1. Atthvea disa, Moizesan Aaronak ani tachea putank, ani toxench Israel porjechea mukheliank apoile.
2. Aaronak tannem mhollem, 'Koslench khot-naslolo êk paddo ani êk menddro ghe ani te Sorvesporak bhettoi, paddo patkanchea farikponnak ani menddro hom'-bhettek.
3. Magir, Israel porjek sang, "ki tãnnim, patkanchea farikponnak êk bokddo, ani koslench khot-naslolem ek vorsachem-vasrum; êk vorsacho-menddro hom'-bhettek;
4. ani êk boil ani êk menddro ekcharachê bhettek haddunk zai. Tãnnim te orov-telachea misolla sangata, Sorvesporak bhettounk zai, kiteak Sorvesporachem dorxon aiz tankam zatolem." '
5. Moizesan tankam formailolem titlem-i tãnnim Zomatichea Tombu-xim haddlem, ani Sorvesporak nomoskar korunk soglli porza thoim ektthovli.
6. Moizesan mhollem, 'Sorvesporacho porzôll tumkam dixtti poddunk, tannem hem sogllem korunk tumkam formailam.'
7. Magir, tannem Aaronak mhollem, 'Tujim ani porjechim patkam pusun vechê khatir hi bhett kôr.'
8. Aaron vedi-xim gelo ani aplea patkanchea farikponna khatir paddo marlo.
9. Tachea putamnim taka rogot haddun dilem, tantunt tannem aplem bott buddoilem ani tem vedichea xingank lailem, ani urlolem vedichea pãia-xim xinvrailem.
10. Magir, tannem tachi chorob, mutpariô ani boro to kallza-figdacho kuddko, Sorvesporan formailolê tê porim, vedir hulpailim.
11. Punn tachem urlolem mas ani chambddem moidana bhair vhorun hulpailim.
12. Magir, tannem hom'-bhettechem zonavor marlem. Tachea putamnim taka rogot haddun dilem, ani tannem tem vedichea charui vattamnim ximpddailem.
13. Tannim taka zonavorachi tokli ani urlole kuddke dile, ani tannem te vedir hulpaile.
14. Magir, tannem pottantlem ani patthle pãi dhule, ani hem her masa borabor, vedicher hulpailem.
15. Uprant, tannem porjecheô bhettô haddleô: Poilo, porjechea patkam khatir, bokddo bhettoilo; to marlo ani aplea patkam khatir kel'lem toxench tannem kelem.
16. Uprant, riti pormannem, tannem hom'-bhettechem zonavor,
17. orova borabor bhettoilem. Sokallchê orôv bhettê soit, Tannem êk mutt-bhor pitt ghetlem ani tem vedicher hulpailem.
18. Ekcharachê bhettek tannem boil ani menddro marle. Tachea putamnim rogot haddun tachê lagim dilem, ani tannem tem vedichea charui vattamnim ximpddailem.
19. Aaronan donui zonavoranchi chorob ani bore te kuddke kaddun,
20. boila-menddreache chhatieancher dovorle ani sogllem vedi-xim vhelem. Chorob vedicher hulpaili
21. ani chhatiô ani patthle uzve-pãi, Sorvesporak ek kherit dennem koxem, Moizesan formailolê tê porim iadnikank dilem.
22. Aaronan soglleô bhettô sompoilea uprant, porjê voir aple hat ubarle ani tankam axirvad dilo, ani vedivelo denvlo.
23. Moizes ani Aaron Sorvesporachea Tombunt bhitôr sorle, ani thoinche bhair ieun tannim porjek axirvad dilo, teach borabor Sorvesporacho porzôll porjek dixtti poddlo.
24. Sorvesporan uzo dhaddlo, ani hea ujean hom'-bhett ani chorbechem vedir aslem titlem-i lason gelem. Hem polleun, porjen bob marli ani sorpott poddle.
