1. " Konn-Eklo Sorvesporak orovachi bhett korunk sôdta zalear, ttannem to orôv poilo dollun tachem pitt korunk zai. Tantunt ilem tel ani dhump ghalunk zai
2. ani tem haddun Aaronachê ritichea iadnikam kodde diunchem. Seva korunk asa to iadnik tea pitta-tela-dhumpachea misollantlem êk mutt-bhor kaddtolo, ani bhettechi kuru koxi, tem vedir hulpaitolo. Hê bhettecho pormôll Sorvesporak mandta.
3. Urla to vantto Aaronak ani tachea putank vetolo; ti êk Bhov povitr vost kiteak Sorvesporachech bhettentli ti kaddlea."
4. "Bhattientlo unddo zalear, tantunt khomir asunk favona. Pitt-telan misôll kel'le vhoddle undde zaum-iet; vô fokot telacho xinvôr marun kel'le biskut-undde zaum-iet."
5. "Xegdder bhazlolo zalear, to pittant ilem tel misoll korun punn khomir nastana bhazcho.
6. Bhettounk vhortat tedna, to murddun tachi pudd korchi ani tantunt tel vôtchem ani sogllem bhettounchem."
7. "To tollear bhazla zalear, telan ani pittan korcho."
8. "Sorvesporak bhettounk to iadnikakodde diuncho ani ho vedicher vhortolo.
9. Bhettechi kuru koxi, iadnik tantlem ilem kaddtolo ani vedir hulpaitolo. Hê bhettecho pormôll Sorvesporak mandta.
10. Urlolo vantto Aaronak ani tachea putank vetolo; ti êk povitr vost, kiteak ti Sorvesporak bhettoilolea khannantli kaddlea."
11. "Hea orovachea bhettamnim khomir asunk favona; khomir vô mhonv ghal'lem khann kednanch Sorvesporak bhettounchem nhoi.
12. Vorsachea vorsa, poilea pikacho orôv Sorvesporak bhettounk haddcho, punn ho vedicher hulpauncho nhoi.
13. Orovachê sorv bhettent ilem mitt ghalchem.
14. Poilea pikacho orôv Sorvesporak bhettounk haddtat tedna, to bhazun vô bhorddun bhettouncho.
15. Ilem tel ani dhump tantunt ghalchim.
16. Bhettechi kuru koxi, iadnik tel-dhump asa to sogllo orôv, Sorvesporachem khann koxem vedicher hulpaitolo. " '
