1. Magir, ami ut'torêk geleanv, Bashah ganva-vatten ani Og Patxai, Edrei xara-xim, sogllea aplea mon'xank gheun amcher zhuzunk ailo.
2. Punn Sorvesporan mhaka mhollem, 'Taka bhieum naka. Taka, tachea mon'xank, ani sogllo tacho ganv tumchea hatant sôddtam. Sihon, Amoritanchea patxaiak, Heshbon thaun raj choloitalo taka kelãi toxench haka-i kôr.'
3. Tôr, Sorvesporan Og-Patxaiak ani tachê porjek amchea bollixt hatant sôddlim, ani ami soglleancho jiv kaddlo.
4. Ami sogllim tanchim xaram jikhun ghetlim, ekui urlem na, sogllim mhunnon satt- Akhok Argobacho prant, zoim Bashanacho Og Patxai raj choloitalo.
5. Him tachim xaram, unch-unch durgam, darvontte ani hankam addambe ghalun, kottam porim ghott kel'lim; punn hanchê bhair, durgam viret khedde-ganv asle.
6. Sogllo ganv ami padd kelo, dadleank, bailank ani bhurgeank marun uddoilim, Heshbonachea patxaiak kel'lem tech porim.
7. Tanchim gorvam-vasram ami vhelim, ani ganv luttlo.
8. Hea dogam-i Amorit patxaiam-sun, Jordan Nodichê udentek urta to ganv, Arnon Nodi thaun Hermon Dongor porian ami tanchêkoddcho ghetlo.
9. (Hermon Dongrak Sidonacho lôk Sirion mhonnttat, ani Amorit-lôk Senir mhonnttat.)
10. Bashanachea Og Patxaiacho sogllo ganv ami ghetlo: unch moidanar bandlolim xaram, Gileadache ganv, ani Bashanachê udentê vatten Saleka ani Edrei xaram.
11. (Og Patxai Refaimacho nimanno zaun aslo. Tacho fondd, tanchi chal asli tea pormannem, sogllo fatracho, char hat rund ani unno-so nov hat lamb. To ozunui thoim asa Ammonitanchea Rabbah xarant.)
12. Ganv tabeant ghetlea uprant, Aroer xarachê ut'torek urta to ganv, Arnon Nodi-xim, ani Gileadacho dongri ganv ani bakichim xaram hanvem Reubenachea ani Gadachea kullank diun kaddlim.
13. Manassechea ord-kullak urlolem Gilead ani Og Patxaiacho sogllo Baxanacho ganv, mhunnche, Argobacho ak'kho prant. (Bashan, Dusrea nanvan taka Refaim mhunnot.
14. Manassechea kullantlea Jairan ak'kho Argobacho prant, mhonnche, Bashan jikhun ghetlo, Geshur ani Maaka hanchi xim 'porian. Ani tea ganvank tannem aplem nanv dilem, ani aiz legun tankam Jairache gram mhonnttat.)
15. Manassechea kullachea Makirachea dôr-eka kullak hanvem Gilead dilem.
16. Ani Reuben ani Gad hanchea kullank Gilead thaun Arnon porian ganv dile. Nodichea maza-sumarak tanchi dokhinn xim' urtali, ani ut'torêk Jabbok Nôd, hicho êk bhag Ammonitanchê ximek.
17. Ostomtê-vatten Jordan Nodik tenktali, ut'torêchê vatten Galileachea Tolleak, ani Mell'lo Doria porian dokhinnek, ani Pisga Dongôr udentek.
18. Teach borabor hanvem tankam hi xikounn dili: 'Sorvesporan tumkam ho, Jordanachê udentek ganv dila. Atam tumchea zhuzari-lokak gheun, Israel porjê mukhar Jordanachê poltoddi vochat, ani ganv zhuzun gheunk tankam adar diat.
19. Tumchim bail-bhurgim, ani tumchim gorvam-vasram hanga, tumkam dila tea ganvant dovortoleat tumchê-kodde zaitim zonavoram asat mhonn zannom.
20. Tumchea Israel-bhavank, Sorvespor tankam Jordanachê ostomtek dita te ganv tumchea tabeant korunk adar diat. Ho vavr tharear poddtôch, ani sogllem xant zalea uprant, tumkam dila tea ganvant tumchean porot ieunk zatolem.'
21. Magir, hanvem Joshuak sanglem, 'Sorvesporan tea dogam patxaiank, Sihon ani Og, kitem kelam tem dekhlaim; toxench to, tumi vetat tea sogllea ganvamnim kortolo.
22. Tankam tumi bhieum nakat, kiteak Sorvespor tumcho Dev tumchê khatir zhuztolo.'
23. Tea somoiar, hanvem prarthon kelem,
24. Sorvespora Deva, Tuvem Tujem vhoddponn ani tuji xokti Tujea sevokak dakhounk suru kelea. Tunvem keleaim toslim vismitam kortolo, sorgar zanv sonvsarant anink Dev na!
25. Tôr, Sorvespora, Jordan Nodi poltoddi vochun, mhaka to sufôll ganv polleum-di, te sobit dongri-ganv ani Lebanonache dongor!'
26. Punn tumchea dhorman Sorvespor mhojer ragar zalo, ani mhojem aikoch na zalo. Voilean, Tannem mhaka mhollem, 'Titlem puro! Hea vixim mhaka tuji gozaluch naka!
27. Voir, Pisga Dongrachea mathear voch, ani charui vatten nodor mar: ut'tôr, dokhinn, udent, ani ostont. Ani dista titlem-i barkaien polle, kiteak tum Jordana poltoddi pavchoch naim.
28. Ani polletai tea pormannem, Joshuak sarki xikounn di ani taka mozbut kôr, kiteak to, polletai to ganv aplea tabeant korunk porjek vhortolo!'
29. Tôr, ami Beth-Peor xara samkar, gholant thikann kelem.'
