1. Mhojea puta, mhojim utram samball, ani mhojeô adnia tujea kallzant ballgun dovor,
2. Mhoje updes samball ani tum jietoloi, Tujea dolleanchi muddolli koxi mhoji xikovnn samball.
3. Ti tujea bottak band, Tujea kallzacher boroun dovor.
4. Xanneponnak mhonn: Tum mhoji bhoinn! Somjikaiek mhonn: Tum mhoji soiri!,
5. Hê porim dusreak bhettlolê ostorechea chopkeantlo, ani tea fuslavnnea utranchê, porki ostorechea chopkeantleô teô tuka rakhtoleô.
6. Hanv mhojea ghorachea zonelar astana, Hanv zallintlean bhair polletalom.
7. Sadhea tornnatteam sangatak, eka okkol naslolea tornnatteak hanvem pollelo.
8. To ekê painnintlean cholun ti ravta tea konxeachean vochun, to tichea ghorchê paimvatter pavlolo.
9. Jedna tinsanjer dis dharer poddtalo, ani ratchea okhondd kallokhant liptalo.
10. Polle ekê xindullkê bhaxen nhesloli, fottkirea kallzachi ostori taka mellunk ieta.
11. Ti loz naslolê bhaxen mottean uloita; Tiche paim ghorant tharonant.
12. Ekê pavtti ti rostear, ekê pavtti ti tinnttear, Dôr eka konnxeak ti uddi ghalunk tellun ravta.
13. Ti tachea hatak dhôrta, Ti tacho umanv gheta, ani loz-bhidda naslolea tonddan taka sangta,
14. Hanv Dev-iodnant vantto ghevpacho aslom, Aiz hanvem mhojeô angovnneô purai keleat;
15. Dekhun hanv tuka sôdunk ani tuka mellunk bhair aileam, Ani atam tum mhaka mevloi.
16. Mhojea sofacher hanvem chador ghatlam, Bordad kelolem Ejiptachem lugott ghatlem,
17. Musamborant ani thikent misôll korun, gondrosacho xinvôr hanvem mhojê khatticher ximpddaila.
18. Ie! Ami sokall zata meren zai titlê pavtti mogan bebdim zaum-ia! Môg korum-ia ani ami mogachem dhadosponn bhôgum-ia.
19. Mhozo ghorkar ghorant na, To khub pois vochunk gela,
20. Tannem aplea poixeancheô potiô apnna borabor vheleat; Punôv ievchê poilim to ghara portochona.
21. Aplea funslavnnea utramnim ti taka bhuloita, Tinnem boreô-boreô vostu sangun, taka aplea fasant sampddailo.
22. Eka marunk vhortolea boila bhaxen, ani apunn khoim veta tem nokllo aslolea pixea bhaxen, magir to tichea fattlean veta,
23. Tachea figdak êk bhalo topta pasun, Aplem jivit dhokeant asa mhunnon somzona astana eka zallant dhanvtolea suknnea bhaxen.
24. Ani atam puta hanv aiz sangtam tea utrancher chit di:
25. Tujea kallzak tichea vaitt rostear vochunk dium-naka, Vô tichea rostear tum cholo naka;
26. Tinnem zaitea zannank mornnak pavoileat, Ani mozbutantle mozbut tiche boli zaleat.
27. Tichem ghor mhollear, patallant pavoitoli mornnadik vatt.
