1. "Patkachea farikponnachi bhett korunkuch zai: Konn-ekleak neai-sobhent govai diunk apoila, ani jem tannem dekhlam vô aikolam tem to sangun dina, tedna taka tacho porinam bhôgcho poddta.
2. Konn-eklo nokllo astana mhellem tem afuddta, mhonngê, ek mel'lem ranvott zonavor vô gorvam-vasram vô sorpottun bhonvtolem jivannem hankam afuddta to mhello zata ani taka tem gomona fuddem to guneanvkari zatolo.
3. Konn-eklo nokllo astana, mon'xanchem mhellem afuddta, to soirannant iena fuddem guneanvkar zata.
4. Konn-eklo hurmuttaien nokllo astana, borea vô vaitta khatir, soput gheta, taka kollona fuddem to guneanvkari zata.
5. Eka guneanvkarean aplem pap kobul korunk zai,
6. ani farikponnak tannem êk stri-menddro vô bokddi haddun Sorvesporak bhett korunk zai. Tachea farikponnak iadnik ti bhettoitolo."
7. "Menddro-bokddi haddunk konnak tankona tannem, farikponnak, don kovdde vô parve haddche: êk farikponnachê bhettek ani dusro hom'-bhettek.
8. To iadnika-xim haddtolo, ani ho, poilê suvater, farikponna khatir bhettoitolo: Tachi gomtti moddtolo punn tokli oddun kaddchona,
9. ani ilem rogot vedichê kuxik ghaltolo; bakichem sogllem vedichea pãia-xim uddoitolo. Hem tachea patkachea farikponnak.
10. Magir, tharailam tea pormannem dusrea pakhrachi hom'-bhett kortolo. Hê porim iadnik bhett kôrtoch, tea mon'xachem patok bhogsotolem.
11. Don kovdde vô parve haddunk taka tank na zalear, tannem efacho dhavo vantto pitt haddchem punn tantunt tel vô dhump ghalchim nhoi, kiteak ti farikponnachi bhett.
12. To iadnika lagim haddun ditolo, ani ho tantlem ek mutt-bhor gheun, êk khunna koxi, Sorvesporak bhettoitolo. Hê vorvim tachem patok bhogson vetolem.
13. Hê toren iadnik tea mon'xachea farikponnak bhett korta ani tachem patok bhogsota. Orovachê bhettê porim, urlolem pitt iadnikacho vantto. " '
14. Sorvespor Moizesa lagim uloilo ani mhollem:
15. Konnui-eklo, nokllo astana Sorvesporak povitr dan-dennem diunk chukta, hea farikponna khatir to êk menddro vô bokddo, khot naslolo, haddtolo hachem mol Devsthanant-lea rupeachea xekela pormannem tharaunchem -
16. To farik korunk chukla tea bhair tacho êk panchvo vantto tannem diuncho.
17. Konnui-eklo, nokllo astana bhair, Sorvesporacho khoincho-i updês môddta, to guneanvkari ani hea pasot tannem farikponn diunk zai.
18. Hea farikponnak tannem êk purus khota-mekllo menddro vô bokddo haddcho, ani tachem mol Dev-sthanachê dorê pormannem tharaunchem. Iadnik patkachea farikponnak tachi bhett kortolo, ani tachem patok bhogsotolem.
19. Hê porim, Sorvespora add adarlolea patkachem farikponn zata.'
