1. Tuka vhoddllea mon'xam borabor jevnnak bosoilear, tujea fuddean kitem asam tacher chotraien loksh dovor;
2. Tuka zaitem jevpachi khoxi aslearui tuji jib damun dovor.
3. Tachea jevnnachi axa korinaka, Kiteak, tim jevnnam fosovnnechim.
4. Girest zaunk fugar zaum nakai,Tem tujea monantlem bhair uddoi.
5. Tuka mellunk xokonant, tea dovlotincher nodor ghalunaka kiteak, ghonni bhaxen tankam pakhotte futt'tole ani teô ontrollant uddun vetoleô.
6. Chamtteachea vangdda jevinaka, Ani tachea jevnnachi axa korinaka.
7. Kiteak, to fokot svota apnnachench chint'ta: To tuka 'io ani jev' mhunnttolo, Punn tachem kalliz tujê vatten na.
8. Tum jevlolim jevnnam vonkhtoloi Ani tujim borim utram ibaddttoloi.
9. Pixea-thaim uloinaka, Tujea utranchi taka somzonni mellchina.
10. Adlea ximank hat lainaka, ani onathanchê zomnint bhitôr soronaka,
11. Kiteak, tancho Rochnnar Sorvpodvedar, ani To tanchea vordan, tujer add rakhonn kortolo.
12. Tujem mon xikxonnacher ani tuje kan zannvaiecher dovor.
13. Bhurgeak xist xikovpak fatti soronaka, tunvem taka boddien marlear to morchona.
14. Tunvem taka vellar boddien marlear, tacho atmo patallantlo vattaitolo.
15. Mhojea puta, zôr tujem kalliz xannem tôr mhojem kalliz tujea vixim khoxi zatolem,
16. Jedna tujea vonttantlean promannik utram bhair sortat tedna mhojeô zalliô anondbhorit zatoleô.
17. Mhojea puta, Patkeanchi kun'nattai korinaka punn, Sorvesporachê bhirantin sodanch thir rav;
18. Kiteak khorench tuka boro fuddar astolo, ani tuzo bhorvanso bigoddchona.
19. Aik mhojea puta ani xanno za, ani tuzo atmo nitt rostean vhor.
20. Sodanch soro pietat ani gilltat tosleancho sangat dhôrinaka;
21. Kiteak bebdo ani pottio gorib zatolo, ani bontram nhesunk tuka vêll lagchona.
22. Tuka zolm ditolea bapaichem aik, Tichea mhatarponnar tujê avoik kikont korinaka.
23. Kedeai molan sot melloi. Tem viki naka Zannvai, xist ani ginean melloi.
24. Promannikacho bapui khoxen uddtta, Zo eka promannik putak zolmak haddta, taka to put dhadoskai haddtta.
25. Tuzo avoi-bapui khoxi zatolim, tuka zolmak haddtoleak tum dhadoxi kôr.
26. Puta, tujem kalliz mhaka di, Ani tujea dolleank mhoje roste samballum-di:
27. Karann, êk xindull ostori êk fondd koso, Ani dusreachi bail êk oxir baim koxi.
28. Eka chora bhaxen ti ravta, ani mon'xam modlea kaido moddpeancho ank vaddoita.
29. Konn dukhi asa? Konn pinrgota? Konn loddai-zhogddim korta? Konn khast favo korta? Konn gorjê bhair ghaiall zata? Konnache dolle tambdde zaleat?
30. Je zaito vêll soro pietat, aplo vêll bebdikaiek vogddaitat. tankam nhoi tôr konnak?
31. Soro kitlo tambddo zata, kopan koso chokmokta, kitlê suddsuddaien to tujea pottan dhanvta tem pollenaka!
32. Okherek to sorpa bhaxen chabta, ani eka naga bhaxen aplem vikh posraita.
33. Tuje dolle vichitr vostu polletole, Naka zalolim vankddim utram tum uloitoloi.
34. Ani tum modem somdirant nhidlolea mon'xa vori, vô eka tufanant sampoddlolea tarvottea bhaxen zatolo.
35. Tumi mhonnttolim, 'Tãnnim mhaka thapttailo? Punn mhaka dukhonk na! Tannim mhaka boddoilo? Punn mhaka kollunk na. Hanv kedna zago zatolom? Pieunk mhaka anink soro magunk zai!'
