1. Sorvesporan mhollem, "devancheô murteô korum nakat, vô bhozchê khatir fatrache khambe ubarum nakat, vô fator kantoun murteô korcheô nhoi. Hanv tumcho Sorvespor.
2. Son'var samballat, ani mhaka nomoskar ditat tem ghor manan lekhat. Hanv Sorvespor.
3. "Mhojea kaideam pormannem jieun tumi updesank man dixat zalear
4. tumkam vellar pavs dhaddtolom, hê porim tumchim xetam borim piktolim ani tumche molle sufoll zatole.
5. Tumchim xetam itlim bhorpur piktolim, ki, molleantleô dakô paddi-sor, tumchim xetam lunvchim-mollchim sompchim nant; ani porot vompcho vêll ie porian tumche molle paddun sompchenant. Tumkam goroz tiitlem-i astolem, ani tumchea ganvant xantin jietoleat.
6. "Tumchea ganvant sovostkai vostoli, ani konnachich bhirant nastana tumi nhidtoleat. Tumchea ganvantleô bhirankull mon'zati hanv pois kortolom, ani zhuz-loddai thoim aschina.
7. Tumchea dusmanam virudh tumkam zoit melltolem;
8. tumchea panch-zonnanchean xemboram virudh zhuzun zoit jikhunk zatolem, ani tumche xembor zonn dha hozar dusmanank pois kortole.
9. "Hanv tumcher axirvad ghaltolom ani tumkam zaitim bhurgim-ballam ditolom; tumchêkodde koraracho mhozo vantto hanv palltolom.
10. "Tumchem pik itlem bhorpur zaun astolem, ki, urlam tem pornnem pik kuxin kaddun, novea pikak zago korcho poddtolo.
11. "Hanv mhojea Tombunt tumchê modem jietolom, ani tumchê sorxilo koddsorchona.
12. Hanv tumchea sangatak astolom; hanv tumcho Dev zatolom, ani tumi mhoji porza zatoleat.
13. Hanv tumcho Sorvespor, ani tumi konnachech chakor urona zauncheak, hanvem tumkam Ejiptantlim bhair kaddun haddleant. Tumkam thoim boll dhamun dhôrtalem tem hanvem môddun uddoilam, ani man ubi dhôrun tumkam choloun haddleant."
14. "Sorvesporan mhollem, Tumi mhojea kaideank pallo dinant zalear, tumkam khast favo zatoli.
15. Mhojea hukumam-updesanchi tumi porva korinant, ani tumchêkodde kel'lo korar môddxat zalear,
16. tumkam khast laitolom. "Tumcher noxtt dhaddtolom- boreô zainant tosleô pidda; kudd'dde korta toslo, ani tumcho jiv-ghottai jiron veta toslo zor. Tumi xetam vomptoleat punn tumkam tacho foll mellchona, kiteak dusman ieun tumchem lutt'tole ani tumcherui zoit vhortole.
17. Hanvui tumcher kolpotolom ani tumi mhojea adara-meklle zaun, tumche dusman tumchê-voir raj choloitole; konn tumchê patthik na tedna legun tumi zollim-mollim bhieun dhanvtoleat.
18. "Oxem-i astana, tumi mhaka khalte zainant zalear, sat pavtti tumchi khast vaddoitolom.
19. Tumchem gorv ani vado nivllaitolom; tumkam pavs poddchona, ani tumchi bhuim lokhonna porim ghôtt zaun vetoli.
20. Tumi ghameun ani humeun kiteakuch upkarchem na, tumchea xetant kãich pikchem na, ani molleant foll dhorchem na.
21. "Tumi mhojê virudh vochot ravlear, aninkui sat pavtti tumchi khast vaddoitolom.
22. Tumchê modem nixttur-bhirankull mon'zati dhaddtolom, ani teô tumchea bhurgeank toxem jiv-pranniank marun uddoitole, ani tumcho bhov thoddo lôk urtolo, ani tumche roste loka-meklle distole.
23. "Toripunn tumi mhaka khaltim zainant, ani beporva korit ravxat zalear,
24. adlea poros aninkui sat pavtti koddok khast tumkam laitolom.
