1. Sorvesporan Moizesa kodde uloun mhollem:
2. Israelit lokam lagim uloi ani tankam sang: "Apnnak mon-khoxi nastana, konnem-i Sorvesporacho êk updês môddlo zalear, tannem he nem samballche:
3. Mha-iadnikachem tem pap zait zalear, hea pasot, tacho gunn porjekui lagta, to êk khot naslolo paddo haddtolo ani aplea farikponna khatir to Sorvesporak bhettoitolo.
4. Tombuchea dara-xim tê hom'-boliechê tokler aplo hat dovortolo ani thoim Sorvesporachea fuddeant taka martolo.
5. Magir, Maha-iadnik tachem ilem rogot gheun Tombunt bhitôr vetolo.
6. Tea rogtant aplem bott buddoitolo ani sat pavtti tem povitr podd'ddea mukhar uddoitolo.
7. Uprant, dhumpachea vedichea charui xingancher tantlem ilem rogot ghaltolo. Urlolem rogot to hom'-bhettechea vedichea pãia-xim ghaltolo, Tombuchea dara-xim.
8. Hea boilachi soglli chorob, toxich pottantli soglli chorob,
9. chorbê-soit donui mutpariô, ani kallza-figdacho boro to kuddko kaddtolo.
10. Iadnik hi chorob vhorun, ektarachê bhettent kortat tê porim, ti vedir hulpaitolo.
11. Punn zonavorachi chambddi, urlolem sogllem mas, tokli ani pãi, pottantlem sogllem zollieam soit, sogllem vhorun,
12. moidanachê ximê bhair, gobôr uddoitat thoim, lankddancher hulpaitolo.
13. Ak'khech Israel porjen zôr hem pap adarlam, ani soglleank tem bhuzta, zori-i soirana-khoxê bhair tem ghoddlem,
14. tori hem pap sobhemazar porgôtt zalem toxem, soglli porza patkanchea farikponnak êk paddo gheun Sorvesporachea Tombu-xim ietoli;
15. porjeche mukheli tea zonavorachê tokler aple hat dovortole, ani taka thoinch martole.
16. Maha-Iadnik tachem ilem rogot gheun Zomatichea Tombunt bhitôr sortolo,
17. tantunt aplem bott buddoitolo, ani sat pavtti tem podd'ddea mukhar uddoitolo.
18. Dhumpachea vedichea charui xingank tem laitolo, ani bakichem to hom'-bhettechea vedichea pãia-xim, Zomatichea Tombuchea dara-xim uddoitolo.
19. Tachi soglli chorob kaddun ti vedicher hulpaitolo.
20. Magir, apleach farikponnak kel'lem titlem-i hea-i paddeak kortolo, ani hê porim porjechem patok bhogsotolem.
21. Uprant, poilea boilak kel'lem toxem, moidanachê ximê-bhair vhorun tem sogllem hulpaitolo. Hê toren porjechem patok bhogson vetolem.
22. Oslem patok adarta to raj-odhikari zait zalear,
23. taka hem patok kollit korina fuddem, to ek khot-naslolo bokddo haddtolo.
24. Tachê tokler aple hat dovorlea uprant, vedichê ut'torê vatten, hom'-bhettek martat thoim taka martolo. Hi bhett patkachea farikponnak.
25. Iadnik zonavorachea rogtant aplem bott buddoitolo, vedichea charui xingank laitolo, ani bakichem rogot to vedichea pãia-xim ghaltolo.
26. Magir ektarachê bhettek kortat tech porim, tachi soglli chorob vedir hulpaitolo. Hê porim iadnik rajodhikareachea patkachea farikponnak bhett kortolo ani tem bhogsotolem.
27. Hench patok eka chaltea mon'xachem zait zalear,
28. tem tachea tonddar marina fuddem to aplea farikponnak, khot-nasloli êk bokddi haddtolo.
29. Hom'boliechê tokler aple hat dovortolo, ani vedichê ut'torêchê vatten, hom'-bhettek zonavoram martat thoinch tika martolo.
30. Iadnik tichea rogtant aplem bott buddoitolo, vedichea charui xingank laitolo, ani bakichem vedichea pãia-xim ghaltolo.
31. Magir, soglli chorob kaddun ti hulpaitolo, her bhettamnim kortat tê porim, ani ticho pormôll Sorvesporak mandtolo. Hê toren iadnik tachea farikponnak bhett kortolo ani taka tem patok bhogsotolem.
32. Patkachea farikponnak menddrantlem zonavor haddtat zalear koslench khot nastana, tem stri-zatichem zaunk zai.
33. Ho monis ticher aplo hat dovortolo, ani vedichê ut'torê vatten tika martolo.
34. Iadnik tichea rogtant aplem bott buddoitolo, ani vedichea charui xingank tem laitolo, ani bakichem rogot vedichea pãia-xim uddoitolo.
35. Magir, tichi soglli chorob kaddun, ektarachê bhettent kortat tê porim, sogllea her masa sangata ti vedir hulpaitolo. Hê porim tea mon'xachea farikponnak Sorvesporak bhett zatoli, ani tachem patok bhogsotolem." '
