1. Moizesa kodde uloun Sorvesporan mhollem:
2. Israelachea sogllea bhurgeank ektthaim korun uloi ani tankam oxem sang: "Povitr zaiat karonn Hanv, Sorvespor tumcho Dev, povitr.
3. "Zonn-eklean tumi tumchê avoik, ani tumchea bapaik man diunk zai; "Ani hanvem formailam tê porim, tumi Son'var pallunk zai. Hanv Sorvespor tumcho Dev.
4. "Mhaka sanddun, kuddea-devank bhôzum nakat; dhatuche dev korun, tankam man dium nakat. Hanv Sorvespor tumcho Dev.
5. "Ektarachê bhettek tumi ek zonavor martat tedna, hanvem tharailam titlem-i korat, ani hanv tumchi bhett mandun ghetolom.
6. Tea zonavorachem mas teach disa, vô martat tea dusrea disa khaunchem. Tisrea disak urta tem sogllem hulpaunchem,
7. kiteak riti pormannem tem oxud'dh; ani tem konnui khait zalear, hanv tumchi bhett mandun gheunchona.
8. Konnui tem khait, to chaltea ani mhaka bhettoil'lea masa modem ontor korunk visorta, hea khatir, to mhojê porjê bhair poddtolo.
9. "Tumchem xet lunvtat tedna, xetachê merê lagim porian sorum nakat, ani lunvlolea zagear porot koiti laum nakat.
10. Tumchea molleantleô dakô urleat teô paddunk porot vochum nakat, vô bhuim poddloleô vinchum nakat; durbollank ani pordexank teô asum-di. Hanv Sorvespor tumcho Dev.
11. "Chorum nakat, ekamekak fotti marum nakat ani fottoum nakat.
12. Mhojem Nanv gheun lottik soput dium nakat ani oxem tumchea Devachem Nanv bhoxttavum nakat. Hanv To Sorvespor.
13. Tujea peleak koslench vaitt korum naka vô zobordosten tachem kann gheum naka. Vavraddianchi mozuri dusro sokall porian dovrum naka.
14. Bhereacher xirap ghalum naka ani kudd'ddeachê vatter addkhôll ghalum naka, punn tujea Devachem bhem dhôr. Hanv to Sorvespor.
15. "Onit korun favo naslole nirnnoi dium nakat. Durbollachea tonddak polleun uloum naka vô girestak fuslavunk sôdum naka. Punn niti pormannem peleachi nit kôr.
16. Tujea lokacher boglanttam ghalum naka, ani karonna viret peleachem rogot magum naka. Hanv to Sorvespor.
17. Tujea bhavacho kallzant dvês dhôrum naka; punn tujea peleachi chuk dakhoun taka xiddkai, ani oxem hem patok tujea mathear aschem na.
18. Sudd gheum naka, ani tujeach lokachea bhurgeancho kallzant rag gheun ravum naka. Tuzoch môg kortai toso tujea peleacho kôr. Hanv to Sorvespor.' "
19. "Mhojea updesank khaltim ravat. "Poslolea zonavoram modem add zatin utpon korum nakat. Ekach xetant don jin'sanchem bim vompum nakat. Don jin'sanchea lugttanchim vostram ghalum nakat.
20. "Konn-ek ravoilolem cheddum eka mon'xachi dovorloli bail oso somoz astana, dusro-konn, tea cheddvak suttka-sot'tea melloun gheuncheak kãich farik korinastana, tachêkodde lingi-ekvott korta, hea mon'xak khast favo punn mornnachi nhoi, kiteak tem fokot ek ravoilolem.
21. Aplea patkachea farikponnak, to mhojea Tombuchea dara-xim êk menddro gheun ietolo ani protidan kortolo,
22. ani iadnik hê bhettê vorvim tachi xudh'dhi kortolo, ani Dev taka bhogxitolo.
23. "Tumi Kanaanchea ganvant pavtôch, ani tumi koslim-i foll-zhaddam laitat tedna, poilim tin vorsam tanchim follam riti pormannem oxud'dh oxem somzunk zai, ani tin vorsam tim khaunchim nhoi.
24. Chovthea vorsa, sogllim follam mhaka, Sorvesporak, tim bhettounchim, êk dhinvasachi bhett koxi.
25. Punn panchvea vorsa tumchean tim khaum-iet. Hê porim sogllea tumchea zhaddank puskôll follam zatolim, kiteak hanv tumcho Sorvespor.
26. "Rogta-soit tumi mas khaunchem nhoi. Kosloch jhadu korum nakat.
27. "Tumchea kansulam voir matheache kens katrum nakat, khadd katrum nakat,
28. tumchê kuddir kitench suien kaddum nakat vô tumchea mel'leanchem dukh korchê khatir tumchê kuddir ghai ghalum nakat. Hanv To Sorvespor.
29. "Mondirachim devdasi korun, tumchea dhuvank beman korum nakat; oxem korxat zalear, tumi kud'dea devam thaim volltoleat, ani ganvant koslich moriad aschina.
30. "Son'var pallat, ani mhojea nomoskarachea zageak man diat. Hanv To Sorvespor.
31. "Mel'leancho prosad magtat tanchê thaim budh gheunk vochum nakat. Hanv To Sorvespor.
32. "Zantteam sovem man-moriadin cholat. Bhirant-mogan mhaka khalte ravat; hanv To Sorvespor.
33. "Tumchea ganvant porko-lôk jieta tankam dukhoum nakat.
34. Tumchea Israel-lokak lekhtat têch porim tankam-i korat. Tumcho kortat têch porim tancho-i mog korat. Eka kallar, Ejiptant tumi-i pordexi asleat mhonn monant dhôrat. Hanv tumcho Sorvespor.
35. "Fottkirim mapam, zokhun zanv tokhun, vô mezun, kãich fottkirem vaprum nakat.
36. Nitt tagddi, tthik zhokam, ani nigut kondde-fintam gheiat. Hanv tumcho Sorvespor, ani hanvench tumkam Ejiptantlim bhair kaddleant.
37. Sogllea mhojea kaideam formonnank pallo diat. " '
