1. Zo xiddkailea uprantui apli man nibor korun beporva korta tacho ilaz korunk zaina aslolem okosmat nisontton zatolem.
2. Promannik monis vaddtat tedna porza khoxi zata; Noxtte raz choloitat tedna, porza porvonta.
3. Zannvaiecho monis aplea bapaik dhadoxi korta, Punn, porduvarincho askari apli girestkai vogddaita.
4. Niti udexim raza aplea desak thirponn dita, Bexttavun kaddun gheupi, tea desachem nisonntton korta.
5. Zo aplea sangateank funslaita to tanchea pavlam pondak ek zall ghalta.
6. Vaittoveachea patkant fas asta, Punn, promannik khoxen nachta ani khoxi zata.
7. Promannik osoktache prosn somzota, Punn, noxtteak te somzunk kopxi nasta.
8. Kuskuttavpi monis xarant bondd uskaita, Punn, xannom rag nivoita.
9. Zôr konnuim xannom pixea kodden bhasabhas korta, Tôr to rag ani boro vinodui ekech bhaxen ibaddtolo.
10. Rogtak tanelolo promannikak zollta, Punn promannik jivit samballta.
11. Êk piso, aplea kallzant asa titloi rag ekech pavtti rokhoita, Punn, xannom takit korina, fuddarak samballta.
12. Zôr ek raza fottingponn aikota, tôr tache soglle odhikari bodmas zatole.
13. Gorib ani zulum' cholovpi ekamekak mellttat, Sorvespor dogaincheai dolleank uzvadd dita.
14. Zôr raza lhanak nitin vagoita to aplem xinvason sasnnak togoita.
15. Boddi ani xiddkavnni xanneponn dita, Punn, eka bhurgeak zaitem korunk dilear, to aplê avoik loz haddta.
16. Noxtto vaddta tedna patok vaddta, Punn, promannikank tancho bhosm disti poddtolo.
17. Tujea bhurgeacheô chuki nittaier ghal ani to tuka sukhi dovortolo; tujea kallzak dhadosponn ditolo.
18. Zoim dixttavo vô fuddarachem sopon nasta, thoim porza hata bhair veta; Kaide samballtat te subhagi.
19. Eka gulamak utramim xistik haddpak zaina: to somzolo zalearui tem kanar ghenvchona.
20. Boddboddot uloitolea mon'xak tumi pollela? Tachea poros eka pixeachea ulovpacher odik visvas dovrum-ieta!
21. Bhurgeaponnar thaun opurbai kelolo gulam legit, xevottak onupkari zaum-ieta.
22. Gorom toklecho monis mot-bhed uchambollaita, Ragachea vellar sogllê torechim patkam adarta.
23. Mon'xachem gorv taka unneponn haddtta, Apnnak khalto mhunnon somzota to man zôddttolo.
24. Xirap aikun gutt koso samballta to apnnacheach jivak vittelolea choracho bhageli zata.
25. Mon'xak bhievop mhollear fasant poddop, Sorvesporacher patieta to surokxit urta.
26. Zaite zann razache upkar sôdtat, Punn, zonn ekleak nit Sorvespora koddlean ieta.
27. Patkeak promannik vitteta, ani promannik patkeak vitteta.
