1. Israel porjen pallchê khatir, Sorvesporan Moizesak he kaide dile.
2. "Êk angovnn pallchê khatir konn-ui eka mon'xak Sorvesporak bhettoila asot, hea mon'xak soddoun gheum-ieta,
3. "Mondirachê dor asa tea pormannem he duddu farik korunk zai: Zanttea dadleak, vis tem satt vorsam porian: rupeache pon'nas shekel.
4. Mhatarê bailek rupeache tis shekel.
5. Tornne-dhaktteak (purus), panch tem vis vorsanchea dadleak: rupeache vis shekel. Panch tem vis vorsanchê ostorek: rupeache dha shekel.
6. Purus bhurgeak, panch vorsam sokol: rupeache panch shekel. Stri-burgeak: rupeache tin shekel.
7. Satt vorsam voir dadleak: rupeache pondra shekel. Satt vorsam voir ostorek: rupeache dha shekel.
8. "Angovnn kel'li to monis chodd gorib zait, ani tharailolem mol tachean farik korunk zaina, hea mon'xak iadnika-xim haddcho, ani iadnik, tachi tank polleun, tem mol sokla denvoitolo.
9. "Ti angovnn eka zonavora vixim zait zalear, tem Sorvesporak kel'lem dan-dennem povitr zaun asa, hea khatir,
10. angovnn kelea tachean dusrem zonavor tachê bodlek diunk zaina. Oxem korit zalear donui zonavoram Sorvesporachim.
11. Punn ti angovnn riti pormannem oxud'dh zonavora vixim zait zalear, hem dan-dennem Sorvespor mandun ghena; dekhun, tea zonavorak to iadnika-xim haddtolo.
12. Iadnik tea zonavorachem mol tharaun ghetolo, ani jem iadnik tharaita tem tannem farik korchem.
13. To monis tem zonavor viktem gheunk sôdit zalear, tannem tachem mol ani hacho panchvo vantto farik korchem.
14. "Konnui-eklo aplem ghor Sorvesporak bhettoita tedna, iadnik tea ghorachem vaitt-borem polleun mol tharaitolo, ani to tharaita tem tachem mol zatolem.
15. Punn to monis aplem ghor viktem gheunk sôdit, tannem tachem mol ani hacho êk-panchvo vantto, farik korchem.
16. "Zôr eka mon'xan Sorvesporak aplê zomnicho kuddko bhettoila, tannem, tea kuddkeak kitlem bim lagta tea mapan mol tharaunchem; ani tea biachi dôr ek homer, zovachem mol pon'nas shekel.
17. "Suttkechem Voros vochona fuddem to hi bhettouni korta zalear, tannem sogllem mol farik korchem.
18. Punn tea uprant zalear, iadnik, kitlim vorsam Suttkek urleant tea pormannem tem mol tharaitolo.
19. "Punn to monis tem xet porot ghevunk sôdta zalear, tachem mol ani hacho êk-panchvo vantto farik korchem.
20. To, Sorvespora thaun porot gheunchê adinch, dusreak vikta zalear taka porot-gheuncho hok'k mellona.
21. Fuddlem Suttkechem Voros ieta tedna, ti sorvankal Sorvesporachi zomin zatoli: ti iadnikak poddtoli.
22. "Eka mon'xan viktem ghetlolem xet Sorvesporak tem bhettoita zalear,
23. Suttkechea Vorsak kitlim vorsam urleant tea pormannem iadnik tachem mol tharaitolo, ani tannem teach disa tem farik korunk zai; ani te duddu Sorvesporache.
24. Fuddlem Suttkechem Voros ieta tedna, poilea dhoniak vô tachê sonstik tem vetolem.
25. Mol mondirachi dor asa tea pormannem tharaun gheunchem.
26. "Eka zonavorachem poilem por, tem Sorvesporachench zaun, konnachean tem Sorvesporak ek khoxechem dan korunk zaina. Paddkulo, menddurlo, ani bokuddlo, he soglle Sorvesporache,
27. punn oxud'dh zonavoracho malgoddo tharailolea molak ani hache eka-panchveak to vikto gheuncho. Tharailolea molak dusrea-konnakui to vikum-iet.
28. "Tôr, prostav nastana konnem-i eklean mon'xak zanv zonavorak, vô zomin Sorvesporak bhettoilam zalear, tem porot ghevunk zaina; tem sorvankal Sorvesporachem.
29. Mon'xak legun porot gheunk zaina; tacho jiv kaddunk zai.
30. "Zomnik pikta tacho, orôv zanv follam, êk dhavo vantto Sorvesporacho.
31. Konnui-eklo tem porot gheunk sôdta zalear, tannem tharailolem mol ani hacho êk-panchvo farik korcho.
32. "Dha-antlem ek poslolem zonavor Dhoniachem. Zonavorancho hixeôb kortat tedna, tancho êk dhavo vantto Sorvesporak.
33. Ho hixeôb kortana, dhoniachean borim-borim apnnak dovorunk zaina; vô ekak dusreachi bodli korum nozo. Hê porim, bodli ani bodollam tem, donui Sorvesporachim ani tim porot gheunk zaina. " '
34. Sorvesporan, Sinai Dongrar, Moizesak he kaide dile.
