1. Israel porjen tem pallunk, Sorvesporan Moizesak ani Aaronak hi xikounn dili.
2. Israelachea lokank sang: "Dhortorevelea sogllea zonavoram modlea zanchem mas tumi khanvchem te he:
3. "Zonavorantlea zanche khur veglle, zaum vantlole asat ani rovont korta tem zonavor tumchean khaum-iet,
4. punn je fokot rovont korta punn tacho khur vegllo zal'lo na; mhonn to tumi oxud'dh somzuncho
5. punn hunttam, sav, vô sonxe tumi khaunche nhoi. Him rovont kortat punn tacho khur vegllo zal'lo asona, tankam fanttlolim getam nant;
6. mhonn tovui tumi oxud'dh somzuncho.
7. Dukor khaunche nhoi, te oxud'dh; tanchim getam fanttleant punn rovont korinant.
8. Hea zonavorank afddum nakat, vô tanchea moddeank legun hat launcho nhoi.
9. "Khovllam-pakhotte aslolem nustem, jem doriant vô nhõit jieta, tem tumchean khaum-iet,
10. "punn udkantlem-i zalear, khovllam-pakhotte naslolem tumi khaunk favona.
11. Hem sogllem tumkam oxud'dh zaun astolem. Tankam afddum nakat ani mel'leank legun hat launcho nhoi.
12. Khovoll ani pakhotto naslolo udkantlo sorv jiv tumkam oxud'dh.
13. "Ani suknnim-pakhram tumchean khaum nozo tim him: ghonn, gidd ani savlle;
14. gar vingoll-vingoll zatiche sosanne,
15. sobar zatiche kavlle,
16. natkam, kogull ani pogdde;
17. kallo gidh, xamrok ani kensar;
18. dhovem gubodd, kannkolli, gidh;
19. sobar zatinchim bhokim, bollar ani pakhe.
20. "Zomnir char pãiache zomnir sorpotlole sorv pakhtteancho jiv oxud'dh,
21. uddta to jiv nhoi:
22. toll, dhefe ani oslem tumchean khaum-iet.
23. Punn zomnir chorta to pakhotteancho jiv khauncho nhoi.
24. "Jea mel'lea zonavorank hat laun, tea disachi sanj pasun eklo oxud'dh urta tim him:
25. getanchim sorv zonavoram, kaddun fanttlolea-getanchim ani ronvot kortat tim;
26. sorv char pãianchim ani danvleô aslolim. Konnui tankam hat laita tannem aplim vostram dhunvchim, punn to tea disachi sanz porian oxud'dh urtolo.
27. Char paiancher cholpi sogllea zonavorantlim jim aplea davkulacher cholta tim sogllim tumi oxud'dh somzuchem; tanchea moddeank zo konn afuddtolo tannem sanz vêll meren oxud'dh ranvchem.
28. Zo tanchim moddim ukoltolo tannem apli mustaiki umllun sanjêvêll meren oxud'dh ranvchem; tim zonavoram tumi oxud'dh somzuchim.
29. Bhuiencher sorpottpi zonavorantlim tumi oxud'dh somzuchi ti him: "Chichandur, undir, kole-undir,x xirleô ani oslem sogllem oxud'dh.
30. Chopai (eke bhaxechi pal), pal, gar, sandda ani guhiro sod'ddo.
31. "Tankam vô mel'leank legun hat laita to sanz porian oxud'dh urtolo.
32. "Ani kiteacheruch tim morun poddtat, tem sogllem oxud'dh zatolem. Zanv tem lugott, lankudd, chambddem, vô dusrem kitem-i. Tem udkant kaddchem, punn sanz porian tem oxud'dh;
33. Tim morun, matiechea aidonant poddlear, tea aidonant asa tem oxud'dh zata, ani tem aidon fôddun uddounchem.
34. Horxem xud'dh jevonn-pivonn, tea aidonantlem udok poddlear oxud'dh, ani tea aidonantlem udok pieunk oxud'dh.
35. Mel'li vost poddta titlem-i oxud'dh zata; matiechi chul-xigddi môddun uddounchi,
36. punn êk bãi vô zhor, mel'li vost tantunt poddli zalear oxud'dh zaunchina.
37. Vomp'pak toiar dovorlolem bim tê vostun oxud'dh zaunchem na.
38. Punn tench bim udkant fugonk ghal'lem astana, tê vostun oxud'dh zatolem.
39. "Jem zonavor horxem khaum-iet, punn tem morun konnui taka hat lait to, sanz porian oxud'dh urtolo.
40. Ani hea zonavorachem kitench khata tannem aplim vostram dhunvchim, punn sanz porian to oxud'dh urtolo; mel'lem moddem ukhlun vhorta tannem aplim vostram dhunvchim punn sanz porian to oxud'dh urtolo.
41. "Bhuiencher sorpottpi sogllim zonavoram bhurxim asat; tim khaunchim nhoi.
42. Ani zomnir chortat, vô char-odik pãi asun choltat te supurle jiv tumi khaunche nhoi. Karonn tim bhurxim asat.
43. Oslem kitench khavun tumi oxud'dh zaum nakat.
44. Hanv tumcho Sorvespor, ani tumi povitr zaunk zai, kiteak hanv povitr.
45. Hanv tumcho Sorvespor, ani tumcho Dev zaunchê khatir, hanvem tumkam Ejiptantlim bhair kaddun haddleant. Tor, tumi povitr ravunk zai, kiteak hanv povitr."'
46. Mhonnttôch, sorv zomnivelea vô udkant bhonvtolea jiv-jivonna vixim he kaide tumkam dileat.
47. Riti pormannem kitem xud'dh ani kitem oxud'dh; vô kitem tumchean khaum-iet vô khaum nozo, hem sogllem tumi sarkem vollkhun gheunk zai.
