1. Mon'xachem kalliz ievzonneô manddta, Punn, Sorvespor teô chalik laita.
2. Kortoleak aplim kortubam sarkim distat, Punn, Sorvespor tacho atmo zhôkta.
3. Aplea vauracher axirvad ghal mhonn Sorvespora lagim magnnem kôr, ani tujeô ievzonneom xarti pavtoleô.
4. Pormesporan kelam taka soglleak karonn asta, Hôi Noxtteanchea nisonttonak porian.
5. Modandh kallzacheak Sorvespor vitteta: Zanna za taka xikxa mevlea xivai ravchina.
6. Visvaxi mogan ani thiraien patkak farikponn mellta; Sorvesporachê bhirantin vaitt vattovta.
7. Jedna Sorvespor konnanchei thaim khoxi zata tedna tachea dusmanak pasun tache ixtt korta.
8. Onitin zaitem zôddlolea poros promannikponnan thoddench aslear odik borem.
9. Mon'xachem kalliz êk dixa dhôrunk ievjita, Punn, Sorvespor tachim pavlam rakhta.
10. Raza Devachê hukumen uloita, tedna tachê nirnnoi nitiche.
11. Zokham ani tagddeô Sorvesporacheô, Tachê potient aslolim vozna tannench kelolim.
12. Jedna promannikponn xinvasonanchi buniad zata, tedna vaitt adarop razak vitt haddtta.
13. Sot uloupi vonttank Sorvespor ievkar dita, Promannik utranchea mon'xacho to mog korta.
14. Razacho xirap mhonngê mornnacho sad, Punn, xannom monis taka thonddaitolo.
15. Razachea mukhamollachi porzollai, jivitachi khunna, Tachi doia mhonngê vasant rutuchi khunna.
16. Bhangara poros zannvai zôddlear odik borem, Rupea poros somzut vinchlear faideachem
17. Vaittakoddlo pois sorop mhollear promannikponnachi chal; Rosto chotraien polleta to jivit sugur dovorta.
18. Gorv nisonttonak pavoita, ani gorvixtt otmo dhortorer apttota.
19. Gorvixtta sangatak girestkai vanttun ghetlolea poros goriba sangatak khalto za.
20. Chotraien utor aikota taka dhadosponn mellta; ani zo Sorvesporacher patieta to bhagi.
21. Xannea kallzacheak budvont mhunnon thoknnai kortat, Ulovpachi gôddsann zannvai vaddoita.
22. Xanneak zannvai tachea jivitachi zhôr, Pixeanchi khast tanchem svotachem pixeponn.
23. Xannem monis ulovchê adim chinttat ani hem tanchea utrak odik khatri dita.
24. Maiest utram êk mhonvachi polli koxi, khaunk suvadik ani kuddik poustik.
25. Êk rosto asa to rosto nitt mhunnon soglle somzotat, Okherek to rosto mornnak pavoita.
26. Vavraddeachi ruch taka odik zoran vaurunk sfurti dita, Kiteak, tachi bhuk taka huskaita.
27. Êk mol naslolo monis vaitt rochta, tosleanchem ulovp chorchoraupi uzo koso.
28. Zhogddim laupi kijil rochta, Chaddielo dogam ixttank doxim korta.
29. Hinvxevont aplea xezareak funslaun vankddea rostean vhorta ani taka boro nhoi tea rostear pavoita.
30. Zo konn kusddeponn korunk dolle mittmittaita ani vontt chabta tannem, adim fuddench vaitt kel'lem asta.
31. Dhove kens manacho mukutt, To promannikachea sonvoiamnim mellta.
32. Eka vira poros, nitivont monis boro, tosoch êk sotacho dhoni ek xar jikhlolea poros boro.
33. Tharav ghenvchê khatir sorti ghaltat, Punn, tacho nirnnoi Sorvespora koddlean ieta.
