1. Tombuntlea divlleank zoitunanchem xud'dh tel haddchea vixim Israel porjek hukum' diuncheak, Sorvesporan Moizesak sanglem. Heô divliô tharailolea vellar petthloleô asunk zai.
3. Dôr sanjê Aaron teô pettoitolo, ani sokallim porian teô pettloleô astoleô. Divliô, Bhov Povitr Zagea bhair, Korarachê Arkpettê mukhar podd'ddo asa tea bhair teô astoleô. Pinddkechê-pinddkek hem pallunk zai.
4. Purn bhangarachea divea-sthanar dovorloleô asat teô soglleô divliô Aaron pettoitolo-paloitolo ani tancho poramos kortolo.
5. Gonvachem pitt ghe, ani tache bara undde bhaz, dor-ekachem vozon efachim don doskam.
6. Don vollimnim, sôv-sôv ekê vollin, te dovor purn bhangarachi pati-marlolea mezar, Sorvesporachea Tombunt.
7. Ekê-ekê vollin ilo dhump dovor, hi hom'-bhettek êk kuru koxi zaun astoli.
8. Sodankal, Son'varachea-Son'vara, Sorvesporachea fuddeant he undde ghalunk zai. Sorv kallak ho Israelak kaido.
9. He undde magir Aaron ani tachê sonstiche, ani tãnnim te povitr zagear khaunk zai, kiteak te Sorvesporak bhettoilolea bhov povitr hom' orponnacho-iadnikacho vantto.'
10. Êk monis aslo, bapui tacho Ejiptantlo ani avoi Israel porjentli, tichem nanv Shelomit, Dan-kullientlea Dibrichi dhuv. Moidanar ho monis eka Israel mon'xakodde zhogoddlo. Hea zhogddea modem tannem Sorvesporak xirap ghalo; mhonnttôch, taka Moizesachea fuddeant vhelo,
12. ani eka rakhonndarachea tabeant korun, Sorvespor, taka kitem korchem tem, sangot mhonn ravle.
13. Sorvesporan Moizesak mhollem,
14. Taka moidana bhair vhorat. Zannim ho xirap ghaltana aikolam, tãnnim sotak govai diuncheak, hea mon'xachê tokler hat dovorche, ani magir soglli porza taka fatraun martoli.
15. Uprant, Israel porjek sang, ki, "Devak xirap ghalta tannem tacho porinam' bhôgunk zai
16. ani taka moronn favo. Israel porjentlo vô hanchê modem jietolo porko monis Sorvesporak xirap ghalta taka sogllê porjen fatraun marcho.
17. "Monxak jivexim marta tacho jiv kaddcho,
18. "ani dusreachê mon'zatik marta tannem tichê bodlek dusri diunk zai. Mhonngê, jiv jivan farik korcho.
19. "Konnui dusreak dukhoita, taka teach mapan toxench korchem.
20. Ek hadd môddtoleak, tachem-i ek hadd môddchem; dollo fôddtoleacho êk dollo fôddcho; êk dant uddoitoleacho êk dant uddouncho. Zo dusreak mar dita, taka-i toch mar diuncho.
21. Mon'zatik martolean, tichê bodlek dusri diunchi; punn mon'xacho jiv kaddta tacho-i jiv kaddcho.
22. Ho kaido tumkam soglleank lagta, Israelak toso hanchê modem jietolea porkea-lokak, kiteak hanv tumcho Sorvespor. " '
23. Moizesan sanglolem tem aikun, Israel-porjen hea mon'xak moidana bhair vhelo, ani taka fatraun marlo. Tôr, Israel porjen Sorvesporan Moizesak formailolem toxem kelem.