25. Ani tumi mhozo korar môddlo dekhun, tumcher zhuz dhaddtolom, ani tumi khoinsorui asor gheunk sôdxat thoinsor legun tumchi duspott kortolom; tumcher pidda ieun, dusmanache gulam' zaunk sôdtoleat.
26. Tumcho jevnnacho mhal katrun uddoitolom, oso, ki mhal asa tea pormannem soglle undde bhazunk ekuch bhatti ani dha stri-lôk puro zatolim. Mhonnttôch, asa tea pormannem jevonn vanttchem poddtolem, ani toriastana lôk bhuken vollvolltolo.
27. "Itlem-i astana, tumi mhaka khaltim zainant zalear,
28. tumchi khast choddoit-vaddoit vetolom.
29. Oxi tumcher bhuk ietoli, ki tumchea bhurgeank khaun kaddtoleat.
30. Tumi bhoztat tea zagear aslolim unch sthanam ani dhump zolloitat teô vedi, môddun uddoitolom, ani tumchea devancher mel'lim moddim uddoitolom. Mhaka tumcho ekannem kanttalllo ieun,
31. tumchim xaram padd kortolom, tumchim Dev-sthanam nopoit kortolom ani devank bhettoil'lim danam ungchona.
32. Dusman ieun tumcho ganv ghetole, ani itlem nisontton polleun te thottaktole.
33. Tumcher zhuz ietôch, tumi porkea ganvamnim pollun vetoleat.Tumchea ganvant sogllem padd ani ghortthanuch vostolem.
34. Tedna, tumchea ganvant, tumi dinasleat to visôv sodankal vostolo; ani tumi porkea ganvamnim dusmanam modem pordês bhôgun astoleat.
35. Tedna, tumchea ganvant, tumi dinasleat to visôv sodankal vostolo; ani tumi porkea ganvamnim dusmanam modem pordês bhôgun astoleat.
36. Ani tumcho lôk pordesant itlê bhirantin jietolo, ki, varean legun ek zhaddachem pan hal'lear, hanga-thoim dhanvtolo. Zhuzachea moidanar zata tê porim, dusman legun na zalear tumi xevtton poddtoleat.
37. Tumi eka-mekacher xevtton poddtoleat, ani tumchean dusmanam virudh zhuzunk zaunchem na.
38. Tumi pordesant mortoleat, ani dusmanancho ganv tumkam aplê zomnint gilltolo.
39. Ani dusmanachea chopkeantle sutt'tat te, tumchea ani tumchea purvozanchea patkank lagon sukon-viron mortole.
40. "Punn tumchê sonstintle, tumi mhojer oxe kolpole dekhun, tumchim ani tumchea purvozanchim patkam kobul kortole,
41. "ani, hea khatir, hanvui tancher kolpolom ani tankam pordesant pavoile dekhun apli man baghaitole. Xekim, te hê porim lhan'vikaien choltôch ani patkanchem farikponn ditôch,
42. Jakoba, Izaka, ani Abrahama kodde kel'lo mhozo korar monant haddtolom, ani mhojê porjek to ganv porot diunk bhasavnni kortolom.
43. "Tea adim, to ganv loka-mekllo zaunk zai, hê porim thoim ekdom visôv astolo, ani mhoje hukum'-updes tãnnim zhaddun uddoile dekhun tãnnim purem farikponn diunk zai.
44. "Oxem-i astana, te dusmanachea ganvant pordês bhôgtana, hanv tankam ekannem visorchona. Toxem korun, mhozo korar-ui somptolo aslo; punn na, hanv tancho Sorvespor.
45. Punn, Ejiptantlim tankam bhair kaddun hanvem sogllea des-porzank mhojem podvedar boll dakhol kel'lem, ani tancho hanv Sorvespor zaunchê khatir, zo tanchea purvozam kodde hanvem korar tharailolo, hoch hanv tanchêkodde novean tharaun ghetolom. " '
46. Tôr, Sorvesporan Sinai Dongrar, Moizesak he hukum'-updes dil'le.
