1. Hea soglleachi khobor Jordan nodichê ostomtê vatten aslolea razamnim aikoli. Dongri mulkamnim, mollamnim ani orixtt doriachê kin’narer thaun Lebanon porian aslolea Hitit, Amorit, Kanaanit, Perizzit, Hivit, ani Jebusit ekmonan Joshua ani Israela virudh zhuzachi koblat keli.
3. Joshuan Jeriko ani Ai xarank kelam tem polleun, Gibeonan vosti kortoleam-nim,
4. taka naddgeponn korunk ievjilem. Tãnnim apnna khatir jevonn ghetlem ani pornne sak ani futtloleô punn novean xinvloleô pornneô bul’liô aplea gaddvancher ghaleô.
5. Tãnnim kope marloleô pornneô vhannô ani pinzkure kopdde ghale. Ani khaunk apnna borabor suke unddeache kuddke ghetle.
6. Tim, Gilgalant aslolea tombunt, Joshua-xim ailim ani taka ani Israelkarank tãnnim mhollem: ‘Ami poixilea desantlim aileant, amchê lagim êk koblat kôr.’
7. Israelitamnim Hivitachea mon’xank mhollem: ‘Tumi ghoddiê hangach khoim tori ravtat; tôr ami tumchê lagim koblat koxi korum?’
8. Tãnnim Joshuak mhollem: ‘Ami tujim chakram.’ Joshuan vicharlem: ‘Tumi konn? Ani khoim thaun tumi aileant?’
9. Tãnnim mhollem: ‘Sorvespora tumchea Devachea nanva khatir, tujim chakram khub poixilea desantlim aileant, Ashtarotant ravtolea dog Amorit razank, Hesbonachea raza Shihonank, ani Bashanchea raza Ogak, Tannem kitem kelem tachi khobor ami aikolea.
11. Haka lagun amchea zannteamnim ani desachea sogllea lokan amkam oxem mhollem: Vattek tumchê borabor jevnna khannacheô vostu vhorat; vochat ani tankam mellat ani oxem mhonnat: Ami tumchim chakram; amchê lagim êk koblat korat.
12. He polle amche undde; Tumchê-xim ieunk ami bhair sorlim tea disa te gorom’ ani taje asle punn atam polle, te sukleat ani moddtat.
13. Heô burleô bhorleat tedna noveô asleô, polle teô futtleat; lamb vatt cholun he amche kopdde ani amcheô vhannô zorleat.’
14. Fuddareamnim tannim bhettoilolem thoddem jevonn ghetlem punn Sorvesporachi budh tãnnim gheunk na.
15. Joshuan tanchê thaim xanti keli, ani tanchea jivachi rak'khonn korunk asvason diun êk koblat keli; Sobhechea fuddareamnim soput gheun ti monzur keli.
16. Koblat korun tin dis zatôch, tim, Israelachea prantant ravpi xezarcho lok mhonn sidh zalem.
17. Israelitkar aple tombuntle bhair sorle ani tin disam uprant tanchea prantamnim bhitôr sorle. Tanche pranth mhollear Gibeon, Kefira, Beeroth ani Kiriath- Jearim.
18. Sobhechea fuddareamnim Sorvespora Israela Devachea nanvan soput ghetlolo tea khatir, Israelitamnim tancher ghuri ghalunk na, punn ak’khi porza fuddaream add gunngunnunk lagli.
19. Fuddareamnim sogllê porjek mhollem: ‘Sorvespora, Israelechea Devachea nanvan ami tankam soput dila mhonnttôch, amchean tankam hat launk zaina.
20. Ami tankam oxem kortoleanv: Amcher khast iena zaunk tankam dilolea soputak lagun, ami tankam jieunk ditoleanv.’
21. Ani fuddareamnim fuddem mhollem: ‘Tankam jieum-di, punn tannim sogllê porjê khatir lakudd katorchem ani udok haddchem.’ Oxem fuddari uloile.
22. Joshuan Gibeonitkarank apounk dhaddle ani tankam vicharlem: ‘Amchê modem ravta astana-i ami pois ravtanv oxem mhonnun tumi amkam kiteak fottoile?
23. Atam thaun, tumi nirbhagi ani konnak bhairai nastana tumi chakor. Mhojea Devachea ghorant lakudd kator-pi ani udok haddpi koxe tumi vavurtoleat.’
24. Tannim Joshuak zobab dilo: ‘Tumkam ho ak’kho dês diunk ani tantunt vosti kortoleank nattak korunk, Sorvespora tumchea Devan Moizesak dilolea hukuma vixim tujea chakrank khobor mell’li. Tumkam lagun ami tharea bhielim ani oxem kelem.
25. Ani atam polle, ami tujea hatant asanv. Tuka kitem borem ani sarkem dista tem amchê sovem kôr.’
26. Ani tannem tankam oxem kelem: Tannem tankam Israelkaranchea hatantlim soddoilim ani tãnnim tankam jivexim marlim nant.
27. Sogllê porjê pasot ani Sorvesporachê vedi khatir, Joshuan tankam lakudd katorpi ani udok vhorpi kelim. Ani aiz porian tim toxench kortat.
