1. Mhojea puta, mhojim utram kallzant ghexi zalear, mhojea adniancho tujê kodde tthevo korun dovorxi zalear,
2. tuje kan zannvaiek ugôddxi ani tujem kalliz sotak laixi zalear,
3. hôi, sarki somzonni gheunk prarthon korxi ani ginean magun ulo marxi zalear,
4. rupem zal'lê porim tum tem sôdtai ani liplolo tthevo zal'lê porim zotnaien tachê sôdik lagtai zalear,
5. tedna Sorvesporachi bhirant kitem ti tum somzotoloi, ani Devachi zannvai tuka melltoli.
6. Kiteak Sorvesporuch zannvai dita, Tachea tonddantlim vhanvtat vidia ani ginean.
7. To Aplo adar promannik mon'xak dovorta, promannikponnan choltoleancho To ddhal;
8. nitichê vatter To pahro korun ravta, Aplea bhoktancho rosto To rakhta.
9. Tedna dhorm, nit ani promannikponn kitem tem tum vollkhunk pavtoloi, hich ti sorv borveachi vatt.
10. Jedna xanneponn tujea kallzant ieta Ani zannvai anondan tuzo atmo bhôrta tedna xanneponn tujea kallzant rigta, ani zannvaien tuzo atmo dhadôs zata.
11. Tedna xanneponn tujer dollo dovortoli, Ani somjikai tuji rakhonn kortoli
12. Tuka vaittachea margavelo, toxench tanchea baskollponnachea ulovpantlo,
13. Ani promannikponnacho rosto sôddun kallokhache roste choltat tantlo:
14. Toxench vaitt korunk sôdtoleantlo, Ani zanchem dhadosponn dusreak fosovpant asta, Ani ghatkeponnant zankam anond mellta,
15. Zannim ghetlole roste ghunvddaileat, Ani te maddoitat te roste vankdde, soroll nhoi tantlo zannvai tuka samballtoli.
16. Dusreachê bailêkoddcho pois dovorpak, Onvollki ani suvadik Utramnim bhulovpi ostorê koddcho pois dovorpak;
17. Tinnem aplea tornneponnantlea sangateak sôddlo, ani aplea Devacho, korar ti visorlea;
18. Tichem ghor mornnachê vatten bagovta, ticheô vattô iemkonddant vetat Tantlo tuka nivarunk.
19. Tichea fuddeant veta tantlo ekloi portona, tankam kednach jivitak pavoita to rosto gavona.
20. Hê bhaxen, tum borea mon'xancho rosto choltoloi, Nitik pallo ditat tea vattamnim tum dosun ravtoloi.
21. Tedna fokot promannikank hi dhortori vosovpak melltoli, Ani niropradhi ticher aplem biradd kortole;
22. Tedna noxtteank dhortorevele kaddun vhortole, Ani bhavarth nasloleank Dhortorentle umttoun kaddttole.
