1. Opovitr uzo Sorvesporak bhettoilo dekhun, Aaronache dog put Sorvespora fuddeant ieun gelea uprant, Sorvespor Moizesa kodde uloilo.
2. Tannem mhollem, 'Fokot tharailolea vellar tujea bhavan Aaronan, Bhov Povitr Zagear podd'ddea patthlean bhitôr sorchem mhonn taka sang, kiteak hanv thoim eka kupant, Korarachea Pettlachea dhampnnea voir dekhol zatolom. Haka pallo dina zalear to mortolo.
3. Tachean Bhov Povitr Zagear, fokot êk paddo farikponnachê bhettek ani êk menddro hom'-bhettek to haddit zalear pãi dium-ieta."
4. Uprant, Sorvesporan hi xikounn dili: Aaron Bhov Povitr Zagear vechê adim, tannem nhaunchem ani iadnikachim vostram nheschim: sonni-lugttachi kobai ani mottvim kolsanvam choddounchim, potto bandcho, ani muddaso-tôp ghalcho.
5. Israel-porjê koddlean Aaron don bokdde farikponnachê bhettek, ani êk menddro hom'-bhettek ghetolo.
6. To aplea ani kuttumbachea patkanchea farikponnak êk boil bhettoitolo.
7. Tea don bokddeank gheun to Sorvesporachea Zomatichea Tombuchea dara-xim vetolo.
8. Thoim, don fator ghevun: ekacher "Sorvesporak" ani dusreacher "Azazelak" oxeô kuru astoleô, to sorti kaddtolo.
9. Sorvesporak poddta to bokddo Aaron patkanchea farikponnak bhettoitolo.
10. Azazelak poddta to bokddo, jivoch, porjechim patkam kaddun uddounchê khatir poilo Sorvesporak bhettoun, magir Azazelak, oronneantlean taka sôddun ditolo.
11. Aplea ani kuttumbachea patkam khatir boil bhettoita tedna, Aaron
12. ujeachê kailint vedivele inglle kaddun ghaltolo ani don mutti-bhor dhump gheun, hem to Bhov Povitr Zagear haddtolo.
13. Thoim Sorvesporachea fuddeant to dhump ujeant ghaltolo, ani hea dhunvran Korarachem Pettul ani tichê voir asa tem Sorvesporachem xinvason lipun urtolem, ani hê porim to morchona.
14. Aplea bottan to boilachem ilem rogot ghetolo ani sat pavtti Korarachea Pettla mukhar dhampnneacher xinvraitolo.
15. Tea uprant, porjechea patkanchea farikponnak to bokddo martolo, tachem rogot Bhov Povitr Zagear haddun tem Korarachea Pettlachea dhampnneacher sat pavtti xitoddaitolo.
16. Hê porim to porjechi sogllio xudh'dhi ani tanchim patkam kaddun, Bhov Povitr Zago xud'dh samballtolo. 'Oxench tannem Tombu mukhar korunk zai, kiteak ho moidanachea mazak urta, ani ak'khem moidan riti pormannem êk xud'dh zago.
17. Aaron Bhov Povitr Zagear hi rit pallunk bhitôr sorta titlo-i vêll, to bhair ie-sor Tombunt anink konnuch ascho nhoi. 'Tannem apnna khatir, aplea kuttumba khatir ani sogllê porjê khatir hi rit pall'lea uprant,
18. to hom'-bhettek vedir vetolo ani ho-i xud'dh samballtolo. Boilachem ilem rogot ani toxench bokddeachem ilem rogot gheun to vedichea charui xingank laitolo.
19. Aplea bottan sat pavtti to tem rogot vedicher xittodaitolo. Hê porim to vedir porjechea patkam mekllo xud'dh ani povitr samballtolo.
20. Aaronan Bhov Povitr Zagea vixim,Tombu vixim ani vedi vixim soglli rit pall'lea uprant, to bokddo Sorvesporak jivoch bhettoitolo.
21. Aple donui hat hea jivea bokddeachê tokler dovortolo, ani porjechem sogllem vaitt, sogllim patkam, ani adniam-bhong kobul kortolo, ani hem sogllem bokddeachê tokler thapun uddoitolo. Magir, tea bokddeak eka mon'xachea tabeant korun, ho taka oronneantlean pois ambuddtolo.
22. Ho bokddo porjechim sogllim patkam apnnacher gheun, pavta thoim pavtolo.
23. Magir, Aaron Tombunt vetolo, iadnikachim vostram sôddun tim thoinch sanddtolo.
24. Tannem magir eka povitr zagear nhaunchem, ani aplim sodanchim vostram nheschim. Tea uprant, to aplea ani porjechea patkam khatir hom'-bhett korunk vetolo.
25. Patkanchea farikponnak bhettoil'lea tea zonavorachi chorob vedicher hulpaitolo.
26. Azazelachea bokddeak oronneant ambddunk gel'lo tea mon'xan aplim vostram dhuvunchim, nhaunchem, ani magir tombu moidanar ieunchem.
27. Farikponnachê bhettechea jea boila-bokddeachem rogot Bhov Povitr Zagear haddlolem, hea donui zonavorank moidana bhair vhorun hulpaunchim. Chambddem, mas, ani zolliô, sogllem hulpaunchem.
28. Zo hem hulpaita to ieun aplim vostram dhutolo, nhatolo ani tombu-moidanar ietolo.
29. Sorv ieunchea kallak, hi xikounn samballchi: 'Satvea mhoineachea dhavea disa, sogllê Israel porjen ani hanchê modem jietolea porkea lokan upas korcho ani kosloch vavr korcho nhoi.
30. Hea disa, tanchea patkanchea farikponnak xudh'dhichi rit pallchi, hê porim te soglle riti pormannem xud'dh astole.
31. Ho tumkam êk bhov povitr dis zatolo, tumi upas korcho ani vavra meklle ravche. He nem' sorv ieunchea kallak samballunk zai.
32. Aplea bapaichea zagear ieta to iadnik, iadniki sonvskarnni gheun, hi xudh'dhichi rit palltolo. Iadnikachim vostram nhesun
33. Bhov Povitr Zago, bakicho Sorvesporacho Tombu, vedir, iadnikank ani sogllê porjek xudh korun ghetolo.
34. Sorv ieunchea kallak he nem' pallche. Ani vorsak êk pavtt, Israel porjek patkantli meklli korcheak hi rit samballchi.' Tôr, Moizesan Sorvesporan formailolem toxem sogllem kelem.
