1. Gormenchea disamnim him', ani lunvnnechea disamnim pavs poddop naka zata, toxench eka pixeak bhovman divop naka zalolem.
2. Jê porim girbujê ani pitkolli mollbant uddtana thambonant, tech porim sôddlolo Eka mollbottea bhaxen, gorjê bhair ghatlole xirap mon'xak lagonant.
3. Ghoddeak chabuk, zum' gaddvak, ani êk boddi pixeachê fattik.
4. Pixeak tachea pixeponna pormannem zobab dium naka Toxem kelear tum-i tachech bhaxen zatoloi.
5. Pixeak tachea pixeponna pormannem zap di Na tôr to apunn xanno mhunnon somzotolo.
6. Eka pixeakodden sondêsh dhaddun dita to, aplo paim katrun gheta ani hinvsa pieta.
7. Zoxem thontteak paim upeôg naslole, toxich êk mhonn'nni pixeak upeôg nasloli.
8. Pixeak bhovman dilolea poros ekê gofnnichea chamddeak fator bandlear borem.
9. Eka pixeachea tonddant êk bori mhonn'ni mhollear, eka bebddeachea hatant êk kantteancho khando divop koxem.
10. Zo konn vatter mellta tea pixeak vô bebdeak vavrak dovorta, to mellta titleankui vaitt kortolea bhaxen.
11. Zoxem ek sunnem aplê vonkarek portovta, tosoch êk piso aplea pixeponnant porot poddta.
12. Aponnuch zannar mhunnon somzota? Tachea poros pixea thaim il'li zannvai mellonk xokta!
13. Eklo allxi mhonntta: 'Bhair ran'vôtti mon'zat asa! Rostear êk xinv asa!'
14. Ek dar zhoddacher ghunvta toso, êk allxi aplê khattir ghunvta.
15. Allxi aplo hat boxient ghalta, Punn, to portun tonddant haddunk taka puro zata.
16. Ttaka-ttik zobab ditat tanchea poros eklo allxi apnnak xannom mhunnon somzota.
17. Gorjê bhair dusreachea zhogddeant tondd ghalta, to vattevelea kutreachea kanak dhôrtolea mon'xa sarko.
18. Suretam, bhale ani moronn sôddta,
19. tech bhaxen êk monis zo aplea sangateak fôtti marta ani mhonntta, apnnem fokannanim kelolem mhonn.
20. Zoxem lankudd na zalear uzo palovta; toxem kichantt ghalpi na zalear, zhogddim palovtat.
21. Jê bhaxen kollxeanche inglle zatat, lakddacho uzo zata, tê bhaxen zhogddekar kijilam ustita.
22. Dusreacho man ubovpi utram, ruchicheô unddiô koxeô Tim soroll pottant vetat.
23. Matiecher rupeachi boxi kantoilea bhaxen: fotting vontt ani mhellem kalliz.
24. Kusddo monis aplo dvês aplea utramnim lipoita, Punn tachea ontoskornnant ghatkeponn asta;
25. Tujê lagim borê bhaxen uloita taka patie naka, Tanchea kallzant sat pavtti burxeô sonvoiom asta.
26. To aplo dvês fottkirea sobhava pondak lipoit, Tachem noxtteponn sobemazar uktem zatolem.
27. Fondd marta to tantun poddtolo, Fator ghunvddaita tacher to porton ietolo.
28. Fotting jib zaitem vaitt adarta, ani lag marpi tondd nisontton korta.
