1. "Opradhachea farikponna khatir, he nem'-kaide samballche: "Hea vixim keloleô bhettô Bhov povitr.Tôr he kaide samballche:
2. Hom'-bhettê porim, hem zonavor vedichê ut'torek marunk zai, ani tachem rogot vedichea charui bazumnim uddounk zai.
3. Soglli chorob kaddun vedir bhettounchi; motti xempddi, pottantli chorob,
4. chorbê-soit mutpariô, ani kallza-figdacho boro to kuddko,
5. sogllem chorbê soit vedicher hulpaunchem. Hi êk opradachea farikponnachi bhett.
6. Iadnikachea kuttumbantlea dadlea-lokan tem mas khaum-iet; tem povitr, ani eka povitr zagear tem khaunchem.
7. "Hê ani patkachea farikponnak kelolê bhettek lagu zata tem hem; Hi bhett kortolea iadnikak tea zonavorachem mas diunchem.
8. Hom'-bhettechea zonavorachem chambddem bhett kortolea iadnikak.
9. Orovachê bhettent, bhattient zanv tollear ani xigdder bhazlolem sogllem bhett kortolea iadnikak.
10. Dôr-êk orovachi bhett, tel misôll korun vô suki, Aaronachea ritichea iadnikam modem ti ek-sarki vanttchi.
11. "Sorvesporak ekcharacheô bhettô kortat tedna he nem' samballche:
12. "Dhin'vasnnechi bhett kortat zalear, bhettechea zonavora borabor khomir naslolo unddo haddcho: pitt-tel misôll kell'lo datt unddo, vô bexttem tel lavun kel'lo biskuti sarko.
13. Tea bhair, khomirache-i undde haddche.
14. Dôr-eka jin'sachea unddeacho êk vantto Sorvesporak ek kherit dennem koxem diuncho, ani ho zonavorachem rogot vedi-xim xinvraita tea iadnikak.
15. Hea zonavorachem mas teach disa khaunchem, dusrê sokallink tem dovorchem nhoi.
16. "Angovnn pallchê khatir, vô khoxechi bhett zalear, sogllem mas teach disa khaunchem, punn urtatem dusrea disa khanvchem.
17. Tisrea disak urlem zalear tem hulpaunchem.
18. "Konnui tisrea disa khait zalear Dev ti bhett mandun gheunchona. Nhoich ti mandchina, bogor ti êk mhelli bhett zatoli ani tem mas khatolean tacho porinam' bhôgcho poddtolo.
19. "Oxud'dh vostuk tenkta tem mas khaunchem nhoi, punn hulpaunchem. Horxem, riti pormannem xudh asa tachean tem mas khaum-iet;
20. "punn mhellea mon'xan tem khait zalear, to Devachê porjê bhair poddtolo.
21. Tech porim, zannem kitench mhellem, zonavor, zanv monis, afuddlea uprant tem mas khelem zalear, to Devachê porjê bhair poddtolo." '
22. Sorvesporan, Moizesa udexim, porjek hi xikounn dili:
23. "Gorvanchi vô menddram-bokddeanchi chorob khaunchi nhoi.
24. Apxinch mel'lea vô zonavoran marloleachi chorob khaunk upkarona punn koslea-i dusrea upeogak ti laum-iet.
25. Sorvesporak hom' koso bhettoilolea zonavorachi chorob khait zalear, to Devachê porjê bhair poddtolo.
26. Israel porza khoinsorui ti asum, suknneam vô zonavoranchem rogot tinnem khaunchem nhoi.
27. Hea kaideacher add ieta to Devachê porjê bhair poddtolo. " '
28. Sorvesporan, Moizesa udexim, porjek hi xikounn dili:
29. "Ekcharachi bhett kortolean, ek kherit dennem koxem Sorvesporak,
30. apleach hatamnim tem haddun diunchem. Zonavorachi chorob ani tachi chhati, ek kherit dennem koxem, to Sorvesporak ditolo.
31. Iadnik ti chorob vedir hulpaitolo, punn ti chhati iadnikak.
32. Zonavoracho patthlo uzvo pãi, ek kherit dennem koxem,
33. hê bhettechem rogot ani chorob Aaronak ani tachea kullientlea iadnikank.
34. Zonavorachi chhati ani tacho patthlo uzvo-pãi, ek kherit dennem koxem Israel porjêkodde magun ghevun, Sorvesporan tem iadnikank dilam. Sorv ieunchea kallak, Israel porjen tem Aaronak ani tachea kullientlea iadnikank diunk zai." '
35. Ho Sorvesporak bhettoilolo jevnnacho vantto, sonvskarnnêchea disa, Aaronak ani tachea putank dil'lo.
36. Tea disa, Sorvesporan Israel porjek hukum' dil'lo, ki tãnnim ho vantto tankam diuncho. Ani sorv ieunchea kallak Israel porjen to samballcho.
37. Tôr, hom'-bhettek, orovachê bhettek, ani ekcharachê bhettek hi zaun astoli xikounn.
38. Oronneant, Sinai Dongrar, Sorvesporan porjek bhett korunk formailem teach disa, tannem Moizesak he nem' ani xikounn dili.
