1. Aaron-ritichea iadnikank sangunk, 'Sorvesporan Moizesak formailem, "Khoincheach eka iadnikan, aplê porjechea moddeak hat laun, oxud'dh zauncho nhoi.
2. Punn tachim lagxilim ghorchim zalear, ho kaido lagona: tachi avoi, tacho bapui, put-dhuv, bhav, vo
3. logn zaunk nasloli ani tacheach ghorant ravta ti bhoinn.
4. Logna vorvim jim taka soirim lagtat tanchê morna-ritint vantto gheun tannem apnnakuch oxud'dh korcho nhoi.
5. "Khoincheach iadnikan, dukhant asa mhonn dakhouncheak, aplem mathem vô khadd taschem-katorchem nhoi, ani aplea angak ghai ghalche nhoi.
6. Tannem povitr ravunk zai, ani mhojea nanvak beman korcho nhoi. To mhaka khann-bhett korta dekhun tannem povitr ravunk favo.
7. "Bhaddeache, vô ankvar-nhoi-te, vô ghovan pois kel'lê bailêkodde eka iadnikan logn zaunchem nhoi, kiteak to povitr.
8. "Lokak-ui hi iadnikachi povitrai dakhol zaunk zai, kiteak to mhaka jevonn vaddun dovorta. Hanv Sorvespor; hanv povitr, ani mhojê porjek povitr kortam.
9. "Eka iadnikachi dhuv, bhaddeak bhonvta ti aplea bapaik beman korta; tika hulpaun marchi.
10. "Mha-Iadnikachi tokli povitr telan makhloli, ani iadnikachim vostram ghalunk taka bhettoila, dekhun, apunn dukhant asa mhonn dakhounk, tannem aple kens ugollnastana sôddche nhoi, vô aplim vostram pinzchim nhoi.
11. Mhaka tachi bhett keloli asa, tea pasot, tannem apnnakuch oxud'dh korun gheuncho nhoi. Tacho bapui vô avoi-i zalim zalear, mel'lem moddem asa tea ghorant bhitôr sorun, mhozo Tombu tannem sôddun diuncho nhoi, ani hê porim to boxttauncho nhoi.
13. "Apleach kullantlea eka ankvar cheddva lagim tannem logn zaunchem;
14. ghov-mel'lê vô ghovan-soddlolê bailêkodde nhoi, vô bhaddeak bhonvta toslê kodde nhoi. Punn apleach kullantle ekê ankvarikodde.
15. Na tôr, tachim bhurgim, povitr asunk zai tim, riti pormannem oxud'dh zaun astolim. Hanv Sorvespor, ani mhozo Maha-Iadnik koso hanvem taka kuxin kaddla." '
16. Aaronak kollit korunk Sorvesporan Moizesak formailem,
17. "Tujê sonstintlea mon'xak kuddichi kosli-i khôdd asa tannem mhaka khann-bhett korchi nhoi. Sorvi ieunchea kallak hem lagu zata.
18. Kuddichi kosli-i khôdd asa tachean hi bhett korunk zaina: kudd'ddo zanv thontto, vô bhesurvanno,
19. hatan vô pãian longddo;
20. vô pongo, vô tengnno (mottvo); dollea vô katichê piddecho; vô hizddo- oslea konnachean ti bhett korunk zaina.
21. Mhonnttôch, Aaronachê sonstintlea, kuddichi khôdd aslolea mon'xachean mhaka khann-bhett korunk zaina.
22. "Punn hanchean mhaka bhettoilolem khann gheum-iet, zanv tem povitr, zanv Bhov povitr.
23. Toriastana, taka kuddichi khôdd asa dekhun, tachean povitr podd'ddea vô vedi-xim ieunk zaina. Tannem heô povitr vostu boxttaunk favona, kiteak hanv Sorvespor, ani hanv teô povitr kortam." '
24. Tôr, hem Moizesan Aaronak, tachea putank, ani sogllê Israel porjek sanglem.
