1. Mhojea bhurgeamno, eka bapaichi xikounn aikat; chit diat ani somjikai kitem tem xikat.
2. Hanv tumkam ditam ti nitt xikounn poro ghali nakat.
3. Eka kallar hanvuim eka bapaicho put, ani mhojê avoichea dolleamnim êk oprup bhurgo aslom to mhaka oxem xikoitalo:
4. Hanv kitem sangtam tem tum kallzant ballgun dovor, mhojeô adnia samball ani tum jietoloi.
5. Xanneponn melloitoloi, somzut melloitoloi kednach visor naka, mhojea utranchi beporva korinaka;
6. Taka xenddoinaka, tem tuka sugur dovortolem tacho mog kôr, tem tuka rakhtolem.
7. Xanneponnachem poilem totv mhollear: Xanneponn melloun ghevop; tujê lagim upai asat te vapddun xanneponn ghe!
8. Tachi opurbai kôr ani tem tuka mahan kortolem; Taka apnnai ani tem tuji vhoddvikai zatolem;
9. Tem tujea matheak êk moladik jhelo ghaltolem, ani tuka voibhovi mukutt ditolem.'
10. Aik mhojea puta, mhojim utram tujea kallzant dovor, Ani tujea jivitachim vorsam vaddttolim.
11. Hanvem tuka xanneponnacheô vattô xikoileat, tuka hanvem promannikponnachea rostean vhela.
12. Tum choltai tedna tujim pavlam addkholli vinnem ubartoloi, Dhanvtana tum apttun poddcho na.
13. Xist samball tichi kednach beporva kori naka, Tujê dolle ticher dovor, ti tujem jivit.
14. Khotteanchea rostean cholonakai, khotte vetat tê vatten tum vochonakai.
15. Vaitt adarinakai tê vattecher nodor dovrinaka ani fuddem voch, Taka fatt kôr, tem sôddun fuddem sor.
16. Kiteak, dusreak kosleim vaitt kelea bogor tankam nhid poddona, Konnankui apttina zalear tanchi nhid chukhta;
17. Tôr, te vaittaponnacho unddo khatat, ani hinvsecho soro pietat.
18. Promannikacho rosto fanteavelea noketra sarko, Tacho uzvadd suriachea kirnna porim vaddta;
19. Vaittoveanchi vatt gupatt kallkhê rati sarki, Apunn apttun koxe poddttole tem tankam kollona.
20. Mhojea puta, hanv tuka kitem sangtam tacher chit di, Chotraien mhojim utram aik;
21. Tankam tujê nodrê bhair dovorinaka, tankam tujea kallzant ballgun dovor.
22. Kiteak, zankam tim melltat, tankam tim jivit ani sogllea mon'xakullak bholaiki.
23. Ani koslei dusrê vostu poros tujea kallzachi kallji ghe, karann, tantlean jivitachi zhôr futt'tta.
24. Vankddem uloitolea tonddak fatt kôr, fottkirea vonttam sorxilo pois rav.
25. Tuje dolle sodanch nitt-fuddem polleum-di, Ani tujem panvol pavchê adim tuji nodor pavom-di.
26. Tujea panvlanchi dixa soroll zaum Ani tuje roste thir asum.
27. Davean vô uzvean ghunvum-naka, tuzo paim vaitt marga sorxilo pois dovor.
