1. Solomon, Davidacho Put ani Israelacho raza hacheô mhonnnneô:
2. Mon'xan xanneponn ani xist xikcheak, khôl zannvaiechim utram somzucheak,
3. Xistivont khôl nodor ani Bazu ghena tosli nit, ani spôxtt sarki vatt apnnaucheak;
4. Sadheank khotavinn nitt, ani tornnatteank zannvai ani vivek xikoucheak;
5. Xanneank aikum-di ani odik xikum-di, Ani gineani monis bud'dhichem dennem ghetolo.
6. Opariô ani kottin mhonn'nneô, zannarancheô mhonn'nneô ani tanchim humannim somzumcheak.
7. Zannvai zai, zalear tuka poili Sorvesporachi bhokti asunk zai; Murkh lôk xanneponnak mandinant ani xikunk-ui sôdinant.
8. Mhojea puta, tujea bapaichi adnia aik, tujê avoichê xikovnnechi beporva kori naka:
9. Teô tujea mostokar sobitaiecho mannkulo mukutt zatoleô. Tujea gomtteak êk molachi sorpolli zatoli.
10. mhojea puta, zôr patki tuka bhulovunk sôdit, tanchea vangdda vochum-naka.
11. Zôr tannim tuka sanglem: Amchea vangdda ie: Konnankui tori jivexim marum-ia; Khoincheai tori Niropradheacher ghuri ghalumia ani mouza korum-ia.
12. Ak'khech tonddant denvtolea bhaxen ami tankam jivech gillum-ia.
13. Sogllea torancheô girestkaiô ami ektthaum-ia, Ani tea uprant amchim ghoram bhôrum-ia;
14. Tum amkam sangat di: Ami chortanv tem vanttun gheum-ia. Amchê modim fokt ekuch poixeanchi poti astoli.
15. Toslea mon'xam borabor tum vocho-nakai puta, tanchea sorxilo pois rav, tujim panvlam tanchea marga poros pois dovor
16. Tanchean vaitt kelea xivai ravunk zaina, Rogot varoupak te sodanch taktikin toiar astat;
17. Kiteak gorjê bhair tãnnim zall patllailam. Apunn dhôrunk sôdta tem suknnem polleta tedna zall manddop faideachem nasta.
18. Punn, tosle monis apleach rostear zall manddtat, Ani tantunt te mortat.
19. Lutticho mhal axen sôdtat tancho xevôtt osoch zatolo: Oslea rostean choltoleancho xevôtt tanchem moronn.
20. Aikat! Rosteancher ani nakeancher zannvai bob marta, Bhovxik chovkancher aplo tallo ubarta;
21. Durgam velean bobatt korta, xaranchea darvontteamnim aplo tallo aiko-so korta.
22. Sadhea lokamnô, anink kitlo kall tumi babddeponnak veng marun ravtoleat? Zannvaiecheô moskoreô keloleô kitlo kall legit polleun khoxi bhôgtoleat? Tumi kednach xikchenant?
23. Mhojê xiddkavnnek lokx di Hanv tuka bori buddh ditolom ani mhoji zannvai hanv tuka vantt'tolom.
24. Hanv tuka ulo martalom ani tuka apoitalom, Punn, tum aikonasloi tunvem mhojea utranchi porva kelina,
25. tunvem mhojê adniachi beporva keli Ani mhojeô soglleô xiddkavnneô nhoikarleô,
26. Dekhun, tujer nirbhag ieta tedna hanv tuka hanstolom. Tujer kampero ieta tedna hanv tujeô moskoreô kortolom.
27. Eka tufana bhaxen tujer thorthoro ieta tedna, Eka bhonvrea bhaxen tujer nirxevnni ieta tedna, Dukh ani akant tuka dhortorer apttitat tedna. Tujer sontap ani upodre ietat tedna.
28. Tum mhaka ulo martolo, punn, hanv zap divchona, Tum visôr ghena astana mhaka soglleak sôdtolo punn, hanv tuka mellchona.
29. Zannvaiecho tankam kosloch upeôg zalo na. Ani tãnnim Devachi khoxi kelina,
30. Tãnnim mhoji bud'dh mandun gheunk na, Mhojea xiddkavnneanchi tãnnim porva kelina:
31. Dekhun tanchea vauracho te foll khatole. Ani tancheô svotacheô kornneô tankam mornnak pavoitoleô.
32. Pixeanchi befikiri, tanchem svotachem ghott'ton korunk vaurta;
33. Punn, mhojem aikota To surokxit jietolo, Odruxttachi koslich bhirant nastana to xant astolo.
