1. Mhojea puta, mhoji xikounn visrum-naka, Mhoje dhei tujea kallzant urum-di,
2. Tedna te tuje dis, tujea jivitantlim vorsam, Ani tujem boreponn vaddoitole.
3. Bhokti ani thirai kednanch tuka pois zaum naka: tankam tum, tujea gomttea bhonvtim band, tankam tujea kallzacher kantoi.
4. Tedna Devachea ani mon'xanchê nodrê mukar tuka doia ani ies melltoli.
5. Sogllea kallzan Devacher visvas dovor, svotachê zannvaiecher bhavarth dhôrinakai;
6. Tum dôr ek panvl ukolta tedna tacho ugddas kôr, ani To tujeô vattô nitt kortolo.
7. Tum apnnakuch xannom dhôrinakai, Sorvesporachi bhirant dhôr ani khotteponnak fatt kôr:
8. Oxem kelear tujê kuddik bholaiki melltoli, tujea haddank somadhan melltolem.
9. Tujê dovlotin ani poilea follantlean Sorvesporak man di;
10. Tedna tuje kodde gonvan bhortole, ani tuje dabe sorean vhanvtole.
11. Mhojea puta, Sorvespor dakhoita tê vattechi beporva korinaka,Tujeach svotachê zannvaiecher visvas dhôrinakai;
12. Zoso êk bapui aplea mogachea putak khast laita, tosoch Sorvespor Aplo môg korta tanchê thaim vagta.
13. Zannvai ani somjikai mell'llea, tim mon'xam subhagi!
14. Kiteak rupeachea mola poros zannvai odik moladik, ani tichim follam bhangara poros vortim.
15. Zannvai sogllea mannkam poros vorti, tichea poros omolik tujean kitench anvddeum nozo.
16. Tichea uzvean lamb jivit; ani tichea davean girestkai ani man asta.
17. Tiche roste anondan bhorleat, ani ticheô soglleô vattô dhadosponnak pavoitat.
18. Apnnak vengoitoleank tem ek jivitachem zhadd, ani tika chikttun ravtat te khuxal jietole.
19. Sorvesporan zannvaien sonvsarachi buniad ghalea, ani sorg somjikaien mandun ghetla.
20. Tachea zannvaientlean tinnem nhõio vhanvoileat, ani kupam borof koddoitat.
21. Mhojea puta, hê bore bud'dhik ani somjikaiek veng mar, Tancher kednanch add nodor korinaka;
22. Teô tuka atmik jivit ditoleô ani tujea gomtteak sobitai hadddtoleô.
23. Tum tujea rostean surokxit vetoloi, Tuje paim adollche nant.
24. Tum nhidunk vetai tedna, bhienvcho na, ani add poddlea uprant, tum sust nhidtoloi.
25. Okosmat ietolea thorthoreak ani vaitt mon'xamnim dosoilolea akromonnak tum bhienvcho na.
26. Jedna Sorvespor tujer visvas thevtolo, to tujim pavlam gonnpasam pasun vattaitolo.
27. Mhojea puta: tujê lagim ghòddta zalear, upkar korunk zai taka to korinastana ravum naka.
28. Tujê lagim ghòddta tedna, tujea peleak mhonnum naka: 'Chol voch! Novean ie, faleam ditolom.'
29. Tuzo visvas dhôrun tujea ghora laginch ravta tea sezariak fas manddum naka.
30. Tuka kãich vaitt korunk na tea mon'xa kodde zhogddum naka.
31. Khorkôs mon'xachi nattkai korum naka, kednanch tachi chal dhôrum naka;
32. kiteak khottea mon'xak Dev vitteta, punn promannik mon'xacher To visvas tthevta.
33. Khottea mon'xachea ghoracher Sorvesporacho xirap poddta, punn sugunni mon'xachea ghoracher To axirvad ghalta.
34. Moskoriô kortoleancheô To-i moskoriô korta, punn khalteank To denneamnim bhôrta.
35. Bhovman ho lhan'vikancho inam', Ani pixeank fokot opman.
