1. Mhojea puta zor tum dusreak zamin ravlai, vo pordexachea rinnak zobabdar ravpachi tunvem khatri dilea,
2. zôr tunvem utor dilam, ani tujea utramnim tum zallak sampoddlai,
3. Tôr mhojea puta, tê oddchonnintlo bhair soronk ani zôr tujea xezareachê podvê khala tunvench tuka ghalai: tôr oxem kôr: voch, lhanvikai ghe ani tujea xezareakodden mag,
4. Tum nhidum naka, nhoi mhunnon tujea dolleanchea patiank visôv dium naka,
5. Zoxem ek chitoll ani ek suknnem, eka xikareachea fasantlem suttonk dhanvta, tosoch tunvui pollapôll kaddun suttka ghe.
6. Allxean muiechi dekh ghenvchi; tichea sobhavachi dekh gheun nihall korun xannom zanvcho:
7. Tika konnunch hukum' ghalina, Dekhrekh dovorpi na, dhoni na,
8. Tori-i ti gimant, pikechea vellar aplem jevonn ekttaita, ani pavsalleak toiar zata.
9. Allxea, anink kitlo kall legit tum thoinch nhidun ravtoloi? Tujê nhidentlo tum kednam tori zago zatoloi?
10. Kai hanv thoddo vêll matso nhidtam, mhoje hat uxeak gheun thoddo vêll visôv ghetam! oxem mhunnttoloi?
11. Tôr tum nhidlolo astana, goribi tujer ghuri ghaltoli ani bhikarea bhaxen tujer dukôll ietolo.
12. Ek bodmas ani duxtt monis fotti sangot bhonvta, Punn, tachea vonttancher dusvas asta,
13. Aple dolle bittbittait, ani aplea bottamnim khunna korit tuka fosoita.
14. Tanchea mhellea kallzamnim sodanch fottingponnam, Ani vaitt ievzonneamnim te soglleak motbed ani dusmankai ximpddaitat.
15. Hea khatir, odruxtt okosmat tancher ghuri ghaltolem, ani taka upai korunk zaina toxem ghaiall kortolem.
16. Sov vostu Sorvesporak dusvas haddttat, ani sat vostu taka vittaitat:
17. Êk gorvixtt nodor, êk fottkiri jib, niropradhi rogot varovpi hat,
18. Vaittoveô ievzonneô guntpi kalliz, vaitt korunk dhanvpi paim,
19. Dôr uskara fattlean fotti marta toslo fotting govai, Ani bhavam modem dusvas upzoita to monis.
20. Tuzo bapui sangta toxem kôr mhojea puta, tujê avoichê xikovnnechi beporva korinakai.
21. Sodanch teô xikovnneô tujea kallzant ghôtt samball, Tankam tujea gomttea bhonvtim band.
22. Tum vaur kortai astana teô tuka vatt dakoitoleô, Tum nhidlolo astana tuji rakhonn kortoleô, Ani tum zago zatai tedna teô tuka bori bud ditoleô.
23. Kiteak, kaido mhollear êk divo ani xikovnn uzvadd, Xikttavnni ani xist jivitachi vatt;
24. Tuka vaitt sobhavachê ostorechea sombondantlo vattaunk, ani lag marpi dusreachê bailechea fasantlo samballunk.
25. Tichê sundoraiechi tum axea korinaka ani tallnent poddum-naka. Vô tichea dolleanchea hullhullea khellan tum fasant poddum naka.
26. Eka unddeachea kuddkean, tujean ekê xindullkek vikti gheum ieta. Punn, êk porduvari bail, tujea jivitan moladik asa titlem vogddaunk xokta.
27. Aplea kopddeank uzo lagonastana konnachean aplea khomsa bhitôr uzo lipoun vhorum-ieta?
28. Tuje paim ulponastana tujean inglleam velean cholum-ieta?
29. Tech bhaxen xezareachê bailê vangdda patok adarta taka ghoddtta: Tika hat laitolo konnunch khasti viret suttcho na.
30. Fokot aplea pottachi bhuk marunk chori kortoleak lôk vhoddli khast dinant;
31. Torui to choriek sampoddlo zalear tannem sat pavtti farik korchem poddtta Aplea kuttumbachi dovlot hogddanvchi poddta.
32. Punn, porduvari mon'xak ginean asona; to aplench nisontton korta.
33. Taka fokot mar ani opman favo zatole, Anink te opman kednanch pusun kaddunk zanvche nant.
34. Kiteak, kunn'nnatti potik ragabhorit korta Farikponn gheupachea vellar,t o kednach kaklut dakhonvchona;
35. Luskonn bhorpai to mandun gheuncho na; Tunvem kitleoi bhettô dilear to thonddavchona.
