1. Sorvesporan Moizesak mhollem,
2. Israel porjek sang: "Sorvesporachê Porbeche nemlole dis Povitr mellaveam nimitan jahir korpache te oxe:
3. "Tumchea vavrak tumkam sôv dis asat, punn satvo dis, Son'var, visovacho dis mhonn monant dhôrat. Hea disa vavr korcho nhoi, punn man-nomoskarak ektthaim zaunchem. Tumi khoinsorui asum, Son'var Sorvesporacho.
4. "Sorvesporache dobajik utsov he, povitr sobhanche dis; nemlolea disa Israelachea putam-dhuvank tumi hea sobhank apounk zai.
5. "Poilea mhoineachê chovdaver don sanzam modem Sorvesporachem Pask zatolem;
6. teach mhoineachê pondraver Sorvesporachea manak Fug-naslolea Unddeanchi porob; sat dis tumi fug-naslole undde khaunk zai.
7. Poilea disa tumi êk povitr sobha bhôrunk zai; zôdd vavr tumi korum noiê.
8. Sat dis tumi Sorvesporak ujeant ulpailoli bhettovnni vôptoleat. Satvo dis povitr sobhecho dis zatolo; tea disa tumi zôdd vavr korchim nant. " '
9. Sorvesporan Moizesa kodde uloun mhollem:
10. Israelachea putam-dhuvam kodde uloi ani tankam sang: "Hanv tumkam ditolom tea desant tumi bhitôr sortôch ani pik ektthaim kortôch pikachea prothom' follancho bhoro iadnika kodde vhorun diuncho ani,
11. tumi Sorvesporak mandlolim zauncheak, iadnikan to Sorvespora mukhar vhorun bhettouncho. Son'vara-uprantlea disa iadnik hi bhettovni kortolo.
12. Orovachi bhett kortat tea disa, eka vorsachea ani khot-naslolea menddreachi hom'-bhettui korat.
13. Tachê borabor, tumi telan misôll korun êk efa, khann-bhettek, haddchem. Hê bhettecho pormôll Sorvesporak mandta. Toxench, tumi hinacho chovtho vantto soro-i haddcho.
14. Tumi novo orov, horvo zanv bhazun, vô undde-bakri korun, hi bhett Devak haddchê poilem, koxech porim to chakcho nhoi. Pinnddkechê-pinnddkek tumchê sonstin ho kaido samballcho.
15. "Sorvesporak bhettounk tumi bhoro haddtoleat tea Son'vara-uprantlea disa thaun sarkim sat satollim mezunk zai.
16. Satvea Son'vara-uprantlea disa porian tumi pon'nas dis mêzche ani uprant tumi Sorvesporak êk novi bhettovnni korchi.
17. Dôr kuttumban don undde haddche, ani ek kherit dennem koxem, te Sorvesporak bhettounche. Êk-êk unddo don doxauns pittacho, khomir ghalun bhazlolo, ani novea pikachi ti Sorvesporak bhett.
18. Ani hea unddeam borabor, sogllê porjen koslench khot naslole eka vorsache sat menddre, êk boil, don bokddeô bhettouncheô. Him sogllim hom'-bhettek vetolim, ani hanchê borabor Sorvesporak orovachi ani soreachi bhett korchi. Hê bhettecho pormôll Sorvesporak mandta.
19. Têch porim, farikponnachê bhettek, êk bokddo; ani ektarachê bhettek eka-vorsache don menddre.
20. Iadnik undde ani don menddre, ek kherit dennem koxem, Sorvesporak bhettoitolo, ani hem dennem iadnikak vetolem. Him zaun asat povitr dennim.
21. "Tea disa tumcho sodancho vavr bond dovorcho, ani man-nomoskarak tumi ektthaim zaunche. Pinnddkechê-pinddkek, tumchê sonstin, khoinsorui tumi asum, hem pallchem.
22. "Tumchem xet lunvtat tedna, xim-merer porian vechem nhoi, ani urlam tem katrunk porot vechem nhoi; hem durbollank ani porkea lokak asum-di. Sorvespor tumcho Dev. " '
23. Sorvesporan Moizesak sanglem,
24. Israel lokank sang: "Satvea mhoineachea poilea disa ek kherit visovacho dis koso pallat, ani tuturecho sad aikotôch man-nomoskarak ektthaim zaiat.
25. Sorvesporak êk hom'-bhett korat, ani tumcho sodancho vavr bond dovrat. " '
26. Moizesa kodde uloun Sorvesporan mhollem:
27. Hea satvea mhoineacho dhavo dis Farikponnacho Dis zatolo. Tea disa povitr sobha bhôrchi ani upas korun Sorvesporak ujeant hulpailoli bhettovnni korchi.
28. Hea disa vavr korcho nhoi, kiteak patkanchea farikponnak rit pallchi asa.
29. Konnuch tea disa kitench khait to mhojê porjentlo bhair poddtolo.
30. Konnui tea disa vavr korit zalear, Sorvesporuch tacho jiv kaddtolo.
31. Ho kaido sogllê tumchê sonstik; khoinsorui ti asum, tinnem topallcho.
32. Hea mhoineachea nnovea disachê sanjê, dis dharer poddtôch tem dhavea disa dis-uzvaddo porian, kherit visovacho ani upasacho dis koso pallcho.'
33. Moizesa kodde uloun Sorvesporan mhollem:
34. Israelachê porjê kodde uloun, tankam oxem sang: "Hea satvea mhoineacho pondravo dis Sorvesporachea manak tombunchi Porob zatoli.
35. Poilo dis povitr sobhecho dis; tea disa tumi zôdd vavr korum noiê.
36. Sat dis tumi Sorvesporak ujeant ulpailoleô bhettovnniô vôptoleat. Attvea disa povitr sobha bhôrtoleat ani ujeant hulpailoli bhettovnni Sorvesporak vôptoleat. Ho dis dobajik zomaticho dis; hea disa tumi zôdd vavr korum noiê.
37. "Sorvesporache dobajik utsov he. Hea utsovank Israelachea bhurgeank tumi ektthaim korunk zai. Dôr-disachê riti pormannem Sorvesporak ujeant hulpailoleô bhettovnniô, hom', danam, iodn ani pinnea-orponnam bhettounk heô povitr-sobha tumi bhôrun haddtoleat."
38. Hachê bhair Sorvesporachem Son'varachem orponn, bhettô ani khuxê monan kel'lim dananchim orponnam sud'dam haddchim.
39. "Tumchem pik ektthaim kelea uprant, satvea mhoineachê pondraver suru korun, fuddlea sat disank hi porob korat. Poilo dis kherit visovacho dis zaun astolo.
40. Poilea disa, tumchea molleantlim borim tim follam, chuddttam ani zhadd-paleacheô talliô gheiat, ani tumchea Sorvesporak êk dharmik porob suru korat.
41. Sat dis ti sonvskarat, ani pinddkechê-pinddkek tumchê sonstin hi rit pallchi.
42. "Soglli Israel porza tea disamnim tombumnim ravtoli,
43. hê porim, tumchê sonstik kollun ieum-di, ki, Sorvesporan Israel porjek Ejiptantli bhair kaddun haddli tedna, tãnnim sadhea tombumnim ravchem mhonn sanglem. Hanv Sorvespor tumcho Dev. " '
44. Hê porim Moizesan Israel porjek, koxeô tãnnim heô porbô pallcheô tea vixim xikounn dili.
