1. Eka don tonddanchea pixa poros dublleponnan jietolo promannik odik boro.
2. Zannvaiê viret hurba nirfôll; Chôdd nettan dhanvta to apttotolo.
3. Aplea murkheponnan, monis aplench padd ghalta, ani magir, Sorvesporacher guneanv thapta.
4. Girestkaiek lagon nove-nove ixtt zatat, Punn, goribacho ixtt taka sôddun veta.
5. Fottkirea govaiak khast lagonastana urchina, Ani fotti uloitolo suttchona.
6. Unch kulliechea mon'xachê vatten uloupi zaite astat, Sagvadi diupeache sogllech ixtt zatat.
7. Zôr gorib mon'xak tache khaxea bhav legit ubgovtat; tôr tache ixtt taka kitle sôddchenant! Zo konn utrak sôdta taka kainch mellchena.
8. Tujeruch êk upkar kôr ani zaiti zannvai zôddun ghe, Tem tujeach faideak, Zo zannvai samballta taka khuxalkai mellta.
9. Fottkiro govai khastintlo suttchona, fotti ucharta tachem nisontton zatolem.
10. Pixeank zhogzogan jieunk favona, ani gulamanchean razacher sot'tea cholounk zaina.
11. Somjikaiechea mon'xak apnnakuch domaun dovorpak kollta, ani dusrean opman kel'le visrop, hem tachem vhoddponn.
12. Razacho rag xinvachea gorzonna bhaxen, Punn tacho môg tonnacher poddlolea dova bhaxen.
13. Êk murkh bhurgo bapaik odruxtt haddunk xokta, ghorkarnichi karandai mhonngê, gollot ravtolea udkachea thembea vori.
14. Ghor, daiz ani girestkai vhoddilam koddlean ieta, Punn xanni ghorkarn Sorvesporachem dennem.
15. Allxi nhid kaddtolo, Ani allxi monis sodanch bhuketolo.
16. Updes rakhta to apnnakuch samballta, Updesanchê xikovnnê pormannem cholona, to mortolo.
17. Goribak adar dita to Sorvesporak usnnem dita To taka tachea vavrachi mozuri ditolo.
18. Vêll astana tujea putak khast laun xist xikoi, Chodd uloun tum taka mornnak pavoum-xi.
19. Ragixtt sobhavachea mon'xak khast favo; Khast lainaslear, to odik vaitt zatolo.
20. Budh aik, nittavnni mandun ghe, fuddarak tum budvont zatoloi.
21. Mon'xachea kallzan aiteô ievzonneô astat, punn, okherek Sorvesporachich khoxi zata.
22. Mon'xan promannikponnan cholop mhonngê êk ut'tom gunn; Eka fottkirea poros, eka goribak odik boro man asta.
23. Sorvesporachi bhirant jivitak pavoita, ani tuka vaittachi bhirant nastana jevonn-khann haddtoli.
24. Allxi monis boxient hat ghalta, punn, allsaien tonddant ghalunk pavona.
25. Eka niraxavadiak dhopko dilear, sadho monis somjikaiecho zatolo; Eka somjik mon'xak xittkailear to odik zannar zatolo.
26. Zo aplea bapaicher zobordosti korta anink avoik gharantli dhanvddaita to bhurgo nalaik ani upeôg naslolo.
27. Mhojea balla, tuka zannvaiê poros pois vochunk dista zalear, mhojim budhichim utram aikupachem sôdd.
28. Khotto govai nitichim fokannam korta; ani vaittoveachem tondd fottingponn girasta.
29. Pixeanchê fattir soitincho mar, toxench mosteanchê fattik khast keloli asa.
