1. Aaronak ani tachea putank sangunk, Sorvesporan Moizesak formailem,
2. Tumi mhojea povitr nanvak beman korunk favona; dekhun Israel porza mhaka povitr bhettô kortat teô soglleô manan lekhtat. Hanv Sorvespor.
3. "Tumchê sonstintlo konnui, riti pormannem oxud'dh astana, Israel porjen mhaka bhettoilolea dan-denneam sorxim ieta, tachean anink kednanch mhojea vedichi seva korunk zaina. Pinnkechê-pinnkek hem pallunk zai.
4. "Aaronache sonstintlea, katichi vikotti pidda asloleachean, vô angantlem bhair sorta tachean tem povitr khann chakum nozo, to riti pormannem xud'dh zai porian. Konnui iadnik, mel'lê kuddik tenkun, vô angantlem bim vetoleak tenkun,
5. vô oxud'dh mon'xa-zonavorachê kuddik hat lavun, to oxud'dh zatolo.
6. Hê porim oxud'dh zal'lo iadnik, sanz porian to oxud'dh urtolo; ani oxem-i astana, tannem nhalea xivai tachean povitr bhettentlem khaum nozo.
7. Dis darer poddlea uprant, to xud'dh zatolo, ani tedna tachean tem khaum-iet, kiteak hench tachem jevonn-khann.
8. "Tachean, apxinch melolea vô zonglli mon'zatin marlolea zonavorachem mas khaum nozo; to oxud'dh zatolo. Hanv to Sorvespor.
9. "Hanvem dilea ti xikounn soglle iadnik samballtole. Na tôr, te guneanvkari zaun mortole, kiteak tãnnim povitr kaideank pallo dilona. Hanv Sorvespor, ani hanv tankam povitr kortam.
10. "Fokot iadnikachea kuttumban tem khann khaum-iet, hanchê bhair tem povitr jevonn konnench khaunk zaina- iadnika-xim ravtolea vô tannem kamak lailolea lokachean porian.
11. Punn iadnikan vikto ghetlolea vô tachea ghorant zolmol'lea chakrachean tem khaum-iet.
12. "Iadnikachi dhuv, ji iadnik-nhoi tachêkodde logn zalea tichean tem khaum nozo.
13. Punn ghov mela, vô ghovan sôddlea ani bhurgim nant, ani bapaichea ghorant ani tachê khal ravunk ailea tichean tem khaum-iet. Fokot iadnikachea kuttumbantem khaunchem.
14. Tachea kuttumbacho nhoi tannem chukon tem khelem zalear, taka kollun ietôch, tannem tea jevnnachem ak'khem mol ani, tea bhair, tacho panchvo vantto iadnikak farik korunk zai.
15. "Hem khann povitr dekhun,
16. zankam khaunk puttovna tankam divun, iadnikan tem boxttaunchem nhoi; hea vorvim, khatolo guneanvkari zatolo ani khastik sampoddtolo. Hanv Sorvespor, ani hanv teô bhettô povitr kortam. " '
17. Sorvesporan Moizesak sanglem, 'Aaronak ani tachea putank, ani sogllê Israel porjek hi xikounn di,
18. "Israel porjê modlo konnui, vô hanchê modim jietolo porko monis êk hom'-bhett haddta, zanv ti khuxê-monan keloli, zanv ti angovnn pallchê khatir, haddlolea zonavorak koslich khôdd asunk favona.
19. Ti mandta tosli zaunk, khot naslolea ani dadlea lingachem zonavor tem zaunk zai.
20. Khot aslolem zonavor zait zalear, Sorvespor ti bhett mandun gheunchona.
21. "Ektarachi ti bhett zait zalear, angovnn pallchê khatir zanv khoxê-monan keloli, ti bhett mandta tosli zaunk, zonavorak khot vô miri asunk favona.
22. Kudd'ddem, vô thonttem, vô sandhe-katron gel'lem, vô vhanvta toslo ghai aslolem, vô katik puller vô her pidda aslolem zonavor Sorvesporak bhettounchem nhoi. Ani khann-bhettek tem vedir kednanch haddchem nhoi.
23. Khuxê-monan kel'lê bhettek pangllem zonavor haddum-iet, punn angovnn pallcheak tem cholona.
24. Pariô vô andd bhigoddlolem, kapun zanv chenchun, vô koxe-i porim, oslem zonavor Sorvesporak bhettounchem nhoi. Tumchea desant oslem cholona.
25. Porkea mon'xa-thaun ghetlolem zonavor bhettounchem nhoi. Hea zonavorak khôdd asa, ani tem mandchem na. " '
26. Sorvesporan Moizesak sanglem,
27. Vasrum vô menddrachem por zolmolea uprant, sat dis avoi sorxilem taka kuxin korchem nhoi. Tea uprant, khann-bhettek tem cholta.
28. Gaiechem, vô menddrachem, vô bokddechem por ani tachi avoi ekach disa bhettounchim nhoi.
29. Sorvesporak dhinvasnnechi bhett kortat tedna, ti mandta tosli zaunk, tharailole kaide samballat;
30. hê bhettechem mas teach disa khaunchem, dusrê sokallink dovorchem nhoi."
31. Sorvespor oxem mhonntta, Mhoje kaide samballat; hanv Sorvespor.
32. Mhojea povitr nanvak beman korum nakat; hanv povitr mhonn sogllê Israel porjen mandunk zai. Hanv Sorvespor, ani hanv tumkam povitr kortam,
33. ani hanv tumcho Dev zaunchê khatir, hanvem tumkam Ejiptantlim bhair kaddun haddleant. Hanv Sorvespor.'
