1. Sinai dongrar Moizesa kodde uloun Sorvesporan mhollem:
2. Israel porjek hi xikounn diunk taka formailem. "Sorvespor tumkam ditolo tea ganvant tumi bhitôr sortôch, dôr satvea vorsa tumchem xet vompche nant.
3. Sôv vorsam porian, tumchem xet vompat, molleanchi poramos korat, ani tanchem pik bhôgat.
4. Punn satvea vorsa xet-molle Sorvesporak bhettoilole asum-di.
5. Apxinch thoim pikta tem tumi lunvchim nant; molleantlem kitench paddche nant; xeta-molleak hem voros visovachem zaum-di.
6. Vompunk na, toriastana tem tumkam, tumchea chakrank, tumchea vavraddeank, tumchê modem jietolea pordexank,
7. tumchea poslolea zonavorank, ani tumchea xetant firtolea ran'votti mon'zatink goroz tem jevunk-khavunk melltolem. Sogllem thoim pikta tem khaiat, tem punzaun dovorchem nhoi.
8. "Tumi vorsanchim sat satollim mezunk zai sat pavttim sat vorsam; oxem sat pavttim vorsanchim sat satollim mezun, ekunnpon'nas vorsam zatat.
9. Satvea mhoineachea dhavea disa tumi tuturi vazounk laitoleat. Farikponnachea Disa ak'khea desant tumi tuturi vazounk laitoleat.
10. Hea pon'nasavea vorsak tumi povitr voros mhonnttoleat ani desant ravtat titleank-ui suttka porgôtttoleat. Hem voros tumkam utsovachem; hea vorsa tumchê modlo zonn-eklo ap-aplea purvozanchea bhatta-vittant ani ap-aplea ganv-ghora porto ietolo.
11. Hem pon'nasavem voros tumkam utsovachem voros zatolem; hea vorsa tumi vompchim nant, na mhonn xetant apxinch kirlota tem lunvchim nant, bhenddunk naslolea dakvalinchim follam ektthaim korchim nant.
12. Ho utsôv tumkam povitr zaunk zai; xetam-bhattantlem utpon zata tench tumi khatoleat.
13. "Hea utsovachea vorsa tumchê modlo zonn-eklo ap-aplea purvozanchea bhatta-vittant portotolo.
14. Tumchê modem vikrecho vevhar kortat zalear, konnench peleak nuksann korchem nhoi.
15. Tujea bhava koddlem viktem ghetai zalear, utsova uprantlim vorsam mezun tunvem tem gheunchem: pik mell'lolim vorsam dhôrun vikrechi dor to tuka tharaitolo.
16. Jitlim vorsam chodd, titli dor vaddounchi, ani jitlim vorsam thoddim titli dor denvounchi, kiteak khorem mhollear to tuka itlim-itlim pikam vikun dita.
17. Konnench aplea peleak nuksann korchem nhoi, punn tumchea Devachem tumi bhem dhôrchem; kiteak Hanv Sorvespor tumcho Dev."
18. "Tumi xantin hea ganvant jieunchê khatir, Sorvesporache soglle updes ani hukum' pallat.
19. Bhuim aplem pik ditoli, tumkam goroz tem melltolem, ani xantin jietoleat.
20. "Punn konn-ui ghoddie oxem vicharit, vompchem nhoi zalear hea satvea vorsa kitem khaunchem.
21. Sorvespor sovea vorsant aplo axirvad ghaltolo, ani don vorsanchem pik ekach vorsant ditolo.
22. Atthvea vorsa tumi porot vomptoleat tedna, sovea vorsachem pik tumi ozunui khatoleat, ani pikache dis ie-sor goroz tem khavunk tumchêkodde astolem.
23. "Tem bhatt-bens sorvankal tumi vikun diunchem nhoi, kiteak tem tumchem nhoi; tem Sorvesporachem, ani tumi-i porkeach loka sarke, he-i tim vosoitat.
24. Tumchea hatant asloli zomin soddoun divpak, viktoleacho hok'k mandun gheunk zai.
25. Israel porjentlo konnui-eklo gorib zala, hea khatir tannem aplem bhatt-bens vikchem poddta, tachea lagxilea soirean tem porot viktem gheunchem.
26. Taka lagxilo soiro konnuch na zalear, punn magir to ilo astig zaunk pavla ani tem viktem gheunk taka tank asa, tedna tachean tem porot ghevum-iet.
