1. Sorvesporan Moizesak sanglem,
2. Aaronak, tachea putank, ani sogllê Israel porjek sang, Sorvesporan adnia dilea ti hi:
3. "Israel porjentlo konnui monis, Sorvesporak bhett korunk êk gai, menddro vô bokddi
4. kaideachea zagea bhair marta mhonngê, Sorvesporachea Tombuchea dara-xim nhoi, to Sumurticher add ailo. Tannem rogot vharoilem, ani to Devachê porjê bhair poddlo.
5. Hea kaideacho orth oso, ki, jim zonavoram Israel porza adim khoinsorui marun Sorvesporak bhett kori, tinch atam tãnnim Sorvesporachea Tombuchea dara mukhar iadnika-xim haddchim, ani ektarachê bhettê sarkim marchim.
6. Iadnik zonavorachem rogot vedichea charui vattamnim uddoitolo, ani tachi chorob vedir hulpaitolo, ani ho pormôll Sorvesporak mandtolo.
7. Israel porjen atam, khoinsor-ui xetant aplim zonavoram marun, devcharank bokdde bhettoil'lea porim, dilolea kaideacher add ieunchem nhoi. Sorv ieunchea kallak Israel porjen ho kaido samballunk zai."
8. Konnui Israel porjentlo vô hanchê modem jietolo porko monis,
9. Sorvesporacho Tombu bhairavun, dusrea khoinchea-i zagear Sorvesporak hom'-bhett vô her bhett korta, ho Sorvesporachê porjê bhair poddlo.
10. "Israel porjentlo konnui, vô hanchê modem jietolo porko monis rogta soit mas khata taka Sorvespor aplê porjentlo koso lekhchona.
11. Sorv jiv rogtant asa, heach pasot, sogllem rogot porjechim patkam pois korcheak, vedir vharounk Sorvesporan hukum' dila. Rogtant asa to jiv sogllim patkam pois korta.
12. Heach khatir, Israel porjen vô hanchê modem jietolea porkea lokan rogot pieunchem nhoi mhonn Sorvesporan formailam.
13. "Israel porjentlo konnui, vô hanchê modem jietolo porko monis, riti pormannem xud'dh zonavor vô suknnem dhôrta tannem tachem rogot zomnir vharoun tem matient purchem.
14. Sorv jiv rogtant asa, heach pasot, tachem rogot pieunchem nhoi mhonn Sorvesporan formailam, na tôr, ho aplê porjentlo bhair poddlo.
15. "Israel porjentlo konnui, vô hanchê modem jietolo êk porko monis apxinch mel'lea, vô ran'votti monzatin marun uddoil'lea zonavorachem mas khait, tannem aplim vostram dhuvunchim, nhaunchem, ani sanz porian to oxud'dh urtolo.
16. Oxem korina zalear, tannem aplê kornnecho porinnam' bhôgcho poddtolo. " '
