.
6. Ghoddiê, tumcho êk bhav vô put, vô dhuv, vô bail, vô tumcho lagxilo soiro vô ixtt tumkam ogech dusrea devank, tumi zanv tumche purvoz kednanch bhôzunk nant tea devank bhôzunk budh-xikounn diit.
7. Sorv-bhonvtonnchea vô poixilea devanchi seva-puza' korchê vixim tumkam sangot,
8. konnui to zanv, tachem aikum nakat, doia-kaklut nastana
9. tacho jiv kaddat! Tacher tumcho fatôr soglleam poilo poddum-di, magir herancho.
10. Taka fatraun marcho! Ejiptant tumi chakor-gulam' asleat tantle tumkam sôddoileat tea Sorvesporachea moga-sevechê to tumkam pois korunk sôdtalo.
11. Hem sogllem Israel-porjechea kanar poddlea uprant, tanchea kallzant bhirant rigtoli ani magir toxem korunk konnuch fuddem sorchona.
12. Dev tumkam ditolo tea xaramnim jietoleat tedna, konn tea-i eka xarantlea, soirann-naslolea mon'xamnim
13. thoinchea lokak fuslaun 'dusrea devank bhôzunk' pavoileat mhonn aikoxat zalear,
14. hea vixim barkaien choukoxi korat, ani toxem khorench ghoddlam zalear,
15. thoinchea sogllea lokacho ani her soglleacho jiv kaddat. Tem xar sogllem padd korun sôddat.
16. Magir, thoinchea lokachem samonn vô kitem aslem titlem-i moidan-chouker vhorun hulpaiat ani xarakui uzo ghalat. Hi zaun astoli Sorvesporak êk hulpailoli bhett. Ani hem ghortthan sodankal asum-di, tem xar porot kednanch bandchem nhoi.
17. Ani lhasun uddounk zai tantlem tumkam kãich dovrum nakat, tednanch Sorvesporacho rag nivtolo, ani tumchê sovem kaklut dakhoitolo, ani tumchea purvozank bhasailam tê porim, tumchi sonsôt vaddoun êk vhodd porza kortolo
18. punn hanv aiz tumkam ditam te soglle kaide samballun, tachi khoxi korunk favo.'
