1. Sorvespor Moizesa lagim uloilo ani he nem tharaun dile:
2. Konnui-eklo peleachi vost apnna lagim dovrunk ghetloli portun dina, vô tachi vost chôrta;
3. mell'lloli vost apnnak dovorta, vô koxe-i toren taka fosoita, tannem Sorvesporak bhett korchi ani
4. jea disa taka aplea guneanvachi vollokh mellta tedna tannem peleachem peleak diunchem, tea bhair tacho panchvo vantto,
5. vô jê ekadrê vostu khatir tannem fott soput ghetla ti tannem purai farik korchi. Ji vost tannem luttlea tichi purai bhorpai aplea doxorponnachea disa diun tea bhair anink ticho ek ponchmanx tannem diuncho.
6. Ani patkachea farikponnak, to êk khot naslolo purus menddro vô bokddo haddtolo, ani tachem mol Dev-sthanachê dorê pormannem tharaunchem.
7. Iadnik tachea patkachea farikponnak bhett kortolo, ani patok bhogsotolem.'
8. Sorvesporan, hom'-bhettê vixim,
9. Aaronak ani tachea putank he nem' diunk Moizesak formailolem: "Boli hulpaun ticho gobôr kortat tosli bhett ak'khi rat petthlolea ujeachê vedir dovrunk zai.
10. Uprant, iadnik apli kobai ani mottvim drozam ghalun, chorbên misôll zal'lo sogllo gobôr kaddtolo ani vedichê kuxik dovortolo.
11. Magir, aplim vostram bodlun, to gobôr moidana bhair eka, riti pormannem, nitôll zagear vhortolo.
12. Vedir uzo sodanch petthlolo asunk zai, ani kednanch palouncho nhoi. Dôr sokallim Iadnik vedir lankddam ghaltolo, hulpaunchi asa ti boli ujeacher dovortolo, ani ektarachê bhettechi soglli chorob tacher hulpaitolo.
13. Hê porim vedivelo uzo sodanch pettlolo astolo."
14. "Orovachê bhettek he nem' samballche: "Aaronache kullieche iadnik, vedi mukhar, Sorvesporak to orôv bhettoitolo.
15. Magir, êk mutt-bhor tantlem pitt, ilem tel ani dhump kaddtolo ani, êk khunna koxi, tem vedir hulpaitolo. Hê bhettecho pormôll Sorvesporak mandta.
16. Urta tem iadnikachea jevnnak: khomir nastana tacho unddo-bakri korchi ani povitr zagear, Zomatichea Tombuchea adrar to khomira bogor khauncho.
17. Khomir ghalun tem bhazche nhoi. Bhettecho vantto koso Sorvesporan tankam dovorla. Tem khann povitr, her bhettechea jevnna sarkem.
18. Ieunchea sorv kallak, Aaronache sonstichea sogllea dadlea-lokan, apnnak dilolo vantto koso, tem khaum-iet. Ani konnui taka hat laita to povitr zatolo." '
19. Aaronak ani tachea putank sonvskarnni diunchê vixim Sorvesporan Moizesak hi xikounn dili:
20. Sonvskarnni gheta tea disa, to Sorvesporak efacho dhavo vantto pitt (dispottê orovachê bhettê sarkem) bhettoitolo, tantlem ordem sokallim ani dusrem ord sanjê.
21. Tantunt tel misoll korun, xigdder xizounchem ani magir lêp korun, orovachê bhettê porim tem bhettounchem; tacho pormôll Sorvesporak mandta.
22. Aaronachea zagear ietolo tachea putantlo eklo hi bhett kortolo, ani ti Sorvesporak mandta tosli zaunk ti lasun sompunk favo.
23. Iadnik bhettoita to orôv khauncho nhoi, sogllo hulpauncho.'
24. Farikponnachê bhettê vixim, 'Aaronak ani tachea putank hi xikounn diunk Sorvesporan Moizesak formailem:
25. "Farikponnachê bhettek, vedichê ut'torê vatten hem zonavor marchem, hom'-bhettek martat têch porim. Hi êk bhov povitr bhett.
26. Hi bhett korta tea iadnikan aplo vantto eka povitr zagear Sorvesporachea Tombunt to khauncho.
27. Konnui vô kitench tem mas afuddit taka luskonn zatolem. Vostrank tachem rogot lagot zalear, tem vostr povitr zagear dhunvchem.
28. Jea matiechea aidonant tem randtat, tem aidon fôddun uddounchem; ani tem aidon dhatuchem zalear, tem borem ghanschem ani uzollchem.
29. Iadnikachea kuttumbachea sorv purus-lokan tem khaum-iet; tem bhov povitr.
30. Punn, riti-kaidea pormannem tachem rogot Zomatichea Tombunt bhitôr haddchem poddlem zalear, patkanchea farikponnak, tea zonavorachem mas khaunchem nhoi punn sogllem hulpaunchem. " '
