1. Zomatichea-Tombunt thaun Sorvesporan Moizesak apoilo ani tachê udexim
2. Israel porjek bhettê-vixim he kaide dile: "Konnui eklo zonavorachi bhett korta tedna, tachean ti aplea gorvantli vô menddram-bokddeantli vinchun kaddum-iet."
3. "Aplea gorvantlem ek zonavor hulpailolê bhettek ghalta zalear, tea paddeak koslench khot aschem nhoi. Tannem taka Sorvesporachea Tombuchea darar gheun ieuncho ani Sorvesporachi maniotai magchi.
4. Hea mon'xan tea hom'-boliechê tokler aplo hat dovorcho, ani tachea patkanchea farikponnak to proson'n zatolo.
5. Thoinch tannem tea boilak marcho, ani Aaronachê ritiche iadnik tachem rogot Sorvesporak bhettoitole, ani magir vedichea charui vattamnim, Tombuchea dara-xim, tem xinvraitole.
6. Magir to boilachi chambddi kaddtolo, ani masache kuddke kortolo,
7. ani Aaron iadnikache put tedna vedicher lankddam dallun tankam uzo laitole.
8. Katorleat te masache kuddke, toklê ani chorbê-soit te ujeant ghaltole.
9. Tea monxan boilachea pottantlem ani patthle pãi dhuvun diunk zai, ani iadnik vedir soglli bhett hulpaun uddoitolo. Hê bhettecho pormôll Sorvesporak mandta."
10. "Menddram-bokddeantlem zonavor zalear, tannem khot naslolem purus-zonavor bhettounchem.
11. Tannem tem vedichê ut'torêchê vatten marchem, ani iadnik tachem rogot vedichea charui vattamnim xinvraitolo.
12. Tea mon’xan zonavorache kuddke korun ditôch, iadnik tem mas, toklê ani chorbê-soit ujeacher dovortolo.
13. Tea mon’xan zonavorachea pottantlem ani tache patthle pãi dhuvun diunche, ani iadnik tem sogllem Sorvesporak bhettoun vedicher hulpaitolo. Hê bhettecho pormôll Sorvesporak mandta."
14. "Konn-ek suknnem bhettoita zalear, tem êk kovddo vô parvo zaunk zai.
15. Iadnik tem vedir bhettoitolo, tachi gomtti pilltolo, tachi tokli vedir hulpaitolo, ani gollta tem rogot vedi bhair êke kuxik ghaltolo.
16. Tacho ghanzo ani pakham kaddun tem sogllem vedichê udentichê vatten, gobor dovortat thoim uddoitolo.
17. Tachea pakhotteank dhôrun, modim chirun ang ukttem kortolo punn tache pakhotte toddchona, ani ak'khench tem vedir hulpaitolo. Hê bhettecho pormôll Sorvesporak mandta." '