27. Mhonnttôch, tannem viklolem tea mon'xak devo urleat tea vorsanchem mol farik korchem poddtolem.
28. Punn tachêkodde tem porot viktem gheunk ghoddona zalear, poilem ghetlolem tachêkodde sogllo kall porian tem urtolem.
29. "Vonttim bhitôr aslolea xarant aslolem ravpachem ghor konnui viklem zalear, viktoleachean tem vorsa modem portem ghevunk zatolem.
30. Punn voros bhorlea uprant, viktem ghevpak taka anink hok'k na, tem ghetoleachem ani tachê sonstichem zatolem sorv kallak; Portun-divpachea Vorsa tem porot mellchem na.
31. Punn vonntim bhitôr naslolim kheddea ganvchim ghoram, uktea mollar aslolea porim zatolim, tankam sôddounk hok'kh asa ani utsova somoiar vikto ghevpi tim sôddun ditolo.
32. "Toriastana, Levitachean (Levichea kullachea mon'xan) aplea khas xarant khoinchea-i kallar tem viktem gheunk zatolem.
33. Zôr êk Levit hea xarantlem aplem ghor vikta ani tannem tem portun viktem gheunk na, portun diupachea vorsa, tem taka porot melltolem, kiteak Israel-porjê modem Levitanchea xaramnim ghoram sorvankal tanchem bens.
34. Punn hea xaramnim chorvachi zomin vikunk zaina; hi sorvankal tanchem bens.
35. "Israel porjentlo tumcho êk sezari gorib zala ani udarposonnak kãich na, tumi taka goroz tem, eka porkea mon'xak vô soireak ditat tê porim diunchem, ani taka tumchê-xim ravum-di.
36. Punn, hea khatir, taka vavrak launcho nhoi, vô kolantor gheuncho nhoi.
37. Usnnem ditat tancho kolantor gheum nakat, ani jevnna-khannacho mhal viktat tacher faido kaddum nakat.
38. Ho Sorvesporacho, tumchea Devacho, updes; tannem tumkam Ejiptantlim bhair kaddun haddleant, ani tumcho Dev zaunchê khatir tumkam Kanaan-ganvant pavoileant.
39. "Konnui sezari itlo gorib zalo, ki, tannem tuka apnnakuch chakôr koso vikun dilo zalear, tunvem taka chakra porim vaurak launcho nhoi.
40. Suttkechem voros ie-sor, taka tuzo bhaddeacho manaim koso tuzo vavr korum-di.
41. Magir to aplea bhurgeam sangata, purvozanchea ghora ani aplea kuttumbant vochum.
42. Soglli Israel porza Sorvesporache sevok zaun asat, ani tannem tankam Ejiptantlim bhair kaddleant; tankam chakor koxe vikun gheunche-kaddche nhoi.
43. Tankam dharunnaien lekhum nakat, punn Devak khaltim ravat.
44. "Tumkam chakranchi goroz asa zalear, tumchê sorvbhonvtichea desantlim gheiat.
45. Tumchê modem porko-lôk asa tancheam-i bhurgeank tumchean gheum-iet. Him bhurgim tumchea ganvant zolmotôch, khas tumchim chakram korum-iet,
46. ani aso-sor tumchea bhurgeank dium-iet. Punn tumchea Israel-bhavank tumi toxem korunk favona.
47. "Tumchê modem jietolo êk porko monis girest zalo, ani Israel porjentlo itlo gorib zalo, ki, apnnakuch tea porkea-girestak vô tachea kuttumbant-ekleak vikun dita,
48. zalear-ui taka porot vikto gheum-iet. Tachea eka bhavachean,
49. vô tivachean, vô chulot-bhavachean, vô dusrea soireachean taka porot vikto gheunk zata; vô to apunnuch zôddta zalear, tachean apli suttka vikti gheunk zata.
50. Zannem taka vikto ghetla, tacho tannem somoz gheuncho, ani Suttkechem Voros ie pasun kitlim vorsam urleant tea pormannem, bhaddea-manaiak kitem farik kortat tea molan tachê suttkechem mol tharaunchem.
51. Ani vorsam baki urleant tea hixban ghetlolea molacho êk vantto porot diuncho,
53. vorsachea disvoddeachê doren, ogllem-unnem. Ani tachea dhonian tachê thaim dharunnai dakhounchi nhoi.
54. "Hê porim tachi suttka zaina zalear, taka ani tachea burgeank ieunchea Suttkechea Vorsa suttka diunk zai.
55. Israel porjentlo sorvankal chakor urum nozo, kiteak soglli Israel-porza Sorvespora-Devache chakor. Tannem tankam Ejiptantlim sôddoun haddleant; Hanv Sorvespor tumcho Dev." '
