1. Massa ganvchea Lemuelachim utram. Tim taka tachê avoin xikoilolim:
2. Kitem mhojea puta? Kitem mhojea kusveantulea puta? Kitem mhojea angovnnechea puta?
3. Tujem boll bailancher ani tuji girestkai rajeanchem nisontton kortoleancher vogddainaka.
4. Hem razank nhoi. Oh Lemuel, Soro pievop razank sobona, Kunvramnim soro pienvcho nhoi,
5. Soro pieun tanninch formailolem visrot mhunnon ani durbollancher nit virgollait mhunnon mhaka bhirant dista.
6. Mornnak bad zaloleank soro di, kalliz zodd zalam taka soro di:
7. Soro pieun tankam apli dukh visrum di, Ani aplê konixttaiechi tankam iad zaunchina.
8. Moneanchea ani sanddloleam, khatir tujem tondd uktem kôr;
9. Tujem tondd uktem kôr, promannik nivaddo di, Gorjevontak ani goribank rakhonn di.
10. Alef: Êk sugunni ostori konnak mellot? Motiam poros vortem tichem mol.
11. Bet:- Tichea potichem kalliz ticher visvas dovorta, tichê koddsun taka khub faido melltolo.
12. Gimel:- Sogllea tichea jivitant taka nuksann nhoi, punn adav ti haddta.
13. Dalet:- Lonv ani sut ti sôdunk bhonvta, ani tim aplea hatamnim mhenotin vinnta.
14. He:- Ti tea veapari botti bhaxen, Poisorlean aplem jevonn haddta.
15. Waw:- Ti fantea pahrar utt'ta Aplea ghorabeak jevonn dita, Chakrank kamam vantt'ta.
16. Zain:- Eka xetacher ti aplem mon ghalta, Aplea hatamnim zoddlolê zôddin; Thoim êk dakancho mollo roita.
17. Het:- Ti aplea komrak aplo palov bandta ani kottin kam korchê khatir, aple hat mozbut korta.
18. Tet:- Aplo veapar boro cholta mhunnon ti zanna; Ticho divo ratcho palovna.
19. Yod:- Tichea hatamnim sodanch bhonvri, ani bottamnim sodanch sutachi-gaddi.
20. Kaf:- Goribank ti aple hat ugôddta, ani gorjevontank ti pavta.
21. Lamed:- Him legit ailear, aplea ghorabeachi tika bhirant na, Kiteak tiche soglle chakor gorom kopdde nhesleat.
22. Mem:- Ti svota aplem pangrum toiar korta, Ti nazuk zambllichea rongache kopdde nhesta.
23. Nun:- Tichea ghorkarak xarant bhovman asta, ani to ganvchea zanntteam modem bosta.
24. Samek:- Ti kopdde vinntta ani vikta, Ti veapareank potte pavoita.
25. Ain:- Dhiran ani bhovmanan ti nheslea, tichean fuddarak hansum ieta.
26. Pe:- Xanneponnan ti aplem tondd ugôddta; Doiallponnachi xikovnn tichê jiber asta.
27. Zade:- Aplea ghorkarachê chalicher ti barik nodor dovorta, Ti bekar boson jevonn jevina.
28. Oof:- Tichim bhurgim ubim ravun, tika denneamnim bhôrloli mhonnttat, ticho ghorkar utthun tichi kirti gaita:
29. Resh:- Zaitea ostoreamnim ojapancheô vostu keleat, Punn tunvem tankam soglleank fatti ghaleat!
30. Shin:- Sobitai fottkiri ani sorupai polki; Sorvesporachi bhokti korta tê ostorêk vakhann'nni favo.
31. Taw:- Tichea hatanchea fôllamnim tika-i vantto diat, ani xaranchea darvontteam-xim ticheô kornniô tichi vakhann'nni korun dium.
