1. Israel porjek sangunk, Sorvesporan Moizesak mhollem,
2. "Tumi vô tumchê modem jietolo porko monis, konnui to zanv, aplea bhurgeank Molek devachê pujek sôddun dita, taka soglli porza fatraun martoli.
3. Konnui eklo aplea eka bhurgeak Molekachê sevek dita ani mhozo Tombu boxttaita, ani mhojea povitr nanvak beman korta, hanv tacher portotolom, ani to mhojê porjentlo bhair poddtolo.
4. Punn porza tachê kornnek aple dolle dhampta ani taka fatraun marunk bhair sorona zalear,
5. hanvuch taka ani tachea kuttumbak, ani Molekachi puja korunk tachi pang dhôrtat titleankui mhojê porjê modlim bhair uddoitolom.
6. "Mel'leam vorvim konnui prosad lavunk veta tacher hanv add astolom, ani mhojê porjentlo taka bhair uddoitolom.
7. "Tumi bhagevontponnim jieat, kiteak hanv tumcho Sorvespor.
8. "Mhojea kaideank pallo diat, kiteak hanv Sorvespor ani tumkam povitr kortam. Sorvesporan hi xikounn dili:
9. "Konnui aplea bapaicher vô aplê avoicher xirap ghalta, tacho jiv kaddcho; to aplea mornnacho zobabdari zatolo.
10. "Konnui êk dadlo aplea xezareachê bailêkodde pordvar korta, taka ani tika-i jivexim marchim.
11. "Konnui aplea bapaichê êke bailek ekvott'ta, to aplea bapaik beman korta; taka ani tika-i jivexim marchim. Tim ap-aplea mornnachim zobabdari.
12. "Konnui êk aplê sunek ekvott'ta, tankam dogankui jivexim marchim; tim soimba add gelim dekhun, ap-aplea mornnachim zobabdari.
13. "Êk dadlo bailê lagim korta tê porim, dusrea dadleakodde toxem korta, te dogui kanttalleachi vost adartat, dekun dogankui jivexim marche; te ap-aplea mornnache zobabdari.
14. "Konnui bailêkodde ani hichê avoikodde-i logn zata, hankam tegankui hulpaun marchim kiteak vikottai adarli, ani oslem tumchê modem ghoddchem nhoi.
15. "Konnui-ek zonavorak ekvott'ta, taka ani zonavorakui marchim.
16. "Êk ostori zonavorakodde kuddicho ekvôtt korunk sôdta, tika ani zonavorakui jivexim marchim. Tãnnim tem moronn apnnacher ghetlam.
17. "Konnui aplê bhoinnikodde vô ord'dh-bhoinnikodde logn zata, tankam dogan-kui sobhemazar lojek ghalun sobhentlim bhair uddounchim. To aplê bhoinnik ekvottlo ani hacho porinam' to bhôgtolo.
18. "Konnui êk dadlo tichea mhoinea somoiar bailek ekvott'ta, tankam dogan-kui porjê modlim bhair ghalchim, kiteak tim ritichea xudh'dhi-nemancher add gelim.
19. "Konnui aplê kaku-mavxek ekvott'ta, tim aplo abru ubhoitat, ani tãnnim hacho porinam' bhôgunk zai.
20. "Konnui aplea tivachê bailek ekvott'ta, to aplea tivak beman korta, ani tannem ani tinnem khast bhôgunk zai, ani bhurgem nastana tãnnim morunk zai.
21. "Konnui aplea bhavachê bailê lagim logn zata, to vaitt korta, tim dogam-i bhurgeam viret mortolim. Tannem riti pormannem oxudh'dhi adarli, ani aplea bhavak beman kelo."
22. "Sorvesporan mhollem, Soglle mhoje updes samballat, hê porim, hanv tumkam vhortolom to Kanaancho ganv tumkam vonkun bhair uddounchona.
23. Thoim jieta tea lokacheô chali-dosturi tumi pallum nakat; tumkam zago diunchê khatir, tea videxank hanv thoinche bhair ghaltam.Tanchea khottea chalincho mhaka kanttallo aila.
24. Ho sufôll ani dud ani mhonv vhanvtalo ganv tumchea tabeant kortolom mhonn hanvem bhasailam, ani tumkam to ditolom. Hanv tumcho Sorvespor, ani her dês-porzam modlim hanvem tumkam kuxinuch kaddleant.
25. "Mhonnttôch, zonavoram-suknnim jim xud'dh ani jim oxud'dh, hi ontor korun, oxud'dh tim zonavoram-suknnim tumi khaunk favona. Tim oxud'dh mhonn hanvem tharailam ani tim khavun tumi oxud'dh zatoleat.
26. Tumi povitr ani mhojinch zaunk zai, kiteak hanv tumcho Sorvespor, ani povitr. Tumi mhojinch zaunchê khatir, hanvem tumkam heram dês-porzam modlim kuxin kaddleant.
27. "Konnui dadlo vô ostori mel'leancho prosad lavunk vetat tankam fatraun marchim; hi vost adarta toch-aplea mornacho zobabdari.
