1. Konnuch fattik lagonastana noxtto pollun veta, Punn, promannik eka xinva bhaxen bhienastana ubo ravta.
2. Eka desant bonddam zait ravlear khub fuddari upzotat: Punn, xanne ani Onnbhovi monisuch thirai ditole.
3. Je gorib konnixttank piddapidd ditat: te hunvar haddtolea pausa bhaxen dukôll haddtat.
4. Je konn nitik sôddun ditat, te noxtteank bhovman ditat, Je konn updes palltat te tancher zolltat.
5. Vaitt mon'xak nit kitem ti somzona, Je Sorvesporak sôdtat te sogllem somzotat.
6. Vankddea rostean cholpi kitloi grest aslear promannik jivit jieta to gorib tachea-von boro.
7. Nit ani kaido samballta tem ek huxar bhurgem; Punn, je konn veasnnache sangati zatat te bapaik lojek ghaltat.
8. Zo konn hispa bhair kolantor gheun ani poixe choddoun girestkai ektthaita to dusrea khatir ektthaita ani to ti goriba meren pavoita.
9. Zo konn kaideak kan diupachem sôddun dita, tachem magnnem legit ollxigavnnem zata.
10. Zo konn promannikak vaitt rostean vhorta to apnnench marlolea fonddant poddtta. Niropradhi khuxalkaieche daiji zatole.
11. Girest ghoddiê svota apunn xannom mhunnon somzot, punn,gorib budvont, tachem rupnnem kaddttolo.
12. Promannik zoitivont zata tedna motto zoizoikar zata: Noxtto voir sortat tedna lôk bhirantin liptat.
13. Aplim patkam lipoita tachi udorgôt zanvchina, Zo konn kumsar zata ani ti vatt sôddtta, taka kaklut favo zatoli.
14. Devak bhieun jieta to monis bhagi, Punn, aplem kalliz dharunn korta to sonkoxttant poddtolo.
15. Gorôz ghaltolea xinva ani hol'lo kortolea ansvela bhaxen ek duxtt raza gorib porjecher.
16. Somzut naslolo raza êk krur zulumi, Punn, zaka axechi vitt ieta, tache dis vaddttole.
17. Zôr eka mon'xan dusreachem rogot varoilam, taka fondda meren pollun vochum-di: Taka konnench adar dinvcho nhoi!
18. Promannik jivit jieta to vattoutolo, Zo don vhoddeancher aple paim dovorta to buddtolo.
19. Apli zomin kôsta taka bhorpur pikavoll zatoli, Zo konn sopna pattlean dhanvta, taka bhorpur bhuk ietoli.
20. Visvaxi monis axirvadan bhortolo, Punn, zo ratiant girest zaunk sôdta tacher konnixttai ietoli.
21. Pokxpat korop borem nhoi, To monis eka unddeachea kuddkeak lagon sot sôddtolo.
22. Axechea dolleancho monis girestkaiê fattlean dhanvta, Punn, tacho nikal konnixttai zata mhunnon taka khobor nasta.
23. Konnuim dusreachi chukh nodrêmukar haddun dita to xevottak tea funslavpea poros odik bhovman zhoddta.
24. Zo konn aplea bapaik ani avoik chorta ani hem patok nhoi! mhonntta, to ekê vatter ghat marpeacho sangati.
25. Dusreachê vostunchi axa korpi kijilam laun ghalta, Zo konn Sorvesporacher visvas dovorta to girest zatolo
26. Aplea svotachea bollacher patieta to piso, Punn, zo konn xanneponnan cholta to vattovtolo.
27. Goribank dita taka goroz poddchina, Punn, zo konn tankam aple dolle dhamptolo to bhikek pavtolo.
28. Noxtte voir sortat tedna bore monis liptat, Punn, te khala poddlea uprant promannikancho ank choddtolo.
