1. Sorvesporan Moizesak mhollem,
2. Aaronak ani tachea putank mhojea Tombuchea darar gheun ie, ani iadnikachim vostram, makhnnechem tel, farikponnachê bhettek êk paddo, don menddre, ani khomir naslolea unddeancho panttlo hadd.
3. Magir, sogllê porjek hanga ektthaim kôr.'
4. Sorvesporan sanglolem toxem Moizesan kelem, ani soglli porza ektthovlea uprant
5. Moizesan tika mhollem, "Atam hanv kitem kortam tem Sorvesporan formailam."
6. Moizesan Aaronak ani tachea putank mukhar vhorun, tanchi xudh'dhi keli.
7. Tannem Aaronak kobai ghalun, potto bandlo. Magir, tacher efod ghalun hacho potto ghôtt kelo.
8. Uprant, hodd'ddeachi-pati laili, ani hantunt Urim ani Thummim ghalim.
9. Sorvesporan sanglolê tê porim tannem Muddaso-tôp tachê toklek ghalo ani haka bhettounnecho bhangaracho toktto bandlo.
10. Magir, Moizesan makhnnechem tel gheun Sorvesporachea Tombuk ani thoim aslem titleak-ui lailem, ani hê porim sogllem Sorvesporak bhettoilem.
11. Ani ilem tel gheun tannem tem sat pavtti vedicher toxench samonn aslem tacher xinvrailem ani sogllem Sorvesporak bhettoilem.
12. Aaronachê tokler tel votoun taka sonvskarla.
13. Tea uprant, Sorvesporan sanglolê tê porim tannem Aaronachea putank mukhar haddle, tankam kobai ghali ani benddak potte bandle ani matheak topiô ghaleô.
14. Magir, Moizesan paddo haddlo ani Aaronan ani tachea putamnim, patkanchea farikponnak, tachê tokler aple hat dovorle.
15. Moizesan to paddo marlo, ani tachem ilem rogot aplea bottar gheun tem vedichea xingank lailem, ani urlolem rogot tannem vedichê pãia-xim ghalem. Hê porim vedi bhettoili ani nitôll keli.
16. Moizesan pottantli soglli chorob, kallza-figdacho boro to kuddko, chorbê-soit donui mutpariô kaddleô ani hem sogllem vedicher hulpailem.
17. Paddeachem urlolem mas, zolliô, ani chambddi sogllem, Sorvesporan sanglolem tê porim, moidana bhair vhorun hulpailem.
18. Uprant, Moizesan hom'-bhettek menddro haddlo ani Aaronan ani tachea putamnim tachê tokler aple hat dovorle.
19. Moizesan to marlo ani vedichea charui bazumnim tachem rogot uddoilem.
20. Sorvesporan formailolê tê porim, to menddro katrun tache kuddke kele, pottantlem ani patthle pãi udkan dhule,
21. ani menddreachi tokli, chorob ani urlolem sogllem vedir hulpailem. Hi hulpailoli, êk jevnnachi bhett, ani ticho pormôll Sorvesporak mandlo.Sorvesporan Moizesak adnia dil'lea pormannem hem kelem.
22. Magir, Moizesan dusro menddro haddlo, ani hi Sonvskarnnechi bhett; Aaronan ani tachea putamnim tachê tokler aple hat dovorle.
23. Moizesan to marlo, ani tachem ilem rogot gheun tem Aaronachea uzvea kanpotteak, uzvea hatachea akonddeak, ani uzvea pãiachea akonddeank temlailem.
24. Magir, tannem Aaronachea putank mukhar haddle ani tachea uzvea kanpotteank, uzvea hatanchea akonddeank, ani uzvea paianchea akonddeank ilem rogot lailem; ani urlolem rogot tannem vedichea charui vattamnim xinvrailem.
25. Tannem chorob kaddli, motti xempddi, pottantli soglli chorob, kallza-figdacho boro to kuddko, chorbê-soit mutpariô, ani patthlo uzvo-pãi.
26. Magir, tannem panttlentlo êk khomir naslolo unddo ghetlo ani to Sorvesporak bhettoilo; êk telan kel'lo ani êk biskut-unddo, ani hem sogllem chorob-pãi-masacher ghalem.
27. Hem sogllem khann tannem Aaronachea ani hachea putanchea hatamnim ghalem, ani tãnnim tem Sorvesporak, ek kherit dennem koxem bhettoilem.
28. Uprant, Moizesan tem tanchea hatantlem gheun vedir, hom'-bhettechea mathear ghalun tem hulpailem; hi Sonvskarnnechi khann-bhett ani ticho pormôll Sorvesporak mandlo.
29. Moizesan zonavorachi chati ghetli ani ek kherit dennem koxem, ti Sorvesporak bhettoili. Ani ho, Sonvskarnnechea menddreacho Moizesacho vantto. Ani, Sorvesporan formailolem toxem sogllem Moizesan kelem.
30. Moizesan ilem makhnnechem tel ani vedir aslem tem rogot gheun, Aaronachea ani tachea putanchea vostrancher xivrailem. Hê jin'xim tankam ani tanchim vostram Sorvesporak bhettoilim.
31. Moizesan Aaronak ani tachea putank mhollem, 'Sorvesporachea Tombuchea dara-xim tem mas vhorat, ani xizoun, Sorvesporachea formonna pormannem, "sonvskarnnechea unddeam borabor khaiat."
32. Ani kitem-i urta tem sogllem hulpaiat.
33. Ani tumi Zomatichea Tombuchea dara-sorxile sat dis, sonvskarnnechi rit puri zai porian, bhair sorchenant.
34. Aiz ami kelam tem sogllem, Sorvesporachea formonnak pallo diun, tumchem patok pois zaunchê khatir kelam.
35. Tôr, dis ani rat ZomaticheaTombuchea dara-xim tumi ravunk zai, ani hem Sorvesporachea formonnan; na tôr, tumi mortoleat. Oso mhaka Sorvesporacho hukum'.'
36. Aaronan ani tachea putamnim Moizesan formailolem titlem-i kelem.
