1. Aaronachea putamnim, Nadaban ani Abihun, ap-aplim dhumpavnnim ghetlim, tantunt inglle ghale, tosoch inglleancher dhump ghalo, ani Sorvesporak bhettoilo. Punn ho uzo povitr nhoi aslo, kiteak Sorvesporan tankam toxem korunk formailem na.
2. Tedna Sorvesporan aplo uzo dhaddlo, ani thoim Sorvesporachea fuddeant te dog-ui lason mele.
3. Tedna Moizesan Aaronak mhollem, 'Hem-tem Sorvespor sangtalo tem, jedna tannem mhollem, Mhoji seva kortat titleaimnim mhojea povitrtaiek man diunk zai.' Punn Aaronachi zap suttlina.
4. Moizesan Mishael ani Elzafan hankam apoile, he dog-ui Uzzielache put, ho Aaronacho tiv,-ani tankam mhollem, 'Hanga ieat, ani tumchea bapul-bhavanchim moddim povitr Tombuntlim kaddun, tim moidana bhair dovrat.'
5. Te aile, ani tanchea vostrank dhôrun tim moddim ukhol'lim, ani Moizesan formailolê tê porim, moidana bhair vhelim.
6. Uprant, Moizesan Aaronak ani hachea putank, Eleazar ani Ithamar hankam mhollem, 'Tumi dukhant asat mhonn dakhouncheak, tumche kens meklle sôddum nakat, vô tumchim vostram pinzum nakat. Toxem korxat zalear tumi mortoleat, ani Sorvesporacho rag sogllê porjecher uprastolo. Punn tumchea Israel-bhavanchean tanchem dukh korunk zata, jem dukh Sorvesporachea ujean tumcher dhaddlam.
7. Tombuchea darasorxile tumi koddsorum nakat, na tôr tumi mortoleat: kiteak tumi Sorvesporachea telachi makhnni gheun, tumchi bhettounni zalea.' Tôr, tãnnim Moizesan sanglolem toxem kelem.
8. Sorvesporan Aaronak mhollem,
9. Soro vô lagrem pielea uprant, tunvem ani tujea putamnim mhojea Zomatichea Tombunt bhitôr sorchem nhoi; na tor, tumi mortoleat. Ho kaido tujê ak'khê sonstin samballunk zai.
10. Povitr ani Opovitr; xud'dh ani oxud'dh hea donui vostum modem tumi ontor korunk zanno zaunk zai.
11. Ani je soglle kaide ani hukum' hanvem Moizesa udexim tumkam dileat te tumi porjek xikounk zai.'
12. Moizesan Aaronak ani hachea dogam urlolea putank, Eleazar ani Ithamar hankam mhollem, 'Sorvesporak bhettoilolea orovantlem kitem urlam tem vhorat, ani khomir nastana tache undde korat, vedichê kuxik ravun te khaiat, kiteak hem povitr dan zaun asa.
13. Eka povitr zagear ravun tumi tem khaunchem, kiteak Sorvesporak bhettoilolem tantlo ho tumcho ani tumchea putancho vantto. Oxem mhaka Sorvesporan formailolem asa.
14. Punn tumchean ani tumchea kuttumbachean zonavorancheô chhatiô ani tanche patthle pãi, Sorvesporak bhettoilea uprant iadnikancho vantto koso tumkam dovorla, tantlem khaum-iet. Hem tumchean khoinche-i, riti pormannem xud'dh zagear khaum-iet. Kiteak hem tumkam ani tumchea bhurgeam-ballank, Israel porjechê ekcharachê bhettentlem dovorlolem asa.
15. Sorvesporak chorbechem bhettoitat tedna porza chhatiô ani patthle pãi haddta. Hem, Sorvesporan tumkam ani tumchea bhurgeank, sorv kallak formailam tea pormannem, dovorlolem asa.'
16. Farikponnachê bhettechea bokddeak kitem kelem tem Moizesan vicharlem, ani to sogllo hulpailo oxem taka sanglem. Hem aikun, to Eleazar ani Ithamar hea Aaronachea urlolea putancher ragar zalo, ani tannem vicharlem,
17. Hê patkachê bhettechem tumi kiteak, povitr zagear vhorun, khaunk na? Hem povitr khann, ani tem porjechim patkam kaddchê khatir Sorvesporan tumkam dilam.
18. Tachem rogot povitr Tombunt haddunk na dekhun, hanvem tumkam sanglolê tê porim, thoim hê bhettechem tumi khavunk zai aslem.'
19. Aaronan zobab dilo, 'Aiz hanvem farikponnachê bhettechem khel'lem zalear, Sorvesporak tem mandot aslem? Porjen aiz farikponnachi bhett keli, ani hom'-bhett tãnnim haddli, tor-i heô bhirankul vostu mhaka ghoddleô.'
20. Hem aikun Moizes somadhan zalo.
