1. Ti bhirankul pidda nitôll zalea uprant,
2. tea mon'xachi koxi xudh'dhi korchi hea vixim Sorvesporan Moizesak hi xikounn dili. Konnui eklo xud'dh mhonn tharauncho asa tea disa, hea mon'xak iadnikaxim haddcho,
3. ani iadnik taka moidana bhair vhorun topastolo.
4. Tachi pidda geli zalear, iadnik taka riti pormannem don jivim xud'dh suknnim haddunk formaitolo; têch porim, devdar-lankddacho êk kuddko, êk tambddo doro, ani hisop-zhaddachi êk talli.
5. Uprant iadnik, eka suknneak,matiechea kanxea voir dhôrun, marunk formaitolo; hea kanxeant vhanvtem udok astolem.
6. Dusrem suknnem gheun, to, lankdda-dorea-talliê vangdda, marlam tea suknneachea rogtant buddoitolo.
7. Sat pavtti tem rogot, jea mon'xachi xudh'dhi korta tacher uddoitolo, ani pidda lagloli to monis atam xud'dh mhonn pachartolo. Dusreasuknneak xetantlean uddunvochunk to sôddun ditolo.
8. Ho monis aplim vostram dhutolo, aplem mathem tastolo, ani nhatolo; hê porim to riti pormannem xud'dh zatolo. Tachean magir tombu moidanar vochunk zatolem, punn sat dis porian tannem aplea tombu bhair ravunk zai.
9. Satvea disa, to porot aplem mathem tastolo, khadd kortolo; toxench, askitteô ani angachi soglli lonv kaddun uddoitolo; to aplim vostram dhutolo, nhatolo, ani uprant to riti pormannem xud'dh zalo.
10. Atthvea disa, to dadlea lingache don menddre haddtolo; toxench, vorsachi êk menddri, tankam koslench khot nastana; efacho tisro vantto pittacho, telant misôll korun, ani log-bhôr tel.
11. Iadnik hea mon'xak ani tachim dan-dennim gheun, ZomaticheaTombuchea dara-xim vetolo.
12. Magir, iadnik êk menddro log-bhôr tela sangata, êk ekcharachi bhett kortolo. Hem ek Sorvesporak kherit dennem.
13. Ho, povitr zagear bhettechea zonavorank martat thoim, tea menddreak martolo. Tannem oxem korunk zai, kiteak ekcharachi-bhett, farikponnachê bhettê porim, iadnikacho vantto zaun asa, ani to Bhov povitr.
14. Iadnik menddreachem ilem rogot ghetolo ani tem, jea mon'xachi xudh'dhi korta, tachea uzvea kanpotteak, uzvea akhonddeak, ani uzvea pãianchea mottea bottak laitolo.
15. Iadnik, magir, aplea davea talltar log-bhôr tel ghetolo,
16. tantunt aplea uzvea hatachem bott buddoitolo, ani sat pavtti ilem Sorvespora fuddeant xinvraitolo.
17. Ani hatant asa tea tela borabor menddreachem ilem rogot, jea mon'xachi xudh'dhi korta, tachea uzvea kanpotteak, uzvea akhonddeak, ani uzvea pãianchea mottea bottak laitolo.
18. Talltar asa tem urlolem tel tea mon'xachê tokler ghaltolo. Hê jin'xim to monis riti pormannem xud'dh zatolo.
19. Uprant, iadnik farikponnachi bhett kortolo, ani xudh'dhichi rit palltolo.Tea uprant hom'-bhettechem zonavor martolo
20. ani tem, orovachea dennea sangata, vedir bhettoitolo. Hê porim iadnik xudh'dhichi rit palltolo, ani to monis riti pormannem xud'dh zatolo.
21. To monis durboll ani taka chodd tank na, tedna aplê xudh'dhik to, ekcharachi bhett korchê khatir,, ekuch menddro haddtolo, hem ek kherit dennem Sorvesporak. Tea bhair efacho êk vantto pitt telan misoll kel'lem, orovachê bhettek; ani log-bhôr tel.
22. Tea bhair, tankta tea pormannem to don kovdde vô parve haddtolo, êk farikponnachê bhettek ani dusro hom'-bhettek.
23. Xudh'dhi uprant, atthvea disa, him dennim to iadnika-xim, Zomatichea Tombuchea darar haddtolo.
24. Iadnik to menddro ani tel ghetolo, ani kherit dennem koxem Sorvesporak bhettoitolo.
25. Ho menddreak martolo, ani tachem ilem rogot tea mon'xachea uzvea kanpotteak, uzvea hatachea akhonddeak ani uzvea pãianchea mottea bottak laitolo.
