1. Agur Massa ganvchea Jakehchea putacheô mhonn'nneô. Hea mon'xachem bhakit Ithielak, Thielak ani Ukalak.
2. Hanv êk mon'xam modlo samko murkh, mon'xachem ginean naslolo,
3. Hanv zannvai xikunk na, Bhagivontanchi zannvai mhaka na.
4. Konn sorgar choddlo ani konn denvlo? Aplê muttint konnem vareak dhôrlem kai? Aplea angvostrant konnem udkam santtoileant? Sonvsarache konxe konnem mozbut keleat? Tachem nanv kitem? Tachea putachem nanv kitem? Tuka khobor asa?
5. Devachem dôr-ek utor nirbhel, Taka xeronna ietoleant To êk ddhal.
6. Tannem tuka bobatt korina zaunk, ani Tachê mukhar tum fottkiro zaina zaunk Tachea utrank kãi choddoum naka.
7. Don vostu hanv Tujê lagim magtam, hanv morchê adim teô mhaka dinastana ravum naka:
8. lottikponn ani fotti mhojê thaun pois kôr, durbollkai, na mhonn grestkai, mhaka dium naka, fokot mhozo dispot'to gras mhaka di,
9. Mhojê lagim bhorpur asun, Hanv Tuka nakarunk pavon ani mhonnon: 'Sorvespor? Sorvespor konn?' vô durbollkaiek sampddon hanv chorunk pavon ani mhojea Devachem Nanv boxttain.
10. Tachea dhoniachea fuddeant, eka gulamachea nanvar khot ghalinakai, To ghoddiê tujer xirap ghaltolo, ani tuka to xirap bhôgunk poddot.
11. Aplea bapaik xiraptat tosle monis asat ani te aplê avoik axirvaddinant;
12. Êk mon'xachi zat asa ti apunn xrêxtt mhunnon somzota, Punn, tancho mhell ozunuim nittôll zaunk na;
13. Thodde asat je svotachea dolleank motte distat, Ani tanchea dolleanchi pati voir asta;
14. Thodde astat zanche dant torvari, ani tancheô daddiô suriô koxeô, Sonvsarantlea chidd'ddotoleank ani mon'xam modlea gorjevontank gillunk.
15. Zolliek dogi dhuvô asat: Teô: 'Di! Di!' Mhunnon bob martat, Axa bagovna tosleô tin vostu asat, Khorench mhollear char vostu asat, Teô kednach puro mhunnonant.
16. Vanztto kusvo Patall, Udok chinvon puro zaina tosli dhortori, Ani kednanch puro mhunnona to uzo.
17. Thomnne marit bapaik polletat te dolle, ani zolm dilolê avoik kikont kortat, tankam falkeantle vinchtole, ani tankam gid girastole.
18. Mhojê somzonnê bhaileô tin vostu asat, khorench mollear char vostu hanv somzonam teô:
19. Ghonnicho mollbantlo marg, sorpagelo fatravelo rosto, Vhoddeanchi somdira modli vatt, eka dadleachê ekê bailê sangatak lognache sombondh.
20. Ek porduvari oxi vagta: ti khata uprant aplem tondd pusta ani mhonntta, 'Hanvem kainch vaitt korunk na!'
21. Sonvsar koddkoddtta tosleô tin vostu asat, Char khoreanuch, Jeô tachean sonsunk zainant:
22. Ek gulam' raza zavop, eka murkhak bhorpur jevonn mellop,
23. Ekê dusvaxi ostoren xekim logn zavop, Ekê chakornin aplê ghorkarnicho zago mellovop.
24. Sonvsarant char sopurlim zonavaram asa, Punn, tim xanneantlim xannim:
25. Muiô êk boll nasloli zat torui, gimant ti aplem jevonn samballta;
26. Gerbos zaticheô matui bollnasloleô, mon'zati torui tim khoddpamnim aplim ghoram bandun jietat;
27. Toll tankam raza nasta, torui te soglle ekêch dixen choltat;
28. Pali tankam tujean aplea hatan dhôrunk zata, torui teô razachea mahalamnim pavtat.
29. Dobajean cholpi tin vostu asat, Vô khoreanich char vostu dobajean cholpi:
30. Xinv sogllea zonavoram modlo podvedar, Vatter melltolê koslei vostuk bhieun to pollun vochona;
31. Êk huxar kombo. Êk bokddo, Ani kitench addaunk xekona toslo êk raza.
32. Tumi gorvan bhoron, murkhponnam keleant asot vô vaitt korpachem ievjilam asot zalear, tujem tondd bond kôr.
33. Lonni challit zalear tup zata, Nak ghanxit zalear rogot ieta, Zo konn rag uchambollaita, to zhogddim toiar korta.
