1. Zannvai ulo marta ki na? Sosnnikai aplo tallo voir kaddtta, nhoi?
2. Voir thaun rosteacher nodor poddpi zageacher, char vatter ti zago gheta;
3. Akaddeakodden, xaranchea mukhel darvonttea-xim, ani rosteanchea nakeancher ti aroddtta,
4. Sogllea lokamnô! Hanv tumkam ulo martam, Mhojim utram hanv sogllea mon'xakullak porgôtt'ttam.
5. Bholeamnô! Koxê toren vagunk zaitem xikat, Pixeamnô! Tumi soiranant ieiat.
6. Aikat hanvem tumkam kitem mhotvachem sangpachem asam, Hanv uloitam tedna mhojim utram khorim.
7. Mhojem tondd sot porgôtt korta, kiteak, vaittak mhoje vontt vittetat.
8. Mhojea tonddantlim sogllim utram sorôll, nitt thoim kãich fottkirem na,
9. Somzotoleak sogllem soroll, ani zannvai apnnaitoleak sogllem nitt.
10. Rupea svater mhoji xist, ani zhogzhogtolea bhangara poros mhoji vollokh mandun ghe.
11. Kiteak, zannvai thikam poros odik moladik, ani tichê poros axeupa sarkhem kãich vortem na.
12. Hanv zannvai Somjikaiê vangdda ravtam, Hanv chintpachê kolechi dhonin. (Sorvpodvedarachi bhirant mhollear vaittacho dvês).
13. Gorvachi ani khorkhosponnachi, vaittovê vagnnukechi ani fottkirê jibechi mhaka vitt ieta.
14. Hanv mhollear bori bud ani somjikai, toxench somzun gheupachi tank ani boll mhoji xokti!
15. Mhojê suchovnnen raza raj choloitat toxech rajkunvor nitt tem jahir kortat;
16. Mhojea margdorxonan des choloupi raj choloitat, Toxech unch kullieche monis ani kaideaxir odhikari vaur kortat.
17. Mhozo mog kortat tancho hanv mog kortam, mhaka axeun sôdtoleank hanv melltam.
18. Togtoli dovlot ani nit, mhojê thaim asa.
19. Hanv ditam tem foll, zhogzhogtolea bhangara poros odik moladik, Mhojem utpon osol rupea poros borem.
20. Hanv promannikponnanchea rostean ani nitichê vattentlean choltam,
21. Mhojea ixttank grest kortam ani tancheô tizoreô bhanddaran bhortam.
22. Apleô ievzonneô suru kortana, soglleô vostu rochchê adim, Sorvesporan mhaka rochlea.
23. Survatek thaun, prithum' rochon ieunchê adim, Kallam-iugam thaun hanv thir aslim.
24. Somdir ozun naslo, ghosghoxit udkacheô zhori, ozun futtunk nasleô, punn hanv zolmololim.
25. Porvot bosounchê adim, dongor ghôddchê adim, hanv zolmak ailim.
26. Tannem zomin ani moidan, ani sonvsarache dhulliche, poile dhatu korchê adim hanv zolmolim.
27. Tannem ontrall thirailem tedna, hanv thoim aslim, Jedna Tannem somdirak atto ghalo,
28. ani voilim kupam zomoilim, ani somdiracheô zhori futto-xeô keleô,
29. jedna doriak ximô ghaleô ani ximam bhair vochona zaunk formailem ani prithumechi buniad ghali,
30. tedna, eka huxar vostada porim, hanv Tachea sangata aslim. Dispottim Taka sontosbhorit kortalim, sogllo vêll Tachê mukhar khelltalim,
31. Tannem rochlolea sonvsarant khelltalim, mon'xanchea putam-dhuvam modem asunk, hanv murgott'talim.'
32. Atam mhojea bhurgeamnô, mhojem aikat. Mhojeô adnia palltat te bhagi.
33. Xittkavnneô aikat ani xannim zaiat, Teô nakari nakat.
34. Zo konn mhojem aikota, ani dispott'tto mhojea darvonttear paro korun ravta to axirvad poddlolo.
35. Kiteak, hanv melltam taka jivit mellta, Ani to Sorvesporachi kurpa melloita;
36. Punn, zo konn mhoji beporva korta to apnnakuch dukhoita, Je konn mhojer kolpotat te soglle mornnacho mog kortat.'
