1. Sorvesporan Moizesak sanglem,
2. Israel porjek sang, "Hanv Sorvespor Tumcho Dev.
3. "Ejiptant tumi eka kallar jiel'leat tea lokachi, vô atam hanv tumkam vhortolom tea Kanaan-ganvantlea lokachi dekh gheum nakat, vô tanchê porim tumi jieum nakat.
4. Hanv tumkam ditam tea mhojea kaideank pallo diat. Hanv Sorvespor, Tumcho Dev.
5. "Hanv tumkam dakhoitam ti chal ani kaide samballat; hê porim tumi tumcho jiv rakhtoleat. "Hanv To Sorvespor.
6. "Sorvesporan he nem' tharaile: Tumchea soiream kodde lingi-ekvott korum nakat.
7. "Tumchê avoikodde toxem korun, tumchea bapaik beman korum nakat. Tumchech avoik beman korum nakat.
8. "Tumchea bapaichea dusrea bailam kodde toxem korun, tumchea bapaik beman korum nakat.
9. "Tumchê bhoinni kodde vô tumchê sovti-bhoinni kodde toxem korum nakat ekach ghorant vô dusrea zagear ti voir sorli-i zalear.
10. "Tumchê natikodde toxem korum nakat; ho tumkanch êk beman zatolo.
11. "Tumchi ordi-bhoinn hi-i tumchich bhoinn, hichê kodde toxem korum nakat.
12. "Tumchê kaku kodde vô mavxe kodde toxem korum nakat. Kiteak tim tumcheach masa-rogtachim.
14. "Tumchea tiva-mamachê bailêkodde toxem korum nakat; hi-i tumchi mavxi-mami.
15. "Tumchê sunêkodde,
16. "vô tumchea bhavachê bailê-kodde toxem korum nakat.
17. "Jê bailêkodde tumi ekvôtt kel'lo, tichê dhuvê vô nati kodde toxem korum nakat, him ghoddiê tumkam soirim lagot ani dekhun ekdom vaitt.
18. "Tumchi bail jivi astana, Tumchê bailechê bhoinnik, tumchi dusri bail korun gheum nakat.
19. "Ostorek mhoineachem zatana tichê-xim kuddicho ekvôtt korum nakat, kiteak riti pormannem ti oxud'dh.
20. "Dusreachê bailêkodde toxem korum nakat, hê jin'xim, riti pormannem tumi oxud'dh zatoleat.
21. "Molek-devachi puza korcheak, tumchea burgeank sôddun dium nakat, kiteak Sorvesporak ho êk vhodd beman zatolo.
22. "Dadlea-dadlean toxem korchem nhoi; hacho Devak kanttallo ieta.
23. "Dadlean zanv bailen zonavora kodde toxem korchem nhoi; hi vikott kornni tumkam oxud'dh kortoli.
24. "Oslea kortubam vorvim tumi oxudh zaunche nhoi; videxamnim apnnakuch oxud'dh korun ghetlam, hankam Sorvespor ganvantle bhair ghaltolo, ani tancho ganv tumchea tabeant kortolo.
25. Aplea kortubam vorvim tãnnim ho ganv oxud'dh korun sôddlo, hea khatir, Sorvespor tankam khast laita ani hangasorle dhanvddaita.
26. "Hea khatir tumi mhojeô vidhi ani nem' pallche ani soglle tumi, Israel porza zanv, vô tumchê modem jietole porke te zanv, Devachea sorv updesank ani formonnank khalte zaunk zai;
27. kiteak tumchea adinchea hea desant ravpi lokamnim ollxik adarun ho ganv oxud'dh kelo tê porim tumi korunk favona.
28. Ani tednach, ho ganv tea lokank vittelo toso, tumkam vittieunchona.
29. Konnui osleô vostu korta to Devachê porjentlo zaunchona, hem tumi zannot.
30. Ani Sorvesporan mhollem, "Hanv ditam tea kaideank khaltim zaiat, ani hanga adim asle tea loka sarkim zaun, tumkanch oxud'dh korun ghevum nakat. Hanv Sorvespor, tumcho Dev." '