26. Magir, iadnik ilem tel aplea davea talltar ghetolo,
27. ani uzvea hatachea bottan sat pavtti Sorvesporachea fuddeant xinvraitolo.
28. Ani rogot lailolem têch porim, tea mon'xachea kanpotteak, uzvea hatachea akhonddeak, ani uzvea pãianchea mottea bottak tel laitolo.
29. Urlolem hatantlem tel tea mon'xachê tokler ghaltolo, ani hê jin'xim xudh'dhichi rit to palltolo.
30. Uprant, êk tantlo kovddo vô parvo
31. farikponnachê bhettek ditolo; ani dusro, orova sangata, hom'-bhettek. Hê porim iadnik xudh'dhichi rit palltolo.
32. Ti katichi-pidda lagloli tea mon'xachê xudh'dhik, tachean tharailolem dan-dennem korunk zaina tedna, hi rit samballchi.'
33. Posorta toslo bhato ghorant ieta tea vixim
34. Sorvesporan Moizesak ani Aaronak hi xikounn dili. Hem, Israel porza Kanaanchea ganvant bhitôr sorlea uprant tankam lagu zaunchem aslem, kiteak ho ganv aplo khas koso tankam ditolo mhonn Sorvesporan bhasailolem.
35. Ghorachea Dhonian iadnika-xim vochun taka sangchem, "Mhojea ghorant koslo tori rôg zala-so mhaka dista."
36. Iadnik thoim topasunk vechê adim, tãnnim sogllem ghorantlem bhair kaddchem oxem iadnik formaitolo; na tôr, to sogllem ghorantlem oxud'dh mhonn sangun ditolo. Tea ghorant to bhitôr sortolo
37. ani to bhato topastolo. Tea ghorachea vonntincher hirvim-xim vô tambxim khotam chortat oxem taka disot zalear,
38. tem ghor to sat disank bond dovortolo.
39. Satvea disa, to porot ietolo ani tem topastolo. To bhato odikuch choron gela zalear,
40. jea zagear ho bhato asa thoinche fator kaddunk, ani tea xarachê ximê-bhair khoinchea-i oxud'dh zagear uddounk formaitolo.
41. Uprant, tea ghorachea bhitorlea vonntincho chuno fôddun kaddunk ani to xara-bhair oxud'dh zagear uddounk formaitolo.
42. Ani kaddleat tea fatranchea zagear dusre fator ghalche, ani sogllea vonntink novo chuno kaddcho.
43. Nove fator ani novo chuno ghalea-i uprant ho bhato porot iet zalear,
44. iadnik thoim porot vetolo ani topastolo. Bhato choron veta zalear, tem ghor oxud'dh mhonn pachartolo.
45. Tem ghor môddun uddounk zai, tachem moder, fator ani chuno, sogllem xara-bhair vhorun oxud'dh zagear uddounchem.
46. Tem ghor bond dovorlolem astana, thoim konnui bhitôr sorta to, sanz porian oxud'dh zaun astolo.
47. Konnui tea ghoran nhidta vô jevta, tannem aplim vostram dhuvunk zai.
48. Zôr, tem topasunk iadnik ieta tedna, ghorak novo chuno kaddtôch, thoim bhato dixtti poddunk na, tedna tem ghor xud'dh mhonn pachartolo, kiteak thoincho bhato ekannem gelo.
49. Tem ghor xud'dh korunk, dhoni don suknnim haddtolo, thoddem devdara-chem lankudd, êk tambddo doro, ani hisop-zhaddachi êk talli.
50. To, matiechea kanxeant zhorichem udok gheun, tantunt ek suknnem martolo.
51. Magir, to devdhar-lankudd, hisop-talli, tambddo doro, dusrea jivea suknnea borabor, marlolea suknneachea rogtant sogllem buddoitolo. Ani hea rogot-udkan sogllem ghor sat pavtti xitoddaitolo.
52. Hê porim to aplem ghor xud'dh kortolo, marlolea suknneachea rogtan, devdhar-lankddan, tambddea dorean, ani hisop-tallien.
53. Magir, tea jivea suknneak xetantlean uddun vochunk to sôddun ditolo. Hê jin'xim to aplea ghorachi xudh'dhi kortolo, ani tem ghor xud'dh zatolem.
54. Tôr, katichê piddê vixim kaide:
55. kapddam-ghorank bhato ieta
56. ghai, fodd-pulliô vô suz; hea sogllea khatiruch hi xikounn;
57. ani hea nemam pormannem kitemi oxud'dh vô xud'dh zalear tem sangunk zatolem.'
